2018 جىلعى الدىن الا دەرەكتەر بويىنشا جامبىل وبلىسىنىڭ جالپى وڭىرلىك ءونىمىنىڭ ءوسىمى 1417،5 ميلليارد تەڭگەنى، ياعني 3،7 پايىزدى قۇراپ، بۇل رەسپۋبليكا وڭىرلەرى اراسىنداعى 8ء-ىنشى كورسەتكىش بولىپ وتىر. بۇل جونىندە جامبىل وبلىسى اكىمىنىڭ ءبىرىنشى ورىنباسارى  بەكبولات ورىنبەكوۆ وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە باياندادى. 

الدىمەن ەكونوميكا سالاسىنداعى كورسەتكىشتەرگە توقتالعان بەكبولات سەرىكبەك ۇلى  رەسپۋبليكانىڭ جالپى وڭىرلىك ونىمىندەگى وبلىستىڭ جالپى وڭىرلىك ءونىمىنىڭ ۇلەس سالماعى 2،4 پايىزدى قۇراعانىن ايتىپ ءوتتى.

– جالپى وڭىرلىك ءونىمنىڭ قۇرىلىمىندا ونەركاسىپ ۇلەسى – 17،9، اۋىل شارۋاشىلىعى – 10،2، قۇرىلىس – 8، ساۋدا – 9،9، كولىك – 18،2، بايلانىس – 0،7، جىلجىمايتىن مۇلىكپەن جاسالاتىن وپەراسيالار جانە ءبىلىم سالاسىنىڭ 7،5 پايىز سالىمدارىنىڭ ءوسىمى بايقالادى.

ال 2019 جىلدىڭ ءقاڭتار-ساۋىر ايلارىنىڭ قورىتىندىسى بويىنشا ءونەركاسىپ ءونىمىنىڭ ناقتى كولەم يندەكسى 102،1 پايىزدى قۇراپ، 154 095،8 ميلليون تەڭگەنىڭ ءونىمى ءوندىرىلدى، – دەدى ب.ورىنبەكوۆ.

قۇرىلىس كولەمى 17 477،7 ميلليون تەڭگەنى قۇراپ، 1،2 پايىزعا ارتىپتى. بۇل بىلتىرعى جىلدان بەرى وڭىردە تۇرعىن ءۇي قۇرىلىسىنىڭ قارقىن العانىمەن بايلانىستى بولسا كەرەك. ماسەلەن، بيىلعى ءقاڭتار-ساۋىر ايلارىندا 125 مىڭ شارشى مەتر تۇرعىن ءۇي پايدالانۋعا بەرىلىپتى، بۇل 2018 جىلدىڭ ءتيىستى ەسەپتى كەزەڭىمەن سالىستىرعاندا 104،8 پايىزدى قۇراپ، سالادا العا جىلجۋ بايقالىپ وتىر.

سونداي-اق، حالىقتىڭ ورتا ەسەپپەن جان باسىنا شاققانداعى اتاۋلى اقشالاي تابىستارى 2018 جىلدىڭ 4 توقسانىندا 65056 تەڭگەنى قۇراپ، 2017 جىلدىڭ ءتيىستى كەزەڭىمەن سالىستىرعاندا اتاۋلى كورىنىستە 11،1 پايىزعا، ناقتى – 5،6 پايىزعا ارتىپتى. بۇل دا كوڭىل كونشىتەرلىك كورسەتكىش.

ورتاشا ايلىق اتاۋلى جالاقى دا 2019 جىلدىڭ العاشقى توقسانىندا 112،3 مىڭ تەڭگەنى قۇراپ، اتاۋلى كورىنىستە 9،9 پايىزعا، ناقتى كورىنىستە 4،6 پايىزعا وسكەن ەكەن.

كىرىسسىز بيۋدجەتتىڭ قالىپتاسپايتىنى بەلگىلى. سوندىقتان اتقارۋشى بيلىكتىڭ باسىمدىق بەرەتىن ءبىر باعىتى – بيۋدجەت كىرىستەرىنىڭ جوسپارىن بارىنشا ورىنداۋ. 2019 جىلدىڭ 1 مامىرىنا وبلىس بيۋدجەتىنىڭ كىرىستەرى 76 ميلليارد 294،1 ميلليون تەڭگە سوماسىندا، ياعني 106،2 پايىزعا قامتاماسىز ەتىلىپ وتىر. بۇل رەتتە مەنشىكتى كىرىستەردىڭ جوسپارى كۇتكەندەگىدەن كوبىرەك ورىندالىپتى. ايتالىق، كىرىستىڭ بۇل ءتۇرىن وسى سەپتى كەزەڭدە 15 ميلليارد 896،7 ميلليون تەڭگەگە ورىندايمىز دەپ بەكىنسە، ناقتىسىندا كىرىس 20 ميلليارد 319،9 ميلليون تەڭگەگە اسىپ-جىعىلىپ، 127،8 پايىزعا ورىندالعان. ەسەسىنە بيۋدجەتكە 4 ميلليارد 423،1 ميلليون تەڭگە جوسپاردان ارتىعىمەن ءتۇسىپ وتىر. ال كورسەتكىشتى بىلتىرعى جىلدىڭ وسى ەسەپتى مەرزىمىمەن سالىستىرساق ءوسىم 116،4 پايىزدى قۇراپتى.

باقىت جالعاس