جاستار جىلى اياسىندا م.ح.دۋلاتي اتىنداعى تارمۋ-دە «ستۋدەنتتىك كوكتەم» اتتى ايماقتىق بايقاۋ-فەستيۆالى ءوتتى.

ەلىمىزدىڭ وڭتۇستىك ايماعىندا ورنالاسقان جوعارى وقۋ ورىندارى ستۋدەنتتەرىنىڭ شىعارماشىلىعىنا قولداۋ كورسەتۋ ماقساتىندا ۇيىمداستىرىلعان شاراعا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى، م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى، م.ساپاربايەۆ اتىنداعى وڭتۇستىك قازاقستان گۋمانيتارلىق ينستيتۋتى، حالىقارالىق گۋمانيتارلىق-تەحنيكالىق ۋنيۆەرسيتەتى، وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى، قورقىت اتا اتىنداعى قىزىلوردا مەملەكەتتىك ۋنيۆەرسيتەتى مەن وڭىردەگى 3 جوعارى وقۋ ورىندارىنىڭ ستۋدەنتتەرى قاتىسىپ، باقتارىن سىنادى.

تاراز اسپانىن ەكى كۇن بويى دۇبىرگە بولەگەن بايقاۋدا ولار ەسترادالىق ۆوكال، حالىقتىق حورەوگرافيا، زاماناۋي حورەوگرافيا جانە كۇيشىلىك ونەر جانرلارى بويىنشا ونەرلەرىن ورتاعا سالدى. بايقاۋعا بەلگىلى ونەر مايتالماندارى قازىلىق ەتىپ، تالاپتى  جاستاردىڭ شىعارماشىلىعىنا باعاسىن بەردى.

بايقاۋدىڭ ەسترادالىق ۆوكال بولىمىندە جاس انشىلەر جاندى داۋىستا 2 ءان ورىنداۋى ءتيىس بولدى. قازاقتىڭ اتاقتى كۇيشى-كومپوزيتورى ءابدىمومىن جەلدىبايەۆ ءتوراعالىق ەتكەن قازىلار القاسىنىڭ مۇشەلەرى انشىلەردىڭ ساحنادا ءوزىن-وزى ۇستاۋى، ارتىستىك قابىلەتى، ءاندى ورىنداۋ تەحنيكاسى، ورىنداۋ شەبەرلىگى، ساحنالىق كيىمى، تاڭدالعان رەپەرتۋارى ورىنداۋشىنىڭ دياپازونىنا سايكەس كەلۋى مەن مۋزىكاعا ىلەسۋىنە قاتاڭ سىن كوزبەن قاراپ، ءادىل باعاسىن بەرىپ وتىردى. سونداي-اق ءولاردىڭ كەمشىن تۇستارىن ايتىپ، تابيعاتىنا كەلەتىن تۋىندىلاردى تاڭداۋ قاجەتتىگىن دە ەسكەرتىپ وتىرۋدى ۇمىتپادى. ال حالىقتىق حورەوگرافيا بولىمىندە بيشىلەر قازاق جانە وزگە ۇلتتىڭ ءبيىن بيلەۋگە مىندەتتەلدى. ال ءوز كەزەگىندە ءادىل قازىلار ولار ورىنداعان ءبيدىڭ قويىلىمى، ورىنداۋ شەبەرلىكتەرى، سينحروندى ورىنداۋى مەن ساحنالىق كيىمدەرىنە باسا نازار اۋداردى.

سونداي-اق زاماناۋي حورەوگرافيا بولىمىندە ۇمىتكەر توپتار 2 بي بيلەپ، ونەرلەرىن ورتاعا سالدى.

ال، كۇيشىلىك ونەر ءبولىمى جەكە ورىنداۋشى جانە قازاق ۇلتتىق اسپاپتار انسامبلدەرىنىڭ سايىسى بويىنشا ءوربىپ، ولار 2 كۇيدەن ورىندادى. مۇندا دا ولاردىڭ ورىنداۋ شەبەرلىكتەرى مەن ساحنالىق كيىمدەرى ەسكەرىلدى.

وسىلايشا، وڭتۇستىك ايماقتاعى جوعارى وقۋ ورىندارىنىڭ ونەرلى ستۋدەنتتەرى بايقاۋدىڭ گالا-كونسەرتىندە ونەر كورسەتۋگە مۇمكىندىك الدى.

فەستيۆالدىڭ كەلەسى كۇنى گالا كونسەرت جوعارى دەڭگەيدە ۇيىمداستىرىلدى. سالتاناتتى شارادا وبلىس اكىمىنىڭ ورىنباسارى سۇلۋشاش قۇرمانبەكوۆا  بايقاۋدىڭ ماڭىزدىلىعىنا توقتالىپ، بارشا قاتىسۋشىلارعا جىلى لەبىزىن ءبىلدىردى.

مۇنان سوڭ ءسوز تىزگىندەگەن م.ح.دۋلاتي اتىنداعى تارمۋ رەكتورى ماحمەتعالي سارىبەكوۆ اتالعان وقۋ ورنىنىڭ ۇيىمداستىرۋىمەن ەكى جىلدا ءبىر رەت ۇيىمداستىرىلاتىن «ستۋدەنتتىك كوكتەم-2019» فەستيۆالى بيىل ەرەكشە فورماتتا ءوتىپ جاتقانىن تىلگە تيەك ەتىپ، جاستار جىلىنا ارنالىپ وتىرعاندىعىن جەتكىزدى.

سونىمەن بايقاۋ ناتيجەسىنە كەلسەك، «كۇي ونەرى» جانرى بويىنشا باس جۇلدەنى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ «التاي ۇران» توبى يەلەندى.

ال «كۇي ونەرى» جەكە ورىنداۋشى جانرى بويىنشا قورقىت اتا اتىنداعى قمۋ ستۋدەنتى نۇربول قۋانىشيەۆ جەڭىمپاز اتاندى.  سونىمەن قاتار «حالىق حورەوگرافياسى» جانرى بويىنشا «بي سۇلتان» توبىنىڭ بيشىلەرى ەشكىمگە دەس بەرمەدى. سونداي-اق «زاماناۋي حورەوگرافيا» جانرى بويىنشا «Tarsu.kz» بي توبى ءى ورىندى يەلەندى.

باقىت جالعاس