وسىدان بىرنەشە جىل بۇرىن باستاماسى كوتەرىلىپ، جان-جاقتى يدەيالارمەن جاندانا تۇسكەن مۋزەي اشۋ ءىسىن كوپشىلىك جامبىلدىق تەمىرجولشىلار قولداعان ەدى. جامبىل جۇك تاسىمالى بولىمشەسى ديرەكتورى بەرىك اقشالوۆتىڭ باس بولىپ، قولداۋ ءبىلدىرۋىنىڭ ارقاسىندا مۋزەيدى جاساقتاۋ، جابدىقتاۋ جۇمىستارى جۇيەلەنىپ، جاقىندا جاڭا مۋزەي كوپشىلىككە ەسىگىن ايقارا اشتى.

بولىمشە عيماراتىندا وتكەن سالتاناتتى جيىنعا جەرگىلىكتى تەمىر جول بولىمشەلەرى باسشىلارىنان بولەك سالا ارداگەرلەرى، استاناداعى ورتالىق اپپارات وكىلدەرى، كورشىلەس تۇركىستان وبلىسىنان ات ارىلتىپ جەتكەن قوناقتار دا قاتىستى. اتاپ ايتساق، «قتج» ۇك»اق تەحنيكالىق ساياسات جونىندەگى اتقارۋشى ديرەكتورى بەيبىت يبرايەۆ، «قتج» ۇك»اق – جۇك تاسىمالى فيليالىنىڭ كاسىپوداق كەڭەسىنىڭ ءتوراعاسى ەرمەك تولەگەنوۆ، بۇعان دەيىن ورال، جامبىل، الماتى جول بولىمشەلەرىن باسقارعان داۋلەتباي ەسىمبەكوۆ، 1993-2007 جىلدارى ارالىعىندا جامبىل جول بولىمشەسىن قۇرمەتتى تەمىرجولشى ساعىمبەك اقشالوۆ، شىمكەنت جول بولىمشەسى ارداگەرلەر كەڭەسىنىڭ ءتوراعاسى نۇرعالي نۇرتايەۆ، جامبىل وبلىستىق ارداگەرلەر كەڭەسىنىڭ ءتوراعاسى ەركىنبەك سولتىبايەۆ سىندى ازاماتتار قۇتتىقتاۋ ءسوز سويلەپ، ىزگى تىلەكتەرىن ءبىلدىردى.   

جامبىل جول بولىمشەسىنىڭ مۋزەيى اشىلعان بۇل داتانى تاريحي كۇن دەسەك تە ارتىقتىق ەتپەس. ويتكەنى بۇعان دەيىن مۇنداي مۋزەي جامبىلدا بولماعان ەكەن. اشىلۋ سالتاناتىنىڭ العاشقى ءسوز تىزگىنىن العان جامبىل جۇك تاسىمالى بولىمشەسىنىڭ ديرەكتورى بەرىك اقشالوۆ بۇل كۇن بارشا جامبىلدىق تەمىرجولشىلار ءۇشىن ۇلكەن مەرەكە ەكەنىن ايتىپ ءوتتى.

– ءبىز بۇگىن بولىمشەدەگى ارداگەرلەر كەڭەسىنىڭ ءتوراعاسى ساعىمبەك اقشالوۆ پەن بولىمشە كاسىپوداق ۇيىمىنىڭ ءتوراعاسى جۇمان سامەنوۆتىڭ باستاماسىمەن، وسى كىسىلەردىڭ ۇيىتقى بولۋىمەن قولعا الىنعان تىرلىكتىڭ جەمىسىن كورىپ وتىرمىز. بۇل رەتتە مۋزەيدىڭ اشىلۋ سالتاناتىنا دەيىن اتقارىلعان كول-كوسىر ەڭبەك ءۇشىن وسى ءىستىڭ بەل ورتاسىندا، باسى-قاسىندا جۇرگەن ازاماتتارعا شەكسىز العىسىمدى بىلدىرەمىن. مۋزەي ىشىندەگى ءماجىلىس زالىنىڭ رەكونسترۋكسيالىق جۇمىستارىنا دا كوپ كۇش، ماتەريال جۇمسالدى. ال مۋزەي جادىگەرلەرى دە وڭايشىلىقپەن جينالا قويمادى. ءبىز مۇندا تەمىر جولعا قاتىستى بارلىق ماماندىقتى، ونىڭ اتقارعان جۇمىسىن كورسەتۋگە، قامتۋعا بارىنشا تىرىستىق. كونە دە قۇندى دۇنيەلەردى تاپتىق. ۇلى وتان سوعىسىنا قاتىسقان تەمىرجولشىلاردىڭ دا مايدانداعى ەرلىكتەرىن كورسەتۋگە، ۇمىت قالدىرماۋعا كۇش سالدىق، – دەدى ب.اقشالوۆ.

مۋزەي سىرتىندا وتكەن سالتاناتتى جيىننان سوڭ  لەنتا قيىلىپ، قوناقتار مەن تەمىرجولشىلار جادىگەرلەردى تاماشالادى. مۇندا سوناۋ تۇركسىب ماگيسترالىنىڭ قۇرىلىسى كەزىنەن ساقتالعان كونە زاتتار، سول كەزدە تۇسىرىلگەن فوتوسۋرەتتەر توپتاستىرىلعان.

جالپى، مۋزەيگە كىرگەننەن قوس قاپتالداپ ناعىز تەمىرجولدىڭ زاتتارى، قۇندى دۇنيەلەرى مەن فوتوسۋرەتتەرى، قۇجاتتارى ورنالاستىرىلسا، ءتور جاعىندا جامبىلدىق قۇرمەتتى تەمىرجولشىلار مەن ءوڭىردىڭ باسشىلىعىندا بولعان ازاماتتاردىڭ فوتوسۋرەتتەرى ءىلىنىپتى. ال تۇپكى توردە، جارىقپەن بەزەندىرىلگەن قازاقستان تەمىر جولىنىڭ كارتاسى قويىلعان. ءبىر سوزبەن ايتقاندا مۇنداعى قۇرال-سايمان، وندىرىستىك ماتەريال، فوتوسۋرەت، اپپارات، توسبەلگى، تۋ تۇرىندەگى جادىگەرلەردىڭ ءبارى سوناۋ تۇركسىب كەزەڭىنەن وسى كۇنگە دەيىنگى وڭىرلىك تەمىرجولشىلار ومىرىنەن، سالانىڭ تىنىس-تىرشىلىگىنە حابار بەرىپ تۇر.

مۋزەي ءىشىن بۇگە-شىگەسىنە دەيىن ارالاپ، قىزىقتاپ كورگەن سوڭ جيىلعان جۇرت مادەني شارالارعا دا بەيىمدەلىپ قايتا جاراقتاندىرىلعان ءماجىلىس زالىندا كونسەرتتىك باعدارلامانى تاماشالادى.

باقىت جالعاس