«جاسىل» ەنەرگەتيكانى قارقىندى دامىتۋعا بەت بۇرعان ەلىمىزدە بالامالى قۋات كوزدەرىنەن ەنەرگيا جيناۋ جولعا قويىلىپ كەلەدى. بۇل رەتتە، بولاشاقتىڭ تەحنولوگياسىن ءوز يگىلىگىنە جاراتۋدا جامبىل وبلىسىنىڭ رەسپۋبليكا كولەمىندە كوش باستاپ كەلە جاتقانى قۋانتادى. بارلىق تۇرعىدان ءتيىمدى جۇيەگە كوشىپ، وزگە وڭىرلەر اراسىندا كوش باستاۋعا قوردايداعى جەل، جۋالى اۋدانىنداعى كۇن جانە ت. رىسقۇلوۆ اۋدانىنداعى سۋ ەلەكتر ستانسيالارىنىڭ ىسكە قوسىلۋى ۇلكەن سەپتىگىن تيگىزدى. ال، جۋىردا اتالعان بالامالى كوزدەردەن قۋات ءوندىرۋ كەشەندەرىنىڭ قاتارى تاعى ءبىر نىسان – جاڭاتاس جەل ەلەكتر ستانسياسىمەن تولىقپاق.

اسىلىندە، سارىسۋدا جەل ەلەكتر ستانسياسىن سالۋ تۋرالى ۇسىنىستار ايتىلىپ كەلە جاتقانىنا ءبىرشاما ۋاقىت بولعان. وسىلايشا، بۋىرقانعاندا جولىنداعىنى جايپاپ وتۋگە قاۋقارى جەتەتىن جەلىن پايداعا جاراتۋ تۋرالى بۇل پىكىرلەر نازارعا الىنىپ، بىرەر ۋاقىت بۇرىن قۇرىلىس جۇمىستارى باستالىپ تا كەتتى.

تۇركىستان اۋىلدىق وكرۋگىندە ورنالاساتىن اتالمىش ستانسيا 100 مۆت ەلەكتر ەنەرگياسىن وندىرەدى دەپ جوسپارلانىپ وتىر. نىساننىڭ قۇرىلىسىن جۇرگىزۋ ءۇشىن جوبانى ۇسىنۋشى – «جاڭاتاس جەل ەلەكتروستانسياسى» ءجشس-ى ەلەكتر قۋاتىن ءبولۋ سىزباسىن ازىرلەپ، «كەگوك» كومپانياسىنىڭ كەلسىمىن العان. باس مەردىگەر رەتىندە انىقتالعان جۇڭگو حالىق رەسپۋبليكاسىنىڭ «China Power International Holding» كومپانياسى ستانسيا قۇرىلىسىن كەلەر جىلدىڭ اقپانىندا اياقتاۋدى جوسپارلاپ وتىر. سونداي-اق، ولار قۇرىلىسقا قاجەتتى زاتتاردى جەرگىلىكتى تاۋار وندىرۋشىلەردەن الاتىنىن ايتادى.

وسىلايشا، سارىسۋلىقتار جىل ون ەكى اي تىنىمسىز سوعاتىن «اققىرقا» مەن «ارىستاندى قاراباس» جەلىن قاجەتكە جاراتىپ، ەل يگىلىگىنە پايدالانباق. مۇنى «جوقتان بار جاساپ»، تابيعاتتىڭ قۇدىرەتىن ادامنىڭ قاجەتتىلىگىنە يكەمدەۋدىڭ كەرەمەت ۇلگىسى دەپ بىلسەك بولادى.

ارينە، جەل ەلەكتر ستانساسىنىڭ ەلىمىزدەگى «جاسىل» ەكونوميكانىڭ دامۋىنا عانا ەمەس، اۋداننىڭ وسىپ-وركەندەۋىنە دە تيگىزەر ۇلەسى مول. اسىرەسە، قۇرىلىس بارىسىندا جانە نىسان اسكە قوسىلعان كەزىندە جاڭا جۇمىس ورىندارىنىڭ اشىلۋى جەرگىلىكتى حالىقتى قۋانتارى ءسوزسىز.

كەيىنگى جىلدارى جامبىل وبلىسى بارلىق سالالار بويىنشا الدىڭعى قاتاردان كورىنۋدە. ەندىگى كەزەكتە بالامالى ەنەرگيا كوزىن كادەگە جاراتۋ باعىتىندا دا وڭ وزگەرىستەرگە جول اشىلۋدا. بۇل ءوز كەزەگىندە ايماقتىڭ دامۋىنا تىڭ سەرپىن بەرەتىندىگى داۋسىز. 

باقىت جالعاس