قازاقستاندا 3 مىڭداي زورلىقشىلار، ونىڭ ىشىندە 150 پەدوفيل ءالى ۇستالعان جوق دەپ ءمالىم ەتتى قازاقستاننىڭ باس پروكۋرورى باسشىسىنىڭ ورىنباسارى نۇرمۇحانبەت يسايەۆ.
«رەسمي ستاتيستيكا بويىنشا، سوڭعى 5 جىلدا 3 مىڭداي زورلىقشى ءالى انىقتالعان جوق جانە ەركىندىكتە ءجۇر، ولىردىڭ ىشىندە 150-دەن استام سابيلەردى زورلاۋشىلار بار»، — دەدى يسايەۆ بەيسەنبى كۇنى زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسىندا.
«جۇگەنسىزدىكتى سەزىنگەن ونداي تۇلعالار جىلدار بويىنا اۋىر جانە اسا اۋىر قىلمىستار جاساپ ءجۇرۋى مۇمكىن. قوستاناي وبلىسىندا 2014 جىلى ساۋىردە كامەلەتكە تولماعان جاس قىز بالانى ۇرلاپ اكەتىپ، جىنىستىق زورلىق جاساعان لەسنيكوۆتىڭ ءىسى سونىڭ ايعاعى»، — دەدى ول.
نۇرمۇحانبەت يسايەۆتىڭ ايتۋىنشا، لەسنيكوۆ تەرگەۋ بارىسىندا 2012 جىلى جىنىستىق قىلمىس جاساپ، تاعى ءۇش ايەلدى ولتىرگەنىن، ونىڭ ىشىندە كامەلەتكە تولماعان ءبىر قىز بالانى ولتىرگەنىن مويىنداپتى.
«وكىنىشكە قاراي، بۇل وقيعا قىزمەتكەرلەردىڭ كاسىبي بىلىكتىلىگىنىڭ تومەندىگىنەن بولىپ وتىرعانىن مويىنداۋىمىز كەرەك، سەبەبى ول ءبىرىنشى قۇربان جوعالعان ساتتە-اق نازارعا ىلىككەن ەكەن»، — دەدى نۇرمۇحانبەت يسايەۆ.
بۇل رەتتە ول زورلىقشىلار مەن پەدوفيلدەردى ىزدەستىرۋدە پوليسەيلەر كوپ جاعدايدا شارا قابىلدامايتىنىن قاداپ ايتتى.
