بيىل «اتامەكەن» كاسىپكەرلەر پالاتاسىنىڭ قولداۋىمەن ەلىمىزدە العاش رەت وتاندىق ديزاينەرلەر اراسىندا «التىن ويماق» بايقاۋى وتەدى. ماقسات - وتاندىق ديزاينەرلەرگە جانە ءىسىن جاڭادان باستاعان كاسىپكەرلەرگە قولداۋ كورسەتۋ. سونداي-اق، قولونەر شەبەرلەرىنىڭ ەسىمىن ەلگە تانىتۋ. ماڭعىستاۋدان ايتۋلى بايقاۋعا قاتىسۋعا 19 ىسكەر ءوتىنىم بەرىپ ۇلگەردى. سولاردىڭ ءبىرى-اليا الحابايەۆا.

ءاليا ءجۇسىپ قىزى بالا كەزدەن تىگىنشىلىك ونەردى جانى ءسۇيدى. ەلدەن ەرەكشە كيىنۋدى، وزگەشە تالعامدى قالاپ تۇراتىن ەدى. مەكتەپ بىتىرگەن سوڭاعىلشىن ءتىلى باعىتىندا ءبىلىم الىپ، اۋدارماشى، شەت ءتىلى ءمۇعالىمى بولىپ قىزمەت اتقاردى.كىشكەنتاي قىزى ومىرگە كەلىپ، انا اتانعاندا ءاليانىڭ تىگىنگە دەگەن ماحابباتى قايتا وياندى.ءبۇلدىرشىننىڭ كيىمدەرىن وزگەلەرمەن بىردەي قىلماي، ءوزى تىگىپ كيگىزىپ ءجۇردى. وسىلايشا بالالار كيىمى ديزاينىن ەتنو ستيلدە ويلاپ تابۋ قاجەت دەگەن يدەيا تۋدى. ارمان مەن ماقسات ۇلكەن شابىتقا ۇلاسىپ، بالالار كيىمى، اناسى مەن قىزى دەگەن تىزبەكپەن كيىم تىگۋدى باستاپ كەتتى. ول ءۇشىن ارنايى كۋرستا وقىپ، تىگۋ تەحنيكاسىن جەتىلدىردى. وسى جىلدىڭ قاڭتار ايىندا «اi_hanym_kids» برەندىنىڭ نەگىزىن قالاپ، ءوز ءىسىن اشتى. ىسكەر قىزدىڭ ماقساتى- اتا-بابالارىمىزدان بۇگىنگە دەيىن جەتكەن ويۋ-ورنەكتەر مەن ۇلتتىق قۇندىلىقتارىمىزدى زاماناۋي ناقىشپەن ۇيلەستىرىپ، جاڭاشا ۇلگىدە كيىم تىگۋ. ءاليانىڭ باسقا ديزاينەر، تىگىنشىلەردەن ەرەكشەلىگى- تابيعي زىعىر ماتاسىن عانا پايدالانۋى. زىعىر ماتاسىن ۇلتتىق بولمىسپەن ۇيلەستىرىپ، ءساندى كويلەكتەر تىگۋى.

جاس ديزاينەردىڭ كيىمدەرىنە سۇرانىس بىرتىندەپ ارتىپ كەلەدى. جاقىندا نۇر-سۇلتان قالاسىندا وتكەن «ۇلتتىق ءونىم-2019» كورمەسىنە اقتاۋدىڭ اتىنان بارىپ قاتىسقاندا، ونىڭ كيىم ۇلگىلەرىنە ايتۋلى ديزاينەرلەردىڭ ءبىرازىنىڭ كوزى تۇسكەن. ونىڭ وزىندىك دارا ءستيلى، قايتالانباس قولتاڭباسىبار ەكەنىن، بولاشاقتا ۇلكەن جەتىستىكتەرگە جەتۋگە ابدەن لايىق ەكەنىن ايتۋشىلار كۇرت كوبەيدى. كورمە سوڭى جارمەڭكەگە ۇلاسىپ، كەلۋشىلەر ءاليانىڭ كويلەكتەرىن ساتىپ الىپ كەتكەن. ءقازىر ايىنا 5-6 كويلەك تىگەدى. جاڭا ۇلگىلەرىن ءىرى ساۋدا ورتالىقتارىنا دا شىعارا باستادى. كيىمدەردىڭ قۇنى تىگۋ تەحنيكاسىنا قاراي باعالانادى.

تىگىنشىنىڭ ايتۋىنشا، كيىمدەردىڭ تىگىلۋى مەن ماتاسىندا ءمىن جوق. ويتكەنى، كويلەكتەردىڭ ديزاينىن ويلاپ تابۋ، ءپىشۋ، تىگۋ، ورنەكتەرمەن ساندەۋ بارلىعى ءاليانىڭ ءوز قولىنان شىعادى. ال، شيكىزاتتار مەن زىعىر ماتاسى رەسەي، بەلارۋس ەلدەرىنەن، اقش-تان جەتكىزىلىپ وتىر. بولاشاقتا جەكە تىگىن شەبەرحاناسىن اشىپ،  جۇمىسشى سانىن كوبەيتىپ، ءونىمدى ارتتىرۋدى ماقسات ەتەدى. جالدامالى تىگىن شەبەرحاناسىندا جۇرگەن ول دىتتەگەن ماقساتىنا ايقىن بەت بۇردى.

«التىن ويماق» بايقاۋى تۋرالى ءاليا ارىپتەستەرىنەن ەستىدى. ونىڭ شارتتارى مەن تالاپتارى كوڭىلىنە قونىپ، كوپ ويلانبايقاتىسۋعا بەل بۋدى.

ماڭعىستاۋ وبلىسى ىسكەر ايەلدەر كەڭەسى جانىنداعى «ماڭعىستاۋ وبلىستىق كيىم ديزاينەرلەر وداعى» قاۋىمداستىعىنىڭ تەڭ قۇرىلتايشىسى ديانا بوتايەۆا: 

-«ءىسىن ەندى باستاعان ديزاينەرلەر وزدەرى ويلاستىرىپ، تىگىپ، تاپسىرىس قابىلداسا، ءقازىر ولار وقىپ، كورمەلەرگە قاتىسىپ، ۇلتتىق كيىم عانا ەمەس، كۇندەلىكتى ومىردە كيەتىن كيىمدەر شىعارىپ جاتىر. وڭىردە عانا ەمەس باسقا قالالارعا كيىمدەرىن ساتاتىن بەلگىلى جەتىستىككە جەتكەن ديزاينەرلەر بار. ولار وسى بايقاۋعا قاتىسىپ، بيزنەسىن دامىتۋعا گرانتتار ۇتىپ الۋىنا بولادى. ديزاينەر ماماندىعى قازاقستاندا مۇنايشى سەكىلدى سۇرانىسقا يە ماماندىق بولۋى كەرەك»، - دەيدى.

ماڭعىستاۋ وبلىستىق ىسكەر ايەلدەر كەڭەسىنىڭ ءتورايىمى ساۋلە ساليحوۆا «التىن ويماق» بايقاۋى وتاندىق ديزاينەرلەردىڭ ەلگە تانىلۋىنا ىقپال ەتەتىنىن اتاپ ءوتتى.

-«التىن ويماق» – قازاقستاندا تالانتتى، ەشكىمگە بەلگىسىز، اتى جوق ادامداردى شىعاراتىن بايقاۋ. ونى جىل سايىن وتكىزۋ جوسپاردا بار. العاشقى جىلى كۇمانمەن قارايتىندار كوپ بولادى. ءبىرىنشى بايقاۋ قالاي وتەدى، سوعان بايلانىستى ادام تالاپتانا بەرەدى. ول بايقاۋدىڭ ديزاينەرلەردىڭ سەرىكتەستىك ورناتىپ، بىرىگۋىنە مول مۇمكىندىك بەرەتىنىن جانە مۇنى قولدايتىنىن جەتكىزدى. ءبىر ادامعا كوتەرىلۋ وتە قيىن. بىرىگىپ شاعىن ءوندىرىس قۇرسا، ناتيجە بولادى»، - دەيدى ساۋلە ساليحوۆا.

«التىن ويماق» بايقاۋىندا كوميسسيا لاۋرەاتتاردى ىرىكتەيدى. ەكىنشى كەزەڭدە ۇمىتكەرلەر قوعامدىق ونلاين-داۋىس بەرۋگە قاتىسادى. باس جۇلدەدەن ۇمىتتىلەر ماۋسىم ايىندا ەلوردادا وتەتىن «جەڭىلونەر كاسىپ» فورۋمىندا جاريالانادى. ءۇشىنشى كەزەڭدە التى لاۋرەاتتىڭ ىشىنەن جەڭىمپاز تاڭدالادى. ماراپاتتاۋ سالتاناتى جەلتوقسان ايىندا وتەدى.