مۇرنى سىنىپ، اياق ساۋساقتارى بۇگىلمەي قالعان «ماۋگلي» قىزدى ەرىكتىلەر ولىمنەن اراشالاپ قالدى دەپ جازادى Qamshy.kz اقپارات اگەنتتىگى ەۆرازيا ارناسىنا سىلتەمە جاساي وتىرىپ.

قاراعاندىلىق ەرلى-زايىپتى ءتورت جاسار ءبۇلدىرشىندى كۇنى-تۇنى ۇرىپ، وزدەرىنەن قالعان جۋىندىمەن تاماقتاندىرعان. ولشەمى كىشى اياق كيىمنەن ساۋساقتارى بۇگىلىپ، مۇلدە جازىلماي قالعان.

اراققا سالىنعان اناسى مەن بىرگە تۇراتىن ەر ادامنان ابدەن قورلىق كورگەن ءبۇلدىرشىن ەرىكتىلەرگە جالىنىپ، ءوزىن ۇيگە قايتارماۋىن سۇراعان. بالانى باسىنىپ، باس-اياعىنان ساۋ جەر قالدىرماعان ەرلى-زايىپتىلار ەرىكتىلەردىڭ «قىزدارىڭىز قايدا» دەگەن سۇراعىنا سەلقوستىق تانىتىپ، ەش سەلك ەتپەگەن. ويتكەنى ەكەۋى دە ۋداي ماس.

«ءبىز ەكىنشى كۇن قاتارىنان كەلىپ، اتا-اناسىمەن تىلدەسىپ ءجۇرمىز، ءبىراق ولار جاۋاپ بەرگەندەرىن مىندەتسىنىپ وتىر»،- دەيدى ەرىكتىلەر.

ءوز وتباسى وزەگىنەن تەپكەن قىز بالا ۇيىندە «ماۋگلي» سەكىلدى ءومىر سۇرگەن. قاتتى سەللوفاننىڭ ۇستىندە ۇيىقتاپ، ۇلكەندەردەن قالعان جۋىندىنى ىشىپ-جەگەن. ءىشى لاس، ساسىق ءيىس مۇڭكىگەن باسپانادا تۇرىپ جاتقان ءبۇلدىرشىن تۋرالى ەرىكتىلەرگە كۋاگەرلەردىڭ ءبىرى حابارلاعان ەكەن. بالانى كورگەن ولار، بالانى بىردەن الىپ كەتىپتى.

«اناسى ناتاشاعا بارىپ، «بالانى نەگە ۇراسىڭدار» دەپ سۇراعانمىن. ول قىزىنىڭ قان قىسىمى بار ەكەنىن ايتىپ، اقتالدى. ءبۇلدىرشىننىڭ اياق كيىمى كىشى ولشەمدە بولعاندىقتان، اياق ساۋساقتارى بۇگىلىپ قالعان. شاشىن تاراعان كەزدە باسىم اۋرادى دەپ جىلادى. تاماعى ءىسىپ كەتكەن. ءتىلى ابدەن تىستەلگەن. مۇرنى سىنعاندىقتان، ۇيىقتاعاندا اۋزىمەن دەمالادى. ءبىز بۇل جايتتاردىڭ بارلىعىن پوليسياعا حابارلادىق. بارلىعى زاڭ جۇزىندە ىسكە اسىرىلدى.»،- دەيدى ۆيكتوريا ەسىمدى ەرىكتى.

ال تۇرمىسى تومەن وتباسىنىڭ كورشىلەرى بولعان جايتتان بەيحابار. قورلىق كورگەن قىزدى دا، ونىڭ اناسىن دا كورمەيمىز دەيدى. ولاردىڭ ايتۋىنشا، ولار ۇيىنەن شىقپايدى-مىس.

ءبۇلدىرشىن بالاباقشاعا بارمايدى. ەرلى-زايىپتىلار بۇدان بۇرىن قىلمىس جاساپ، جاۋىزدىق كورسەتۋ دەرەگىمەن كوزگە تۇسپەگەن. قاراعاندى قالاسىنىڭ ءبىلىم بولىمىندەگىلەر بۇل جايتتى ەستي سالا، قىز بالانىڭ وتباسى مۇشەلەرىمەن سويلەسىپ، ءىستىڭ اق-قاراسىن انىقتاپ جاتقانىن ايتتى.

قالالىق ءبىلىم ءبولىمى قورعانشىلىق جانە قامقورشىلىق سەكتورىنىڭ مەڭگەرۋشىسى اسەم ەريشوۆا:

«ءقازىر مەن جىبەرگەن ارنايى مامان اتالعان وتباسىنىڭ ۇيىندە. قىزدىڭ اناسى جايتقا قاتىستى تۇسىنىكتەمە جازىپ بەردى. ال پوليسيا دەپارتامەنتىندەگىلەر بۇل وتباسى مۇشەلەرىنىڭ بۇرىن ءىستى بولماعانىن ايتتى. بالانى ءبىز تەمىرتاۋ قالاسىنىڭ كامەلەت جاسىنا تولماعاندارعا ارنالعان ورتالىعىنا جىبەرەمىز. وندا وعان پسيحولوگيالىق كومەك كورسەتىلەدى. اناسىنا اكىمشىلىك جازا قاراستىرىلاتىن بولادى.»،- دەيدى.

بالاسىنا قورلىق كورسەتكەن ايەل انالىق قۇقىعىنان ايىرىلا ما، جوق پا، ول جاعى ازىرگە بەلگىسىز. ماماندار ءقازىر وتباسىنىڭ الەۋمەتتىك جاڭدايىن انىقتاپ، قىزدىڭ ناقتى كىمنەن جانە قاشان ءزابىر كورگەنىن دالەلدەمەك.