قولىنا پلاكات ۇستاپ شىققان قوستانايلىق ستۋدەنتتى پوليسيا ءۇش ساعات قاماۋدا ۇستادى دەپ حابارلايدى Qamshy.kz اقپارات اگەنتتىگى "ناشا گازەتا" سايتىنا سىلتەمە جاساپ. 

قوستاناي قالاسىندا 17 ماۋسىم كۇنى وبلىستىق اكىمدىك عيماراتى ماڭىندا “مەنىڭ داۋىسىم ۇرلاندى” دەگەن پلاكاتپەن ستۋدەنت پيكەت وتكىزگەن. ءمادي ءابدىراحمانوۆ سايلاۋ ناتيجەسىنىڭ بۇرمالانعانىن ايتىپ، جازۋى بار پلاكاتپەن الاڭعا شىققان. ول الاڭدا ەكى ساعات تۇرۋدى جوسپارلاعان. 

الايدا، بەس مينۋتتان سوڭ پوليسيا قىزمەتكەرلەرى كەلىپ، بىرنەشە سۇراق قويىپ، ستۋدەنتتى قالالىق بولىمشەگە ۇستاپ اكەتتى. سونداي-اق، پلاكاتتا ماۋسىم ايىنىڭ باسىندا قۇرىلعان #وyan،Qazaqstan جاستار قوزعالىسىنىڭ اتى جازىلعان حەشتەگ تە بولعان. ول ەلدە پارلامەنتتىك رەسپۋبليكا قۇرىپ، دەموكراتيالاندىرۋ ءۇردىسىن جالعاستىرۋدى كوزدەيتىن جاستار قوزعالىسىن قولدايتىنىن ءبىلدىردى.

ءمادي وتكەن تۇندە اتىراۋدان كەلگەن. ول سول جەردە بايقاۋشى بولعانىن ايتقان. 

"مەن پوەزدە كەلە جاتىپ، بۇگىن پيكەتكە شىعامىن دەگەن ويدا بولدىم. ۋنيۆەرسيتەتتەگى تانىستارىم مەن دوستارىم بۇل ويدان باس تارتۋىمدى سۇرادى. ولار جاعدايدى وزگەرتە الاتىندارىنا سەنبەيدى. ويتكەنى ولاردىڭ بارلىعى قوسانوۆقا داۋىس بەردى"، - دەپ مالىمدەدى ءمادي ابدراحمانوۆ.  

«ءۇش ساعاتقا جەتپەي بوساتتى. سوندىقتان حاتتاما تولتىرماي، جىبەرە سالدى. نە ءۇشىن، قالاي، قانداي ماقساتپەن شىققانىمدى سۇرادى. پيكەت تىنىش ءوتتى. ەشكىمدى وقۋدان شىعارعان جوق، قىزمەتتەن كەتىرگەن جوق»، - دەپ ايتتى ءمادي.

"ەندىگارى حالىقتى وسىنداي سيركپەن الداي المايسىڭ»، - دەپ ستۋدەنت بيلىكتىڭ نازارىن اۋدارتۋ ءۇشىن وسىندا كەلگەنىن ايتادى. 

ءمادي بيلىكتەگىلەردىڭ قىسىمىنان قورىقپايتىنىن جانە اكىمشىلىك قاماۋدا وتىرۋعا دايىن ەكەنىن، ايىپپۇل تولەۋدەن دە قاشپايتىنىن مالىمدەدى.