ماڭعىستاۋلىق لاۋرا تۇرعانبايەۆا وتكەن ايدا عانا «باستاۋ» جوباسى بويىنشا كاسىپكەرلىك كۋرسىن ءتامامداعان. ءبىر ايلىق وقۋ بارىسىندا بيزنەستى باستاۋ جانە سونى ساۋاتتى جۇرگىزۋ، سالىق تولەمدەرى مەن نەسيە، كاسىپتىڭ كىرىسى مەن شىعىنىن دۇرىس ەسەپتەۋ سىندى ءتۇرلى ادىستەردى تولىق مەڭگەردى. بۇرىن اعىلشىن ءتىلى ءمۇعالىمى بولىپ ەڭبەك ەتكەن ول كەيىنگى جىلدارى جۇمىسسىز قالعان ەدى. قول قۋسىرىپ وتىرعانشا اۋىلدىڭ قىز-كەلىنشەكتەرىن ارلەۋگە ىنتا بىلدىرە باستادى. كاسىپ اشىپ، ەلدەن ەرەكشە قىزمەت كورسەتەتىن سۇلۋلىق سالونى بولعانىن ارماندادى. اسقاق ارمانى الدامادى. ءۇش بالانىڭ اناسى وتباسىمەن كاسىپتى قاتار الىپ جۇرۋگە بەل بايلادى. ءسويتىپ، مۇنايلى اۋدانىنىڭ قىزىلتوبە اۋىلىنان ەلدى مەكەندە وعان تەڭ تۇسەر باسەكەلەسى جوق سۇلۋلىق ستۋدياسىن سالتاناتتى تۇردە اشتى. 10 ادامدى تۇراقتى جۇمىسپەن قامتاماسىز ەتتى.

ءسان-سالتاناتى كەلىسكەن سالوندا جوعارى دەڭگەيدە قىزمەت كورسەتىلەدى. شاش قيۋ مەن ساندەۋ، بەت ارلەۋ، تىرناق پەن قاس رەتتەۋ سياقتى قىز-كەلىنشەكتەرگە قاجەتتى قىزمەت ءتۇرىنىڭ ءبارىن جاسايدى. سالون سوڭعى ۇلگىدەگى جيھازدارمەن جابدىقتالىپ، جاڭا ءارى وزىق تەحنيكامەن جاراقتانعان.بۇل كاسىپتىڭ باسقالاردان ارتىقشىلىعى دا سوندا.جاس كاسىپكەردىڭ ايتۋىنشا، جۇمىسشىلاردىڭ جالاقىسى مەن عيماراتتىڭ جالداۋ تولەمىن قوسپاعاندا ايىنا شامامەن 250 مىڭ تەڭگە تابىس تابۋدى كوزدەپ وتىر. ساپالى قىزمەت كورسەتۋ ارقىلى تۇتىنۋشى سانىن ارتتىرماساق، كەمىتپەيمىز دەگەن سەنىمدەمىز،- دەيدى ول.

لاۋرا ستۋدياسىنا تۇتىنۋشىلاردى الدىن الا جازىلۋ ارقىلى قابىلدايدى. ءوزى بارلىق قىزمەت ءتۇرىن يگەرگەن حاس شەبەر. جۇمىسشىلارىنىڭ كوبىن ءوزى ۇيرەتىپ، وقىتىپ العان. مۇندا قىزمەت قۇنى دا قالادان الدەقايدا ارزان. اۋىلعا ارنالعان باعانى ۇستاپ تۇرمىز،- دەيدى شەبەرلەر.

«قىز-كەلىنشەكتەردىڭ ۋاقىتىن ۇنەمدەۋ ماقساتىندا تۇتىنۋشىعا ءبىر مەزگىلدە بىرنەشە قىزمەت كورسەتىپ، حانىمداردى ادام تانىماستاي جارقىراتىپ شىعارىپ سالامىز.ءار سالانىڭ شەبەرلەرى بولەك بولعاندىقتان جىلدام ءارى ساپالى جۇمىس جاسالعانىن قاتاڭ قاداعالايمىن»،- دەپ ويىمەن ءبولىستى لاۋرا تۇرعانبايەۆا.

ەندى مۇنداي سۇلۋلىق ستۋديالارىنىڭ قاتارىن اۋدان بويىنشا كوبەيتۋ جوسپاردا بار. اۋىلدىڭ قىز-كەلىنشەكتەرى ورتالىقتا، قالادا كورسەتىلەتىن جوعارى ءارى ساپالى قىزمەتتەردى اۋىلدان ۇزاماي، الىسقا سابىلماي-اق وسىننان الاتىن بولادى.