سەمەيدە حالىقارالىق «SemeySummerFest» فەستيۆالى اياسىندا قايىرىمدىلىق ۆەلوجارىسى ءوتىپ، ودان تۇسكەن قاراجات ارىس قالاسىنا كومەك رەتىندە جىبەرىلدى دەپ حابارلايدى Qamshy.kz اقپارات اگەنتتىگى.
اتالعان فەستيۆالگە قاتىسۋشى جاستاردىڭ قاراسى كوپ بولدى. ولاردىڭ قاتارىندا كاسىبي سپورتشىلارمەن قاتار، اۋەسقوي ۆەلوشاباندوزدار دا سىنعا ءتۇستى. جيىنى وتىزدان استام سايىسكەر پاۆلودار-سەمەي تاس جولىنىڭ بويىنداعى قاراعايلى اۋدانىنان قاسيەتتى باستاۋعا دەيىن 25 شاقىرىم جولدى ءجۇرىپ ءوتتى.
– «SemeySummerFest» فەستيۆالى اياسىندا قايىرىمدىلىق ۆەلوجارىسىن وتكىزدىك. وعان كەز كەلگەن ادامنىڭ قاتىسۋىنا مۇمكىندىك بەردىك. شەكتەۋ قويعان جوقپىز. تەك قاتىسۋشىلاردىڭ دايىندىعى بولۋى تالاپ ەتىلدى. ويتكەنى بەلگىلەنگەن قاشىقتىق جاقىن جەر ەمەس. قايىرىمدىلىق جارىسىنان تۇسكەن اقشانى ارىسقا جىبەرەمىز، – دەدى ۆەلوبايگەنى ۇيىمداستىرۋشىلاردىڭ ءبىرى يۆان بابۋحين.
سونىمەن قاتار اتالعان فەستيۆال اياسىندا سپيدكۋبينگ پەن شاحماتتان سايىستار ءوتىپ، ءتۇرلى كونكۋرستار، ۇتىس ويىندارى ۇيىمداستىرىلدى. ۇتىستان تۇسكەن قاراجات تا اپات بولعان ارىس قالاسىنا جولداندى.
بيىل تۇڭعىش رەت وتكىزىلگەن «SemeySummerFest» فەستيۆالى الداعى ۋاقىتتا ءداستۇرلى شاراعا اينالماق.
پىكىر قالدىرۋ