شىعىس قازاقستاندا كيەلى جەرلەرگە تۋريستەردى تارتۋ بويىنشا اۋقىمدى جۇمىستار قولعا الىنىپ جاتىر. بۇل ىشكى ءتۋريزمنىڭ دامۋىنا تىڭ سەرپىن بەرمەك دەپ حابارلايدى Qamshy.kz اقپارات اگەنتتىگى.  

وبلىستىڭ تۋريزم باسقارماسىنىڭ باسشىسى مارات قاباقوۆتىڭ ايتۋىنشا، اباي اۋدانىنداعى قوڭىر اۋليە ۇڭگىرىنىڭ ءىشىن جوندەۋگە 25 ملن. تەڭگە قاراجات ءبولىنىپ، تولىق يگەرىلگەن. قازىرگى كۇنى قازاقستاندىق ينۆەستور ۇڭگىردىڭ قاسىنان 25 ورىنعا شاقتالعان ءقوناقۇي قۇرىلىسىن باستاعان.     

ءدال وسىنداي جۇمىستار تارباعاتاي اۋدانىنداعى ىرعىزباي اتا كەسەنەسىندە دە جۇرگىزىلگەن. ماسەلەن، كەسەنەنىڭ اۋماعىن اباتتاندىرۋعا 50 ملن. تەڭگە ءبولىنىپ، ورنىمەن جۇمسالعان.  

– كەيىنگى جىلدارى ءوڭىردىڭ تۋريزم سالاسىنا شەتەلدىك ينۆەستورلاردىڭ كەلۋى قارقىن الا باستادى. ناقتى دەرەكتەرگە سۇيەنسەك، الدىڭعى جىلدارمەن سالىستىرعاندا بىلتىر بۇل كورسەتكىش 25 پايىزعا ءوستى. الايدا ءبىز ءقازىر ىشكى تۋريزمگە كوڭىل ءبولىپ وتىرمىز. اسىرەسە، ەلىمىزدىڭ كيەلى جەرلەرىنىڭ تىزىمىنە ەنگەن قاسيەتتى ورىندارعا باسىمدىق بەرىلۋدە، – دەپ اتاپ ءوتتى باسقارما باسشىسى. 

وسى ورايدا باسقارما باسشىسى ىشكى ءتۋريزمدى ىلگەرى باستىرۋدا «رۋحاني جاڭعىرۋ» باعدارلاماسى اياسىندا جۇزەگە اسىرىلىپ كەلە جاتقان «ادەبي شىعىس» جوباسىنىڭ بەرەرى مول ەكەنىن ايتتى.  

ەستەرىڭىزگە سالا كەتەيىك، «ادەبي شىعىس» جوباسىنىڭ ماقساتى مەكتەپ وقۋشىلارىنا ءوڭىردىڭ كيەلى جەرلەرىن، مادەني، تاريحي ورىندارىن ارالاتىپ، اباي، شاكارىم، مۇحتار سياقتى الىپتاردىڭ تۋعان مەكەنىنە ساياحات ۇيىمداستىرۋ.