الاكولگە دەمالۋعا بارعان اعايىندا ەندى «ءۇرجار حانشايىمى» مەن «التىن ادام» قارسى الاتىن بولادى. شىعىس قازاقستان وبلىسىنىڭ ءۇرجار اۋدانى، قابانباي اۋىلىندا اشىلعان مۋزەي وسىعان مۇمكىندىك بەرىپ وتىر دەپ جازادى Qamshy.kz اقپارات اگەنتتىگى.  

ەسكە سالا كەتەيىك، الاكول تاريحىنداعى العاشقى مۋزەي وبلىس اكىمى دانيال احمەتوۆتىڭ تاپسىرماسىمەن «رۋحاني جاڭعىرۋ» باعدارلاماسى اياسىندا اشىلعان-دى. ونداعى نەگىزگى ماقسات – شيپالى كولگە دەمالۋعا كەلگەن تۋريستەرگە ەلىمىزدىڭ، ونىڭ ىشىندە شىعىس قازاقستاننىڭ تاريحي جانە مادەني ەرەكشەلىكتەرىمەن كەڭىنەن تانىستىرۋ. سونىمەن قاتار مۋزەيدەگى جادىگەرلەر ارقىلى تۋعان ولكەنىڭ جاۋھارلارىن ناسيحاتتاپ، باعاسىن ارتتىرۋ، وسكەلەڭ ۇرپاقتىڭ بويىنا ءپاتريوتيزمدى ءسىڭىرۋ. 

جاڭادان اشىلعان مۋزەيدە بارلىعى جەتى زال جۇمىس ىستەيدى. اتاپ وتسەك، «ءۇرجار حانشايىمى»، «ارحەولوگيا» جانە «شىعىس قازاقستاننىڭ كيەلى جەرلەرى»، «تاۋەلسىزدىك»، «ەتنوگرافيا»، «كوشپەندىلەر مادەنيەتى» مەن «پالەنتولوگيا جانە تابيعات» اتتى زالدار بار. بۇل زالداردىڭ ءبارى دە تاقىرىپقا ساي جادىگەرلەرمەن جابدىقتالعان. سەنسورلى كيوسك، QR-كود سەكىلدى جاڭا تەحنولوگيانىڭ كەرەمەتتەرى دە كادەگە جاراتىلعان. جالپى مۋزەيدە تاس داۋىرىنەن تارتىپ قازىرگى زامانعا دەيىنگى كەزەڭنەن سىر شەرتەتىن جادىگەرلەردى كەزدەستىرۋگە بولادى.