قۇرمانعازى اۋدانىنىڭ ازعىر وڭىرىنە گاز قۇبىرى تارتىلىپ، ىسكە قوسىلدى دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
شاراعا ارنايى قاتىسقان اتىراۋ وبلىسى اكىمىنىڭ ورىنباسارى ايبەك قرامبايەۆ سالتاناتتى تۇردە الاۋدى جاعىپ، ءوڭىردىڭ تۇرعىندارىن بۇگىنگى قۋانىشتارىمەن - ازعىر ءوڭىرىنىڭ كوگىلدىر وتىنمەن قامتىلۋىمەن قۇتتىقتادى.
-بۇگىنگى كۇن ازعىر ءوڭىرىنىڭ كوپتەن كۇتكەن مەرەيلى كۇنى. ق ر تۇڭعىش پرەزيدەنتى نۇرسۇلتان نازاربايەۆتىڭ شەكارا ماڭىنداعى اۋدانداردى دامىتۋ جانە سول ەلدەگى حالىقتىڭ تۇرمىسىن جاقسارتۋ تاپسىرماسى بويىنشا جوبا جۇزەگە اسۋدا. سول كەزدەگى وبلىس اكىمى بولعان باقتىقوجا ىزمۇحامەتوۆتىڭ باستاماسىمەن، قازىرگى تاڭدا ءوڭىر باسشىسى نۇرلان نوعايەۆ بۇل جۇمىستاردىڭ ءارى قاراي جۇزەگە اسۋىن قولعا الىپ، بۇگىندە ازعىر ءوڭىرى تولىق قاندى گازبەن قامتىلىپ وتىر. كوگىلدىر وتىن وسى وڭىردەگى حالىقتىڭ تۇرمىس-تىرشىلىگىنە، شاعىن جانە ورتا بيزنەستىڭ دامۋىنا سەپتىگىن تيگىزەتىنى ءسوزسىز، - دەيدى ايبەك قرانبايەۆ.
ازعىر وڭىرىنە گاز قۇبىرىن تارتۋ جۇمىستارى 2017 جىلى باستاۋ الىپ، قازىرگى تاڭدا تولىقتاي اياقتالدى. جوبا نكوك كومپانياسىنىڭ دەمەۋشىلىگىمەن ىسكە اسىرىلدى.
"بۇل اۋقىمدى جوبا. ازعىر وڭىرىنە تارتىلعان گاز قۇبىرىنىڭ ۇزىندىعى 365 شاقىرىم، سونداي-اق، اۋىلىشىلىك قۇبىرلار - 68 شاقىرىم. بارلىق تۇرعىنداردىڭ اۋلالارىنا گاز قۇبىرلارى تارتىلدى. ءارى قاراي ءار تۇرعىن ءوز ۇيىنە تارتۋ ءۇشىن قۇجاتتارىن رەتتەپ، قوندىراتىن بولادى. ازعىر وڭىرىنە كوگىلدىر وتىن تارتىلعاسىن، وبلىس بويىنشا گازبەن قامتۋ كورسەتكىشى 98،2 % كورسەتىپ وتىر"،- دەيدى اتىراۋ وبلىسى ەنەرگەتيكا جانە تۇرعىن ءۇي كوممۋنالدى شارۋاشىلىق باسقارماسىنىڭ باسشىسى مۇرات يعالييەۆ.
پىكىر قالدىرۋ