شىعىس قازاقستاندا كەلەر جىلى اتالىپ وتەتىن ۇلى اقىن اباي قۇنانباي ۇلىنىڭ 175 جىلدىق مەرەيتويىنا دايىندىق جۇمىستارى بۇگىننەن باستالىپ كەتتى دەپ حابارلايدى Qamshy.kz اقپارات اگەنتتىگى.
سونداي يگىلىكتى ءىستىڭ ءبىرى سەمەيدەگى اباي الاڭىن جاڭعىرتۋ بولماق.
قالانىڭ قاق تورىندەگى الاڭدى قايتا جابدىقتاۋ ماقساتىندا ەلوردادان ارنايى ديزاينەرلەر شاقىرتىلعان.
– سەمەي مەديسينا ۋنيۆەرسيتەتىنىڭ شاقىرتۋىمەن استانادان كاسىبي ماماندار كەلىپ، الاڭمەن تانىستى، كوردى. ەندى ولار بىزگە الاڭنىڭ جاڭا جوباسىن ۇسىنادى. ەگەر جوبا ءبىزدىڭ كوڭىلدەن شىقسا، قارجىلاندىرۋ ماسەلەسىن شەشەمىز، – دەيدى سەمەي قالاسىنىڭ اكىمى ەرماك ءسالىموۆ.
سونىمەن قوسا الاڭدا كۇزگە قاراي ريددەردەگى تۇقىم باقتان 40 شىرشا كوشەتىن اكەلىپ، وتىرعىزاتىن بولادى.
ەستەرىڭىزگە سالا كەتسەك، قالا اكىمدىگى مەن اتالعان جوعارى وقۋ ورنى اراسىندا جاسالعان مەموراندۋم بويىنشا اباي الاڭى مەديسينا ۋنيۆەرسيتەتىنىڭ قامقورلىعىنا بەرىلگەن.
پىكىر قالدىرۋ