وسكەمەندىك جاس عالىم نۇرلان دوسمۇرات اعاشتان ۇلتتىق ناقىشتا ويىنشىقتار جاسايدى. بۇگىندە ونى كوپشىلىك جۇرت قازاقى پازلدىڭ اۆتورى رەتىندە بىلەدى دەپ حابارلايدى Qamshy.kz اقپارات اگەنتتىگى. 

وسكەمەندەگى س.امانجولوۆ اتىنداعى شقمۋ-دا شەبەر بولىپ جۇمىس ىستەيتىن نۇرلان «Balausa» دەپ اتالاتىن ستارتاپ-جوبانىڭ اۆتورى. وسى جوبا ارقىلى ول وسكەلەڭ ۇرپاق بويىنا ۇلتتىق تالىم-تاربيەنى ءسىڭىرۋدى كوزدەپ وتىر. 

 – جوبانىڭ اتاۋىن ىرىمداپ «بالاۋسا» دەپ قويدىم. ونداعى ويىم ءتاي-تاي باسقان جاڭا كاسىبىمنىڭ بولاشاقتا كەرەگەسىن كەڭەيتىپ، ۇلتتىق ناقىشتاعى ويىنشىقتاردىڭ برەندىن قالىپتاستىرۋ. سول ءۇشىن تاۋلىگىنە 15 ساعاتقا دەيىن جۇمىس ىستەۋگە تۋرا كەلەدى. ناتيجەسى جامان ەمەس. العاشقى ونىمدەرىمدى ساتىپ الىپ جاتقاندار بار، – دەيدى جاس شەبەر.  

نۇرلاننىڭ نەگىزگى ماماندىعى – ءمۇعالىم. الايدا ول ۇستازدىقتان گورى قولونەردى تاڭداپ، ۇلتتىق ويىنشىقتاردى جاساۋمەن بەل شەشىپ اينالىسىپ ءجۇر.  

سونىمەن قاتار، قولونەر شەبەرى ۇلتتىق ناقىشتاعى كيىمدەر تىگىپ، القا، سىرعا، تۇمار، بىلەزىك سياقتى زەرگەرلىك بۇيىمداردى زاماناۋي ۇلگىدە جاساۋدى دا مەڭگەرىپ العان.