وزبەك شەكاراشىلارىنىڭ قازاق ازاماتىن اتىپ كەتۋى كەم دەگەندە ەكى نارسەنى اڭعارتاتىن سياقتى: 1. قازاق بيلىگىنىڭ ءوز ازاماتتارىنىڭ قۇقىعىن، ءتىپتى ءومىرىن قورعاۋداعى قاۋقارسىزدىعى. قورعاۋ مىندەتتى تۇردە سوعىس اشۋ، ديپلوماتيالىق قاتىناستاردى ءۇزۋ دەگەن ءسوز ەمەس، ارينە. ءبىراق ەلشىلىكتىڭ، سىرتقى ىستەر مينيسترلىگىنىڭ بىرەگەي، تاباندى پوزيسياسىن تالاپ ەتەتىن وقيعا. اتىلعان ازاماتتىڭ ارتىندا تۋعان-تۋىسى بار، سولارعا جاعداي جاساۋ، قۇن ءوندىرۋ دەگەن دە بار. ەڭ جامانى - ءبىزدىڭ بيلىك ءۇشىن اد
ام ءومىرى شىبىن قۇرلى جوق. ال شىنايى دامىعان قوعامنىڭ، دۇنيەدەن وتكەن ازاماتتىڭ جەرلەسى ءال-فارابي ايتىپ كەتكەن "قايىرىمدى قالانىڭ" باستى قۇندىلىعى ادام مەن ونىڭ ءومىرى ەمەس پە؟ كونستيتۋسيامىزدا بادىرايتىپ جازىلعان باستى قاعيدات وسى ەمەس پە؟ ەلىمىزدىڭ ءالى دە بولسا توتاليتارسىزدانباعانىنىڭ، كەڭەس يدەولوگياسى قالىپتاستىرعان ادامدى تەك جانسىز تەتىك، قۇقى جوق قۇل ساناۋ يدەولوگياسىنىڭ كەسىرى.
2. قازاق پەن وزبەك قارىم-قاتىناستارىنىڭ ناشارلاي باستاعانى ما دەپ قورقامىن. نەگىزى، بايقاپ وتىرساق، وسىنداي قاقتىعىستار، اتىس-شابىس ەكى ەلدىڭ، دالىرەك ايتساق ەكى ەل بيلىگىنىڭ اراسى ناشارلاي باستالعاندا ورىن الىپ جاتادى. وزبەك شەكاراشىلارى تارتىپكە باعىنادى. ءبىراق، جوعارى جاقتان ناقتى تاپسىرمالار تۇسپەسە، اتساڭدار باستارىڭدى جۇلامىز دەگەندەي يشارات بولماسا، ولار دا شەكتەن شىعا باستايدى.
ايدوس سارىم، facebook
