بۇگىن ءبىلىم جانە عىلىم ۆيسە-مينيسترى تاحير بالىقبايەۆ 2015 جىلى مەملەكەتتىك ءبىلىم بەرۋ گرانتتارىنىڭ 75 پايىزى قازاق مەكتەبىن بىتىرگەن تۇلەكتەرگە بەرىلەتىندىگىن مالىمدەدى.

بيىلعى جىلى بولىنەتىن مەملەكەتتىك ءبىلىم گرانتتارىنىڭ سانى – 39 994. ونىڭ 32 168ء-ى باكالاۆريات، 7 241ء-ى ماگيستراتۋرا، ال قالعان 623ء-ى دوكتورانتۋراعا بولىنگەن. جىلداعى ادەت بويىنشا مەملەكەتتىك گرانتتاردىڭ باسىم كوپشىلىگى تەحنيكالىق ماماندىقتارعا بەرىلمەك. بيىلعى تەحنيكالىق ماماندىقتاردىڭ ۇلەسى 42،4 پايىزدى قۇراپ وتىر.

«بيىلعى جىلدىڭ مەملەكەتتىڭ تاپسىرىسىنداعى باستى ەرەكشەلىك – گرانتتاردىڭ وقۋ تىلىنە بايلانىستى بولىپ وتىر. مەملەكەتتىك گرانتتاردىڭ 75 پايىزى قازاق بولىمىنە جانە 25 پايىزى ورىس بولىمىنە بولىنەتىن بولادى. وسى ۋاقىتقا دەيىن گرانتتار ەكى تىلگە شامالاس پروپورسيامەن ءبولىنىپ كەلدى. ءبىراق ەندى مەكتەپ بىتىرۋشىلەردىڭ ۇلەسى بويىنشا، قازاق مەكتەبىن بىتىرگەندەر ورىس مەكتەبىن بىتىرگەندەردەن باسىم. سوندىقتان وسىنداي شەشىمگە كەلدىك»، – دەپ ۆيسە-مينيستر تاعى ءبىر جاڭالىقپەن ءبولىستى. ايتا كەتەيىك، بيىلعى جىلى 62 384 وقۋشى ۇبت-نى قازاق تىلىندە تاپسىرسا، 25 398ء-ى ورىس تىلىندە تاپسىرعان بولاتىن.