«تەڭىزشيەۆرويل» كومپانياسى  «گيدروبيولوگيا جانە ەكولوگيا ينستيتۋتى» جانە «ەكوماڭعىستاۋ» ۇيىمىمەن بىرلەسىپ كاسپيي تەڭىزىندەگى لاقتىرىلعان اۋلاردى جيناۋ بويىنشا جوبانى ىسكە قوسپاق. بۇل تۋرالى جوعارىدا اتالعان ەكى ۇيىمنىڭ ديرەكتورى  - ءميىرعالي بايمۇقانوۆ پەن كيريلل وسين ءمالىم ەتتى.

-“لاقتىرىلعان اۋلار بالىقتاردى قوسا العاندا، يتبالىقتاردىڭ، سونداي-اق تەڭىز جاعالاۋىندا دەمالىپ جاتقان ادامداردىڭ دا ومىرىنە ءقاۋىپ ءتوندىرۋى مۇمكىن. وسى ءقاۋىپتى فاكتورلاردى ەسكەرتۋگە جانە جويۋعا باعىتتالعان شارانى ىسكە اسىرۋ كاسپيي يتبالىعىنىڭ پوپۋلياسياسىن جانە جالپى تەڭىزدەگى  بيوالۋانتۇرلىلىكتى ساقتاۋدا  پايدا اكەلەدى دەپ كۇتىلۋدە» – دەيدى «گيدروبيولوگيا جانە ەكولوگيا ينستيتۋتىنىڭ» ديرەكتورى ءميىرعالي بايمۇقانوۆ.

مامانداردىڭ ايتۋىنشا، لاقتىرىلعان اۋلار مەن قوقىستار يتبالىقتاردىڭ ولىمىنە نەگىزگى سەبەپشى فاكتورلاردىڭ ءبىرى.  تاستالعان اۋ قالدىقتارى يتبالىقتاردىڭ دەنەسىنە جابىسىپ، زاقىم كەلتىرەدى، سوڭىندا ولاردىڭ ولىمىنە الىپ كەلەتىن جاعدايلار تىركەلگەن.  بۇعان 2015-2018 جىل ارالىعى  كاسپيي تەڭىزىندەگى يتبالىقتارعا جۇرگىزىلگەن زەرتتەۋ بارىسى دالەل. مونيتورينگ وزگە دە قالدىقتاردىڭ كوپتەپ تاستالىناتىنىن كورسەتكەن. 

-«جوبا  2019-2021 جىلدار ارالىعى ىسكە اسىرىلادى. وسى ۋاقىت ارالىعىندا ۇەۇ كومانداسى مەن وزگە دە تاراپتار  تەڭىز سۇتقورەكتىلەرىن قۇتقارۋشىلاردى دايىنداۋ  كۋرستارىنا قاتىسىپ، يتبالىقتاردى جانە بەكىرە تۇقىمداس بالىقتاردى اۋلاردان قۇتقارۋ ادىس-تاسىلدەرىن ۇيرەنبەك. كاسپيي تەڭىزىنىڭ جاعالىق سىزىعىن جانە سۋ بولىگىن تازارتۋ بويىنشا كەڭ ناۋقان وتكىزىلەدى. سونداي-اق، كاسپيي تەڭىزى جاعالاۋىنىڭ قازاقستاندىق بولىگىنە  مونيتورينگ جاساۋ، تەڭىزدى لاقتىرىلعان جانە يەسىز اۋلاردان تازارتۋ ءۇشىن مۇددەلى تاراپتارعا جەدەل اقپارات ۇسىنۋ، جارالانعان يتبالىقتارعا ساناق جۇرگىزۋ جانە ولاردى قورعاۋ  جۇمىستارى دا ىسكە اسپاق» -  دەيدى ماماندار.