قازاقستاننىڭ «اق جول» دەموكراتيالىق پارتياسى ماڭعىستاۋ وبلىستىق فيليالى جانىنداعى «اق جول-جاستار» جاستار قاناتى نۇر-سۇلتان قالاسىنداعى ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىندە كسرو جانە قسر حالىق اعارتۋ ءىسىنىڭ وزىق قىزمەتكەرى، بەلگىلى تاريحشى، مۇراعاتشى-عالىم، اۋدارماشى، قازاقستان جازۋشىلار جانە جۋرناليستەر وداعىنىڭ مۇشەسى، 400-دەن استام مۇراعاتتىق زەرتتەۋ ماقالالارىنىڭ اۆتورى زيادا يجان ۇلىنىڭ «اششى ساباقتار»، «اسىل قازىنا»، «جارالى جىلدار»، «مانگىشلاك»، «تۋرگايسكيي وبلاست»، «توبانياز»، «الامەسەك»، «الاساپىران»، «اسىل مۇرا» «تاركىلەۋ قاسىرەتى» اتتى 10 تومدىق كىتاپتارىنىڭ تۇساۋكەسەرىن وتكىزدى.

«رۋحاني جاڭعىرۋ» اياسىندا وتكەن جيىنعا ەۋرازيا ۇلتتىق ۋنيۆەرسيتەتىنىڭ پروفەسسور-وقىتۋشىلارى، ز.يجانوۆتىڭ ۇرپاقتارى، ستۋدەنتتەر مەن ماگيسترانتتار، نۇر-سۇلتان قالاسىندا تۇراتىن زيالى قاۋىم وكىلدەرى، قازاقستاننىڭ «اق جول» دەموكراتيالىق پارتياسىنىڭ باسشىلارى جانە بۇقارالىق اقپارات قۇرالدارىنىڭ وكىلدەرى قاتىستى.

اتالمىش شارا تىزگىنىن ەۇۋ-دىڭ الەۋمەتتىك-مادەني دامۋ جونىندەگى پرورەكتورى، ق ر ۇعا اكادەميگى ديحان قامزابەك ۇلى جۇرگىزىپ وتىردى.

-ىزدەۋشىسى جوق بولسا، كوپ نارسە ۇمىت قالادى. ارتىندا قالعان ماتەريالداردى جيناقتاپ، ۇرپاقتارى 10 تومدىق كىتاپ قىلىپ شىعارىپ، وقىرمان قاۋىمنىڭ يگىلىگىنە ۇسىنىپ وتىر. بۇل ۇلكەن ەڭبەك. وسىدان ەكى جىل بۇرىن ءتورت تومدىق كىتابىنىڭ تۇساۋكەسەر راسىمىنە كۋا بولعانىم بار،-دەدى ديحان قامزابەك ۇلى.

سودان كەيىن قاتىسۋشىلار مارقۇم زيادا يجان ۇلىنىڭ ءومىرى مەن شىعارماشىلىعىنا ارنالعان «مۇراعات ءىسىنىڭ مايتالمانى» اتتى دەرەكتى ءفيلمدى تاماشالاعان كوپشىلىك 10 تومدىق كىتاپتىڭ تۇساۋكەسەر راسىمىنە كۋا بولدى.

تۇساكەسەر راسىمگە «اق جول» دەموكراتيالىق پارتياسىنىڭ ءتوراعاسى ازات پەرۋاشيەۆ، ەلتاڭبا اۆتورى جانداربەك مالىبەكوۆ، ق ر ۇعا اكادەميگى راحمەتقاجى بەرسىمبايەۆ، فيلولوگ-عالىم شاكىر ىبىرايەۆ، اقىن، «اق جول» دەموكراتيالىق پارتياسى ءتوراعاسىنىڭ ورىنباسارى قازىبەك يسا جانە مارقۇمنىڭ اعايىن-تۋىستارى قاتىسىپ، زيادا يجانوۆتىڭ شىعارماشىلىعى تۋرالى كەڭىنەن اڭگىمەلەر قوزعادى.

-ءبىز بۇگىن ەلدىڭ تاريحى تۋرالى مول ماعلۇمات بەرەتىن قۇندى ەڭبەكتەردىڭ تۇساۋىن كەسىپ وتىرمىز. بايقاعانىم، مارقۇمنىڭ قۇجاتقا مۇقياتتىعى كەرەمەت بولعان. بۇل 10 تومدىق تاريحشى-زەرتتەۋشىلەرگە ازىق بولادى دەگەن ويدامىن. ەڭ باستىسى، كىتاپ عىلىمنىڭ اينالىسىنا ءتۇستى، وسىنداي ەڭبەككە مول تەر توككەن شىعارماشىل توپقا جانە ۇيىمداستىرۋشىلارعا ريزامىن، - دەدى كورنەكتى عالىم شاكىر ىبىرايەۆ.

شارادا ءسوز العان زيالى قاۋىم وكىلدەرى زيادا اعانىڭ رەسپۋبليكا ءۇشىن سىڭىرگەن ەڭبەگى مەن اباي قۇنانبايەۆتىڭ قولتاڭباسىن تاپقانىن ەرەكشە اتاپ ءوتتى. اسىرەسە ۇلى اقىننىڭ 175 جىلدىعىندا ابايدىڭ ءوز قولى مەرەيتويلىق تاڭبادا تۇرۋى كەرەك دەگەن دە ويلار ايتىلدى.

سونىمەن قاتار، جينالعان كوپشىلىك وسىنداي قۇندى ەڭبەكتى قولجەتىمدى قىلىپ، حالىققا سىيلاپ وتىرعان بالالارىنا العىس ءبىلدىرۋدى دە ۇمىتقان جوق.

شارا بارىسىندا تۇساۋى كەسىلگەن كىتاپتاردىڭ ءبىر پاراسى تاريحشى عالىمدار مەن ەۇۋ كىتاپحاناسىنا سىيعا تارتىلدى.