تۋعان جەردىڭ مەرەيىن ۇستەم ەتۋ ماقساتىندا «ادىرنا» ۇلتتىق-ەتنوگرافيالىق بىرلەستىگى مەن ازاماتتىق باستامالاردى قولداۋ ورتالىعى «تۋعان جەر» شىعارماشىلىق بايقاۋىن جاريالاعان ەدى. قاتىسۋشىلار «ۇزدىك ماقالا» ، «ۇزدىك پوەزيا» ، «ۇزدىك بەينەلەۋ ونەرى» ، «ۇزدىك ونەرتابىس» ، «ۇزدىك بەينەروليك» جانە «ۇزدىك ءداستۇرلى مۋزىكا ورىنداۋشىسى» نوميناسيالارى بويىنشا باقتارىن سىناي الادى. قاتىسۋشىلار تۋعان جەرىن جىرعا قوسىپ، كوركەم سوزبەن ورنەكتەپ، ال ءبىرى سۋرەت ارقىلى وتانىمىزدىڭ بايلىعىن كورسەتۋگە تىرىسۋدا. «ۇزدىك بەينەلەۋ ونەرى» نوميناسياسى بويىنشا كەلىپ تۇسكەن ەڭبەكتەر سانى كۇننەن كۇنگە ارتۋدا. «تۋعان جەرىم – قازاقستانىم»، «اۋىل كورىنىسى»، «پەيزاج»، «تۋعان جەر»، «اۋىلىم – التىن بەسىگىم»، «ۇلىتاۋ – ۇلت ۇياسى»، «كوكشەتاۋ»، «ەل وردام – نۇر-سۇلتان»، «التىن وردام – اتىراۋىم»، «قىزىلوردا»، «قازاق قىزى»، «قازاقستان – مەنىڭ وتانىم»، «قىران قۇس»، »بايتەرەك»، ت.ب. سىندى كوپتەگەن سۋرەتتەر تۋعان جەردىڭ بەينەسىن ءسوزسىز سيپاتتاپ بەرۋدە.
بىرىنەن ءبىرى اسىپ تۇسەتىن سۋرەتتەر ادامدى تاڭ قالدىرماي قويماسى انىق. ماسەلەن، ۇياسىنا باتىپ بارا جاتقان كۇن، ونىڭ ءتىپتى تۋعان جەردى قيماي تۇرعان بەينەسىنىڭ ءوزىن اسەرلى بەينەلەي بىلگەن. ال تۋعان جەرىندە ەركىن قالىقتاپ ۇشىپ جۇرگەن قىران قۇس، جايقالا وسكەن ماۋەلى اعاشتار، الاڭسىز التىباقان ويناپ جۇرگەن جىگىتتەر مەن قىزدار، اناسىنىڭ قۇشاعىندا ەركىن ۇيىقتاپ جاتقان ءسابي، جەلماياسىنا مىنگەن اسان قايعى سەكىلدى قاريانىڭ نۇر-سۇلتان جەرىنە تۇراقتاپ، قاراپ تۇرعاندىعى، ءۇش ءجۇزدىڭ باسىن قوسقان ابىلاي حان بەينەسى، تۋعان جەرىنە بار مەيىرىمىمەن، ونى قاتتى جاقسى كورەتىندىگىن كوزىنەن اڭعارتاتىن قازاق قىزىنىڭ بەينەسىن عاجاپ بەينەلەي بىلگەن. قورقىت اتا، اباي قۇنانباي ۇلى، عابيت مۇسىرەپوۆ سىندى تۇدلعالار بەينەسىن اشا بىلگەن قاتىسۋشىلار تالابى ادامدى قىزىقتىرماي قويمايدى. وسى ەڭبەكتەردىڭ وزىنە قاراپ-اق وتانىمىزدىڭ جاس سۋرەتشىلەرىنىڭ جۇرەگىندەگى پاتريوتتىق سەزىمنىڭ بارىن بىلەمىز. وسە بەر، وركەندەي بەر، جاس تالاپكەر!
"ادىرنا" ۇلتتىق-ەتنوگرافيالىق بىرلەستىگى
پىكىر قالدىرۋ