مەملەكەت باسشىسىنىڭ ۇستىمىزدەگى جىلدىڭ اقپان ايىندا ۇكىمەتكە بەرگەن تاپسىرماسىن ورىنداۋعا سايكەس جاسالعان شارالار جوسپارىنىڭ 87-بولىگىن ورىنداۋ ماقساتىمەن ۇلتتىق بانك تۇرعىنداردىڭ يپوتەكالىق قارىزدارىن «ايرىقشا كەزەڭدە» قايتا قارجىلاندىرۋ باعدارلاماسىن بەكىتكەن بولاتىن. «قايتا قارجىلاندىرۋ» (رەفينانسيروۆانيە) دەگەننىڭ بۇل جەردەگى ماعىناسى – قارىزدى قايتارۋ شارتتارىن قايتا قاراۋ دەگەنگە سايادى.
بۇل باعدارلامانىڭ ماقساتى بورىشكەرلەردىڭ قالىڭ توبىنا يپوتەكالىق قارىزدارىن قايتارۋ شارتىن مۇمكىندىگىنشە جەڭىلدەتۋ بولاتىن. باعدارلامانىڭ قامتۋىنا 2004 جىلدان باستاپ 2009 جىلعا دەيىنگى مەرزىمدە يپوتەكالىق قارىزبەن ءتۇرعىنۇي العاندار ەنگىزىلگەن. ءقازىر وسى جەڭىلدىكتى الۋ ءۇشىن حالىق وزدەرى نەسيە العان بانكتاردىڭ ەسىگىن توزدىرۋدا. ال ەندى بانكتىق وپەراسيالار جاساۋ قۇقىنان ايرىلىپ، ليسەنزياسى قايتىپ الىنعان «بتا-يپوتەكا» اق جانە «استانا-فينانس يپوتەكا» اق سياقتى قارجىلىق ۇيىمداردان نەسيە العاندار وسى جەڭىلدىكتى پايدالانۋ ءۇشىن قايدا بارۋى كەرەكتىگىن بىلمەي دال بولۋدا ەكەن.
قايدا بارارىن بىلمەگەن ولاردىڭ ءبىرازى وزدەرىنىڭ قۇقىقتارى مەن مۇددەلەرىن قورعاۋدى ءوتىنىپ «قازاقستاننىڭ حالىقتىق كوممۋنيستەر پارتياسى» كەڭسەسىنىڭ ەسىگىن توزدىرعان كورىنەدى. بۇل تۋرالى ءماجىلىستىڭ بۇگىنگى، سوڭعى پلەنارلىق وتىرىسىندا دەپۋتات ايقىن قوڭىروۆ جاريالاپ، وسى ازاماتتاردىڭ جەڭىلدىك الۋىن شەشىپ بەرىڭىز دەپ ۇلتتىق بانكتىڭ ءتوراعاسى قايرات كەلىمبەتوۆتىڭ اتىنا دەپۋتاتتىق ساۋال جولدادى.
جوعارىدا اتالعان ۇيىمداردىڭ بانكتىق وپەراسيالار جاساۋ قۇقىنان ايرىلعانىنا تۇتىنۋشىلار كىنالى ەمەس. كەزىندە ولار دا ۇلتتىق بانكتان ليسەنزيا الىپ، جۇمىس ىستەپ تۇردى، سوندىقتان حالىق ولارعا سەنىپ، نەسيە الدى. دەمەك، حالىقتىڭ بۇل جەردە ەشقانداي كىناسى جوق، سوندىقتان ولاردى جەڭىلدىك الۋ قۇقىنان ايىرماڭىز دەلىنگەن ساۋالدا.
سونىمەن قاتار دەپۋتات وزىنە بەلگىلى بولعان دەرەكتەرگە قاراعاندا ءقازىر سوت ورىنداۋشىلار كوپتەگەن وسىنداي بورىشكەرلەردى شىرىلداتىپ، سوتتىڭ شەشىمىمەن جالعىز ۇيلەرىنەن قۋىپ شىعىپ جاتقانىن ايتتى. ال ەگەر ۇكىمەتتىڭ جەڭىلدىگىن قولدانسا، ولاردىڭ ءبىرازى قارىزدارىن وتەۋ مۇمكىندىگىنە يە بولار ەدى دەيدى دەپۋتات. سوندىقتان وسى ەكى ۇيىمنان يپوتەكالىق نەسيە العانداردىڭ جەڭىلدىككە قول جەتكىزۋ تەتىكتەرىن تەز ارادا جاساۋىڭىزدى وتىنەمىن دەلىنگەن ساۋالدا.
بۇل ساۋالعا ا.قوڭىروۆپەن بىرگە ماجىلىستەگى قحكپ فراكسياسىنىڭ بارلىق مۇشەلەرى قول قويدى.
سەرىك ەلەۋ، ساراپشى
