قازاقستاننىڭ تۇڭعىش پرەزيدەنتى قورى اتقارۋشى ديرەكتورىنىڭ ورىنباسارى، كونستيتۋسيالىق كەڭەستىڭ بۇرىنعى ءتوراعاسى يگور روگوۆ قىزۋ تالقىلاعان "كادرلىق جارلىققا" قاتىستى پىكىر  ءبىلدىردى.

"قوس بيلىك تۋرالى ايتىلا باستاعاندا قوعامنىڭ رەاكسياسىنا كۇلكىم كەلدى. بۇل قانداي قوس بيلىك بولۋى مۇمكىن؟ كونستيتۋسيانىڭ 44-بابىنىڭ 20-تارماعىندا: "پرەزيدەنت قاۋىپسىزدىك كەڭەسى مەن باسقا كونسۋلتاسيالىق-كەڭەسشى ورگانداردى، قازاقستان حالقى اسسامبلەياسى جانە جوعارعى سوت كەڭەسىن قۇرادى" دەلىنگەن. ياعني، قاۋىپسىزدىك كەڭەسى – كونستيتۋسيالىق ورگان، ءبىراق ول كونسۋلتاسيالىق-كەڭەسشى ورگاندار قاتارىنا كىرەدى"، – دەدى كونستيتۋسيالىق كەڭەستىڭ ەكس-باسشىسى.

"بارلىعىنان ساياسي بيۋرو ەلەمەنتتەرىن كورۋ كەڭەستىك كەزەڭنەن كەلە جاتقان ادەت شىعار! پرەزيدەنت – بۇل جەكە دارا ورگان! بىزدە قوس بيلىك جوق! ال قاۋىپسىزدىك كەڭەسى قابىلدايتىن شەشىمدەر – باسشىلىعىندا ەلباسى تۇرعان القالى ورگان قابىلدايتىن شەشىمدەر" – دەي كەلە، روگوۆ ەۋروپا كەڭەسى ۆەنەسيا كوميسسياسىنىڭ مۇشەسى، گەرمانيالىق رولف مافاەلدىڭ ءسوزىن مىسالعا كەلتىردى.

"ول ماعان: "سىزدەر بۇل ماسەلەنى وتە جاقسى شەشىپسىزدەر: تۇڭعىش پرەزيدەنتتىڭ تاجىريبەسىن پايدالانىپ، تۇراقتىلىق پەن دەموكراتيالىق دامۋ جولىن ساقتاي وتىرىپ، ءارى قاراي دامي بەرەسىزدەر" دەدى. بۇل شەتەلدىك ساراپشىلاردىڭ بەرگەن باعاسى. سوندىقتان تاعى ءبىر مارتە بىزدە ەشقانداي دا قوس بيلىك جوق دەپ ايتقىم كەلەدى"، – دەپ ءوز ءسوزىن قورتىندىلادى ي.روگوۆ.

ەسكە سالساق، "قازاقستان رەسپۋبليكاسى پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى" جارلىققا قاتىستى پرەزيدەنتتىڭ باسپا ءسوز حاتشىسى بەرىك ءۋالي تۇسىندىرمە بەردى.

بەرىك ءۋالي: پرەزيدەنتتىڭ قۇزىرەتى كونستيتۋسيانىڭ 40-48 باپتارىندا انىق كورسەتىلگەن

بەرىك ءۋالي: تاعايىنداۋعا قاتىستى بارلىق شەشىمدەردى پرەزيدەنت قابىلدايدى