ەل جايلاۋعا  كوشكەندە...  وسى تىركەس جانىما سونداي جاعادى. كوشپەلى حالىقتىڭ ۇرپاعى بولعاندىقتان، جايلاۋ دەگەن ءسوزدى ەستي قالسام،  قانىمنىڭ تىتىرگەنگىش تالشىقتارى قوزعالىپ بارىپ، دارمەنسىزدىكتەن قايتا قۇلاي قالاتىنىن سەزىنەمىن. زامان وزگەرگەن. ساياسي جۇيە مەن ارپالىستاردىڭ كەسىرىنەن قازاق تا وزگەرگەن. ءبىز بۇرىنعى بابالارىمىزشا ەلدىڭ جايلاۋعا كوشۋىن ساعىنا كۇتپەيمىز. ءبىز ءۇشىن كوش سوندايلىق كوڭىلدى سالتانات بولۋدان قالعالى  قاشان؟ اقيقاتىندا قازاقتىڭ ءداستۇرلى اندەرىنىڭ 80 پايىزىندا كوش سالتاناتى مىندەتتى تۇردە تىلگە تيەك بولادى. دەمەك، ول ۇعىم ءبىزدىڭ اجىراماس ءبىر بولىگىمىز بولعاندىعىن دالەلدەپ جاتۋدىڭ ءوزى ارتىق. قوس عاشىقتىڭ اراسىنداعى  قيماستىق نەمەسە  ساعىنىسىپ تابىسۋ سەكىلدى ماحاببات سيۋجەتتەرىنىڭ بارلىعى اۋىلدىڭ كوشىپ-قونۋىنا قاتىستى باياندالادى. ءبىز ءقازىر جيلاۋعا شىقپايمىز. جەلىدەگى قۇلىننىڭ كىسىنەگىنى مەن كولەڭكە ىزدەپ شىبىنداعان جىلقىنىڭ كورىنىسى كوز الدىمىزدا كولبەڭدەمەيدى. بۇگىنگى قازاقتىڭ جايلاۋى- انتاليا ، بودرۋم، الانيا، حاينان ارالدارى، تايلاند،

دۋباي مەن ابۋ-دابي. بايقاپ قاراساق، بۇرىنعى قازاققا قاراعاندا بۇگىنگى قازاقتىڭ كەڭىستىگى اجەپتەۋىر اۋقىمدالعان. جاز شىعا سالىسىمەن جۇلدىزدارىمىزدىڭ سول وڭىردە جۇرگەنىن جارىسا جازامىز. ۇكىمەتىمىز پەن قوس پالاتامىزدىڭ وكىلدەرى دە  «جايلاۋعا» شىعىپ كەتەدى. نە كەرەك، ءدال ءقازىر قازاق جەرى يەن دالادا يەسىز قالعان جالعىز ءۇي سەكىلدى. مۇندا قاراشا  حالىق قانا قالعان. قالعاندارىنىڭ بارلىعى جايلاۋعا شىعىپ كەتكەن.  بايدىڭ اسىن بايعۇس قىزعانىپتىنىڭ كەرى سەكىلدى اسەر قالدىرىپ وتىرعان بولارىمىن. ءبىراق مەن ۇققىم كەلەتىن ءبىر جاي بار. نەگە اتقا مىنگەن كوكەلەر مەن كوگىمىزگە كوتەرگەن جۇلدىزدارىمىز دەمالىسىن شەتەلدە وتكەرگەندى قۇپ كەرەدى؟ ءبىز ولاردى سونشالىقتى جالىقتىرىپ جىبەردىك پە؟ جىل بويى ماشاقات تارتقىزىپ، جاز كەلگەندە ءبىزدى كورگىسى كەلمەستەي «جايلاۋعا» تايىپ تۇراتىنى نەسى؟ ءبىزدىڭ ءدال وسى ۋاقىتتا يەسىز قالاتىنىمىزدى جاۋلارىمىز بىلە مە ەكەن؟ شەتەلدەگى جايلاۋ ولارعا دا، بىزگە دە پانا بولماسى حاق. ودان دا وسى ۋاقىتقا دەيىن سول جايلاۋعا شىعىندالعان قازاقستاندىق اقشالاردىڭ باسىن قۇراساق، الگى جاقتاعىلار ءبىزدىڭ جازعى قونىسقا اعىلار ەدى عوي. كول دەسەڭ كولى، ءشول دەسەڭ ءشولى بار قازاق جەرىنەن جەرىپ، نەگە باسقا جايلاۋعا كوش باستاپ كەتىپ قالا بەرەسىزدەر، كوكەلەر؟ مي قايناعان ىستىقتا امىركەن اقشانىڭ تەڭگەگە باتىرعان تىسىنە بايبالام سالا الماي ءبىز وتىرمىز. ال سىزدەردىڭ «جايلاۋداعى» جاعدايلارىڭىز قالاي، جاقسى ما؟

اينۇر تولەۋ