پرەمەر-مينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆ ۇكىمەت وتىرىسىندا قولما-قول اقشاسىز اۋدارىمدارىنا قاتىستى پىكىر ءبىلدىردى، دەپ جازادى قازاقپارات.
– اقشا اۋدارىمدارى بويىنشا كوميسسيا بولماعاندىقتان، پايدالانۋدىڭ ىڭعايلىلىعىنا بايلانىستى Kaspi سياقتى جەدەل اۋدارىم جۇيەلەرىنىڭ تۇرعىندار اراسىندا جانە بيزنەستە تانىمالدىعى ارتىپ كەلەدى. ارينە، قولما-قول اقشاسىز تولەمدەردىڭ ءوسىمى كولەڭكەلى ەكونوميكانىڭ تومەندەۋىنە ىقپال ەتەتىنىن ءتۇسىنىپ وتىرمىز. قارجى مينيسترلىگى مۇنداي اۋدارىمداردان ەشقانداي قوسىمشا تولەم نەمەسە سالىق الۋدى جوسپارلاپ وتىرعان جوق. اسىرەسە جەكە تۇلعالاردىڭ قولما-قول اقشاسىز اۋدارىمدارىن تەكسەرۋ – ەشقانداي جوسپاردا جوق، – دەيدى پرەمەر-مينيستردىڭ ءبىرىنشى ورىنباسارى.
ءاليحان سمايىلوۆتىڭ ايتۋىنشا، مينيسترلىك بانكتەرمەن بىرلەسىپ، قولما-قول اقشاسىز ەسەپ ايىرىسۋ ءۇشىن ىڭعايلى جانە زامانعا ينفراقۇرىلىمدى دامىتۋ جۇمىستارىن جۇرگىزىپ كەلەدى.
– ال كاسىپكەرلىك سالا اشىق بولۋى كەرەك. زاڭعا سايكەس كاسىپكەرلەر فيسكالدى تۇبىرتەك بەرىپ، 2020 جىلدىڭ 1 قاڭتارىنان باستاپ ونلاين-كاسسالىق ماشينالاردى پايدالانۋى ءتيىس. Kaspiء-دى كاسىپكەرلىك ماقساتتا پايدالانۋ – كاسىپكەرلەردى وسى مىندەتتەمەلەردەن بوساتپايدى. تۇتىنۋشىنىڭ قۇقىعىن قورعاۋ ءۇشىن تەكسەرۋدىڭ ماڭىزدى ەكەنىن ۇعىنۋ كەرەك، – دەيدى ول.
پىكىر قالدىرۋ