وقۋىن ءتامامداپ قولىنا ديپلومىن العان ءار جاس مامان جۇمىس جولىن قالادان باستاعىسى كەلەدى. الايدا، قالالى جەردەن بارىنە بىردەي جۇمىس تابىلا بەرمەسى انىق. وسىعان بايلانىستى بۇگىندە ۇلتتىق ەكونوميكا مينيسترلىگىنىڭ قولداۋىمەن «ديپلوممەن اۋىلعا» مەملەكەتتىك باعدارلاماسى قولعا الىنىپ، ونىڭ تيىمدىلىگىن ۋاقىتتىڭ ءوزى دالەلدەپ بەرگەندەي. باعدارلامانىڭ باستى ماقساتى ديپلومى بار جاستاردى اۋىلدى جەرلەرگە جۇمىسقا ورنالاستىرىپ، ونداعى مامان تاپشىلىعى ماسەلەسىن شەشۋ ەكەنىن ايتا كەتكەن ءجون.

اتالمىش باعدارلاما اياسىندا قورداي اۋدانىنا بيىل تۇرعىن ءۇي ساتىپ الۋعا 37 مامانعا 140 138 مىڭ تەڭگە قاراجات بولىنگەن. سونىمەن قاتار، اۋداندىق بيۋدجەتتەن كوتەرمە جاردەم اقى الەۋمەتتىك قولداۋ شارالارىنا 110 مامانعا 29519 مىڭ تەڭگە قارجى قاراستىرىلعان. ناتيجەسىندە، كوتەرمە جاردەماقى الۋعا 207 ادامنىڭ قۇجاتتارى قارالىپ، ونىڭ 95-نە وڭ شەشىم بەرىلگەن. ال، ناۋرىز ايىنان كۇنى بۇگىنگە دەيىن 75 جاس مامان 15379 مىڭ تەڭگە كوتەرمە جاردەم اقىلارىن العان. ونىڭ ىشىندە، ءبىلىم بەرۋ سالاسىنان 52، دەنساۋلىق ساقتاۋ سالاسى 14، اوك 5، سپورت سالاسىنان 2 مامان جاردەماقىعا يە بولعان. باسپانالى بولۋعا 107 ازامات قۇجات تاپسىرىپ، 51 جاس مامانعا وڭ شەشىم شىعارىلىپ، 35 ازامات تۇرعىن ۇيمەن قامتاماسىز ەتىلگەن. ال، بۇگىنگى كۇنگە تۇرعىن ۇيگە 28 جاس مامان ءوز كەزەگىن كۇتۋدە.

قالادان اۋىلعا قونىستانىپ، باعدارلامانىڭ باقىتىن سەزىنگەن جانداردىڭ ءبىرى ايبەك ۇشكەمپىر. ايبەك قازىرگى تاڭدا كەنەن اۋىلىنداعى №1 بالالار جانە جاسوسپىرىمدەر شىعارماشىلىعى ورتالىعىنىڭ ءمۇعالىمى. بۇگىندە باعدارلاما ارقىلى باسپانالى بولعان جاس مامان مەملەكەت تاراپىنان كورسەتىلگەن قولداۋعا ءدان ريزا.

بالا كەزىنەن سپورتقا جاقىن بولعان ايبەك مەكتەپتى اياقتاعان سوڭ سپورتشى بولامىن دەگەن ارمانىنان تانبايدى. ول الماتى ۋنيۆەرسيتەتىنە وقۋعا ءتۇسىپ، دەنە شىنىقتىرۋ ماماندىعىن تاڭدايدى. ستۋدەنتتىك شاقتى وتكەرىپ، قولعا ديپلوم العان تۇستا جاس مامانعا جۇمىس تابۋ وڭايعا سوقپايدى. قالاداعى ءومىر ۇناعانىمەن، جۇمىسسىز جانعا كۇن كورۋ وڭاي ەمەس. اكەدەن جاستايىنان ايىرىلعان ونى اۋىلداعى اناسى مەن باۋىرلارىنا قامقور بولسام دەگەن وي مازالايدى. بىردە وعان اناسى تەلەفون سوعىپ، وسى باعدارلاما تۋرالى ايتادى. مۇنداي مۇمكىندىكتى قالت جىبەرمەۋدى ويلاعان ايبەك قالا ءومىرىن ارتقا تاستاپ اۋىلعا اتتانادى.

ول كەزدە كەنەن اۋىلىندا بالالار جانە جاسوسپىرىمدەر شىعارماشىلىعى ورتالىعىنىڭ اشىلعانىنا كوپ بولا قويعان جوق ەكەن. ايبەك ءوزىنىڭ ماماندىعى بويىنشا دەنە شىنىقتىرۋ ءپانىنىڭ ءمۇعالىمى بولىپ جۇمىسقا ورنالاسىپ، «ديپلوممەن اۋىلعا» باعدارلاماسىمەن تانىسادى.

كەرەكتى قۇجاتتارىن جيىپ، اۋدان اكىمدىگىنە وتكىزەدى. وسىلايشا، باعدارلامانىڭ ارقاسىندا بۇگىندە اۋىلدان ءۇي الىپ، ەڭبەك ەتىپ ءجۇر.