شارانىڭ ماقساتى عاسىرلار بويى ۇزىلمەي كەلە جاتقان بايلانىستى ودان ءارى نىعايتۋ جانە باۋىرلاس ەكى ەل اراسىنداعى دوستىق قارىم-قاتىناستى، باۋىرلاس حالىقتارىمىزدىڭ جاقىنداستىعىن ودان ءارى تەرەڭدەتۋ.
20 قاراشا كۇنى ماڭعىستاۋلىق ونەرپازدار حيۋا قالاسىنا باردى. حيۋا قالاسىنداعى بەكەت اتا مىرزاعۇل ۇلى وقىعان مەدرەسەنى، بىرنەشە تاريحي ورىنداردى ارالادى.

21 قاراشا كۇنى مۇرات وسكىنبايەۆ اتىنداعى ماڭعىستاۋ وبلىستىق فيلارمونياسىنىڭ ءبىر توپ ارتىستەرى ۇرگەنىش قالاسىنداعى كوللەدج جانە مەكتەپ وقۋشىلارىنا ۆوكال، دومبىرا-تەنور، حورەوگرافيا ونەرىنەن ماستەر كلاستار وتكىزدى.

مادەني شارالار اياسىندا ءا.كەكىلباي ۇلى اتىنداعى ماڭعىستاۋ وبلىستىق تاريحي-ولكەتانۋ مۋزەيى «ۇلى دالا مۇرالارى» فوتوكورمەسىن ۇسىندى. كورمەدە قازاقستاننىڭ تاڭعاجايىپ تابيعاتى جانە كورنەكى جەرلەرى بەينەلەنگەن.

كورمەگە بارلىعى 32 فوتوجۇمىس قويىلدى، سۋرەتتەردە ماڭعىستاۋدىڭ تابيعي لاندشافتتارى، قازاقستان تابيعاتىنىڭ كەرەمەت كورىنىستەرى جانە وتانىمىزدىڭ جۇرەگى – ەلباسنىڭ بىرەگەي يدەياسىنىڭ جەمىسى – استانا قالاسىنىڭ كورىنىستەرى كورسەتىلدى.

سونىمەن قاتار، «ماڭعىستاۋ مەملەكەتتىك تاريحي-مادەني قورىعى» ەلباسى ن.ءا. نازاربايەۆتىڭ «بولاشاققا باعدار: رۋحانيجاڭعىرۋ» مەملەكەتتىك باعدارلاماسى جانە «ۇلى دالانىڭ جەتى قىرى» اياسىندا «ماڭعىستاۋ – اشىق اسپان استىنداعى مۇراجاي» كورمەسىن ۇسىندى. كورمەدە قازاقستاندا تەڭدەسى جوق، ءوڭىرىمىزدىڭ بىرەگەي، ءارى باي ارحەولوگياسى، ءشول دالادا ورنالاسقان كاسيەتتى نىساندارى مەن دىني-ساۋلەت ەسكەرتكىشتەرى، «ۇلى دالانىڭ جەتى قىرى» اتانعان قازاق حالقىنا ءتان «اتقا ءمىنۋ» مادەنيەتى بەينەلەنگەن.

كورمە 3 ستەندتەن تۇرادى:
1. ۇلى دالانىڭ جەتى قىرى.
2. دىني-ساۋلەت ەسكەرتكىشتەرى.
3. ارحەولوگيا ەسكەرتكىشتەرى.

كورمە سوڭى «ءبىز شىرقايمىز دوستىق ءانىن!» اتتى مۇرات وسكىنبايەۆ اتىنداعى ماڭعىستاۋ وبلىستىق فيلارمونياسىنىڭ «اقجارما» فولكلورلىق ءانسامبلىنىڭ كونسەرتىنە ۇلاستى.