بۇگىن، 10 اقپاندا جامبىل وبلىسى اكىمى قىزمەتىنەن بوساتىلعان اسقار مىرزاحمەتوۆ وبلىس اكىمدىگىندە وتكەن جيىندا قازاقساتننىڭ ەكس-پرەزيدەنتى نۇرسۇلتان نازاربايەۆ پەن قازىرگى پرەزيدەنتى قاسىم-جومارت توقايەۆقا العىس ايتتى. 

وبلىس اكتيۆىندە ءسوز العان مىرزاحمەتوۆ ءوزىنىڭ وتستاۆكاعا ءوتىنىش بەرۋ سەبەبىن قوردايدا بولعان دۇنگەندەر مەن قازاقتار اراسىنداعى جانجالمەن بايلانىستىردى. 

- وكىنىشكە قاراي وبلىسىمىزدا وتە اۋىر قايعىلى جاعداي بولدى. 10 ادام قازا بولىپ، ءجۇز جەتپىستەن استام ادام جاراقاتتاندى. بۇل تەك جامبىلدىقتار ءۇشىن عانا ەمەس بارشا ەلىمىز ءۇشىن وڭاي تيمەدى. وسى تۇرعىدا مەن وبلىس اكىمى رەتىندە جۇمىستى جالعاستىرۋ ءمورالدىك تۇرعىدا اۋىر دەپ ەسەپتەدىم. سوندىقتان دا پرەزيدەنتكە ءوز ەركىممەن وتستاۆكاعا كەتۋ تۋرالى ءوتىنىش جازدىم. شەشىمىمدى قابىلداعان مەملەكەت باسشىسىنا راقمەت. ەڭ الدىمەن، العىستى ەلباسىعا ايتقىم كەلەدى. كەزىندە وسى قىزمەتكە تاعايىنداعان ەلباسى. سەنىم ءبىلدىردى. سول سەنىمگە ۇلكەن العىس بىلدىرەمىن.  ودان كەيىن قاسىم-جومارت كەمەلۇلىنا العىس ايتامىن. پرەزيدەنت رەتىندە جامبىل وبلىسىنا، جامبىل وبلىسىنىڭ اكىمدىگىنە، ماعان قولداۋ كورسەتتى، - دەدى ول.

بۇگىن جامبىل وبلىسىنىڭ اكىمى اسقار مىرزاحمەتوۆ ءوز ەركىمەن قىزمەتىنەن كەتتىپ، ونىڭ ورنىنا اكىم بولىپ پرەزيدەنت توقايەۆتىڭ جارلىعىمەن بەردىبەك ساپاربايەۆ تاعايىندالعان بولاتىن.

بۇگىن تۇسكە قاراي توقايەۆ  مىرزاحمەتوۆكە "ءوز جۇمىسىنا سالعىرت قارادى" دەپ جامبىل وبلىسىنىڭ اكىمىنىڭ الەۋمەتتىك ماسەلەلەر جونىندەگى ورىنباسارى سۇلۋشاش قۇرمانبەكوۆانى جانە قورداي اۋدانىنىڭ اكىمى ب.بايتولەنى، ال ىشكى ىستەر ءمينيسترى ەرلان تۇرعىمبايەۆقا جامبىل وبلىسى پوليسيا دەپارتامەنتىنىڭ باستىعى ارمان ورازالييەۆتى جانە قورداي اۋداندىق پوليسيا ءبولىمىنىڭ باستىعى ا.ايقىمبەكوۆتى قىزمەتىنەن بوستۋدى تاپسىرعان ەدى. 

اقپاننىڭ 7ء-سى كۇنى جامبىل وبلىسى قورداي اۋدانىندا بولعان ەتنيكالىق جانجالدا 10 ادام قايتىس بولىپ، 40-تان استام ادام جاراقاتتانعان. 36 تۇرعىن ءۇي مەن 11 كوممەرسيالىق نىسان جانە 44 اۆتوكولىك ورتەنگەن.  ەتنيكالىق جانجالدىڭ شىعۋ سەبەبى ناقتى بەلگىسىز. ءبىراق قاراكەمەر اۋىلى تۇرعىندارىنىڭ سوزىنشە، جانجال ەتنيكالىق دۇنگەندەر مەن قازاقتاردىڭ كولىكپەن كەلە جاتىپ، جولعا تالاسۋىنان باستالعان.