رەسەي فەدەراسياسىنىڭ  ريازان وبلىسى سپاسسك-ريازانسكيي قالاسىندا حالىقارالىق ات بايگەسى ءوتتى. بايگەگە رەسەي، گەرمانيا، قازاقستان، فينليانديا مەملەكەتتەرىنەن ءتۇرلى تەكتى تۇقىمدى اتتار قوسىلعان.
الىس قاشىقتىققا شاباتىن ات بايگەسىنە قازاقستان رەسپۋبليكاسى اتىنان ماڭعىستاۋلىق بەس اداي جىلقىسى قاتىسىپ،بارلىعى جۇلدەمەن ورالدى. سونىڭ ىشىندە ماڭعىستاۋ اۋدانى قىزان اۋىلىنان ات قوسقان بەلگىلى اتبەگى – بۇعاباي مۇقىربايەۆتىڭ ەكى جۇيرىگى  قانجىعاسىنا «جەڭىس» بايلاپ كەلگەن. ولار: 80 شاقىرىم قاشىقتىق بويىنشا العاش رەت بايگەگە تۇسكەن «بۋمەر» اتى (بايگە بالا – جەتىبايلىق انەس ەترەكوۆ) مەن 120 شاقىرىمنان «جارى» تۇلپارى (شاباندوز – ءوز ۇلى بەكتاس مۇقىربايەۆ) ءى (ءبىرىنشى) ورىندى جەڭىپ الدى. ايتا كەتەيىك، «جارى» بۇعان دەيىن دە الدىڭعى جىلدارى وسى قالادا وتكەن بايگەدە توپ جارعان ەدى. بىلتىر فرانسيادا سىناقتان ءوتتى.
سونداي-اق 120 شاقىرىم قاشىقتىقتا ءىى ورىندى دا ناتاليا دولگيحتىڭ «جەزكيىك» اتتى اداي جىلقىسى يەلەنىپ، قالعان ءىىى، IV ورىنداردى رەسەيلىكتەرگە  بەرىپ، V، VI ورىنداردى تاعى دا ازات قويشييەۆ («ويلى») پەن ءابىش ەتيرەكوۆتىڭ («كوكپار») اداي تۇقىمدى جىلقىلارى ولجالايدى. جەرلەستەرىنىڭ بۇل جەڭىستەرىنەن جىگەر العان داريا پوپوۆانىڭ وسى تەكتەس «چەكيست» تۇلپارىنا دا 80شاقىرىمدىق سايىستا IV ورىن بۇيىرادى.
بۇل شاعىن اقپاراتتى www.probegi.info سايتىندا جاريالانعان وسى بايگەنى ۇيىمداستىرۋ كوميتەتىنىڭ ەسەپتىك كەستەسىنەن كورۋگە بولادى.

بەرىك داۋەنوۆ