نۇر-سۇلتاننىڭ پەكينگە نوتا جولداۋىنا تۇرتكى بولعان Sohu.com سايتىنداعى "قازاقستان نەگە قىتايعا ورالۋدى قالايدى؟" دەگەن ماقالاعا قاتىستى قىتايدىڭ قازاقستانداعى ەلشىسى چجان سياو پىكىر ءبىلدىردى. بۇل تۋرالى ەلشى ءوزىنىڭ facebook پاراقشاسىنا جازدى. 

"اۆتورى بەلگىسىز ماقالا قىتايلىق سايتقا، جۇڭگو تىلىندە جاريالانعان. دەگەنمەن بۇل ماقالىڭ اۆتورى جۇڭگو ازاماتى جانە ماقالاعا جۇڭگو ۇكىمەتىنىڭ قاتىسى بار دەپ تۇجىرىم جاساۋعا نەگىز بولا الا ما؟ جۇڭگو تىلىندە تەك قىتايلار، ورىس تىلىندە تەك ورىستار جازادى دەگەن تۇجىرىم بولسا "اعىلشىن تىلىندە كىمدەر جازادى؟" دەگەن سۇراق تۋىندايدى ەمەس پە؟ قازىرگى سايتتارعا كىرۋ تەگىن ەكەنى بەلگىلى. كەز كەلگەن ارانداتۋشى مۇنى ءوز پايداسىنا اسىرا الادى. بۇگىنگى تاڭدا الەمدە سەنساسيالىق ايدارلاردى كوپشىلىكتىڭ نازارىن اۋدارۋ ءۇشىن، ال كەيبىر ادامدار ءۇشىن ساياسي ۇپايلاردى الۋ ءۇشىن پايدالانادى. ءبىراق بۇل ماقالانىڭ كىمنىڭ مۇددەسى ءۇشىن جاسالعانىن انىقتاۋ كەرەك. دەگەنمەن بۇل ۇزاق زەرتتەۋدى قاجەت ەتپەي، شىندىق جاقىن ۋاقىتتا بەلگىلى بولادى دەپ ويلايمىن" دەپ جازدى چجان سياو. 

Sohu.com ينتەرنەت پلاتفورماسىندا جاريالانىپ، كەيىن اشىلماي قالعان ماقالادا “تاريحتا قازاقستان قىتايدىڭ اۋماعىنا تيەسىلى بولعان، قازاقستان سين يمپەرياسىنىڭ ۆاسسالى ەدى” دەپ جازىلعان.