ق ر سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى وبلىستىق پروكۋراتۋرامەن بىرلەسىپ، مو پوليسيا دەپارتامەنتىنىڭ لاۋازىمدى تۇلعالارىنىڭ زاڭسىز ارەكەتىن اشكەرەلەدى. اقتاۋ قالاسىندا كارانتين كەزىندە "جۇمىس ىستەۋدى" جالعاستىرعان جەزوكشەلەر ورداسىنىڭ زاڭسىز ارەكەتىنە پوليسيانىڭ "قامقورلىق" جاساعانىن انىقتادى.
بۇل تۋرالى ماڭعىستاۋ وبلىسىنىڭ قوعامدىق كوممۋنيكاسيالار ورتالىعىندا وتكەن بريفينگ بارىسىندا ق ر سىبايلاس جەمقورلىققا قارسى ءىس-قيمىل اگەنتتىگىنىڭ مو بويىنشا دەپارتامەنتىنىڭ تەرگەۋ باسقارماسىنىڭ باسشىسى باۋىرجان سەرىك ۇلى بايمىرزا مالىمدەدى.
وبلىس اۋماعىندا كارانتين جاريالانعانىنا قاراماستان پوليسيا قىزمەتكەرلەرى قۇقىقبۇزۋشىلىق ارەكەتتەردى توقتاتۋ شاراسىن الماعان.
سىبايلاس جەمقورلىققا قارسى قىزمەت ءتارتىپ ساقشىلارى كوروناۆيرۋس ينفەكسياسىن جۇقتىرعان ادامنىڭ جەزوكشەلىكپەن اينالىساتىن شەتەل ازاماتشالارىمەن بايلانىستا بولعانى تۋرالى اقپاراتتى جاسىرىپ قالعان دەپ تۇجىرىمدادى. ۆەدومستو پوليسيا وسى تۋرالى مالىمەتتى "قۇپيادا ۇستادى" دەپ مالىمدەدى.
سىبايلاس جەمقورلىققا قارسى قىزمەتتىڭ تەرگەۋ باسقارماسى باسشىسىنىڭ ايتۋىنشا، اتالعان مالىمەتتەرگە ساي، پارا الۋ، قىزمەتتىك وكىلەتتىكتەرىن اسىرا پايدالانۋ، جەزوكشەلىكپەن اينالىسۋعا ارنالعان ورىنداردى ۇيىمداستىرۋ جانە ولاردى جاسىرۋ، ادامداردىڭ ءومىرى مەن دەنساۋلىعىنا ءقاۋىپ توندىرەتىن جاعدايلاردى جاسىرىپ قالۋ فاكتىلەرى بويىنشا سوتقا دەيىنگى تەرگەۋ امالدارى جۇرگىزىلۋدە.
سونىمەن قاتار، سىبايلاس جەمقورلىققا قارسى قىزمەت وكىلىنىڭ مالىمدەۋىنشە، قازىرگى ۋاقىتتا جەزوكشەلەر ورداسىندا جۇمىس ىستەيتىندەردى قوسا العاندا، 87 ادام كارانتينگە الىنىپ، وقشاۋلانعان. ولاردىڭ ىشىندە ەكى شەتەل ازاماتىنان كوروناۆيرۋس ينفەكسياسى انىقتالدى.
پىكىر قالدىرۋ