ماڭعىستاۋ وبلىسىندا «اۋىل – ەل بەسىگى» جوباسى اياسىندا 5 الەۋمەتتىك وبەكتى قۇرىلىسىنا جانە اۋىلداردىڭ ينجەنەرلىك ينفراقۇرىلىمىن جۇرگىزۋگە  1،5 ملرد. تەڭگە ءبولىندى.

بۇل تۋرالى قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىسىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى مارينا الىبەكوۆا ءمالىم ەتتى.

«اۋىل – ەل بەسىگى» جوباسىنىڭ ماقساتى – اۋىلداعى ءومىر ساپاسىن جاقسارتۋ، اۋىلدىق جەردەگى ينفراقۇرىلىمدى جاڭالاۋ، ولاردى ايماقتىق ستاندارتتار جۇيەسىنىڭ پارامەترلەرىنە جەتكىزۋ.

ەكونوميكا مينيسترلىگى اۋىلداردى وسى جوباعا قوسۋ ءۇشىن پارامەترلەردى انىقتادى.

ولار:

• حالىق سانىنىڭ ءوسۋ ديناميكاسى؛
• حالىقتىڭ جۇمىسپەن قامتۋدىڭ ءوسۋ ديناميكاسى؛
• ءىرى ەلدى مەكەندەرگە الىس-جاقىندىعى؛
• مال جانە ەگىن شارۋاشىلىعى كورسەتكىشتەرىنىڭ ءوسۋ ديناميكاسى؛
• توپ تۋريستىك ايماقتار جاقىندىعى؛
• ەل قاۋىپسىزدىگى ءۇشىن ستراتەگيالىق ماڭىزى بويىنشا كورسەتكىشتەر.

جالپى العاندا، دامۋ ءۇشىن پوتەنسيالى بار جانە حالىق سانى كوپ 28 پەرسپەكتيۆالى اۋىلدىق ەلدى مەكەن جوباعا ەنگىزىلدى.

جوبا، اۋدان ورتالىعى بولىپ تابىلاتىن 3 اۋىلدا 2019 جىلى ىسكە اسىرىلىپ باستادى. ولار – ماڭعىستاۋ، بەينەۋ جانە شەتپە اۋىلدارى (ق ر بويىنشا – 53 اۋىل ، 30 ملرد. تەڭگە).

2019 جىلى 24 جوبانى ىسكە اسىرۋعا 1،4 ملرد.تەڭگە ءبولىنىپ، يگەرىلدى (رەسپۋبليكالىق بيۋدجەت – 1 204،6 ملن. تەڭگە، جەرگىلىكتى – 173،7 ملن. تەڭگە).

4 الەۋمەتتىك ينفراقۇرىلىم وبەكتىسى جوندەلدى. ولار – شەتپە اۋىلىنداعى بەرەكەت جۇمالييەۆ اتىنداعى ورتا مەكتەپ عيماراتىن جانە 300 ورىندىق مادەنيەت ءۇيىن جانە ماڭعىستاۋ اۋىلىنداعى جاستار رەسۋرستىق ورتالىعىن اعىمداعى جوندەۋ جانە ورتالىق كىتاپحانا قۇرىلىسى؛

7 تۇرعىن ۇي-كوممۋنالدىق شارۋاشىلىق وبەكتىسى. ولار –ماڭعىستاۋ اۋىلىنداعى 4 ۋچاسكەنىڭ كوشەلەرىنە جارىق تارتۋ جانە بەينەۋ اۋىلىنىڭ كوشەلەرىنە گاز قۇبىرىن سالۋ جۇمىستارى؛

3 اۋىلداعى كولىك ينفراقۇرىلىمىنىڭ جالپى ۇزىندىعى 38،2 كيلومەتر بولاتىن 13 وبەكتىسى.

بارلىق وبەكتىلەر مەرزىمىندە اياقتالدى.

2020 جىلعا ارنالعان بيۋدجەتتە «اۋىل – ەل بەسىگى» جوباسى اياسىندا باسىندا 1،6 ملرد.تەڭگە قارالعان بولاتىن (رەسپۋبليكالىق بيۋدجەت – 1 387،4 ملن. تەڭگە، جەرگىلىكتى بيۋدجەت -215،6 ملن. تەڭگە). ءساۋىر ايىندا قوسىمشا 2،5 ملرد.تەڭگە ءبولىندى. ناتيجەسىندە، بيىلعا ارنالعان جالپى كولەم   4،1 ملرد.تەڭگەنى، ونىڭ ىشىندە رەسپۋبليكالىق بيۋدجەت سوماسى 3،8 ملرد. تەڭگەنى قۇرادى.

7 اۋىل بويىنشا (بەينەۋ، اقشۇقىر، قىزىلتوبە، باياندى، باسقۇدىق، راحات، شەتپە اۋىلدارى) 33 جوباعا، سونىڭ ىشىندە:

- 5 الەۋمەتتىك وبەكتى قۇرىلىسىنا جانە اۋىلداردىڭ ينجەنەرلىك ينفراقۇرىلىمىن جۇرگىزۋگە – 1،5 ملرد. تەڭگە؛

- اۋىلىشىلىك جولداردى سالۋعا جانە ورتاشا جوندەۋگە –  2،6 ملرد.تەڭگە بولىنەدى. بارلىعى – 32،2 كم. جول سالۋ جانە 54 كم. جولدى جوندەۋ.