بۇل تۋرالى قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى شىڭعىس دۇيسەنوۆ مالىمدەدى.
ەلىمىزدە جاريالانعان توتەنشە جاعدايعا بايلانىستى كەيبىر مەكەمە، كاسىپورىندار ۋاقىتشا جۇمىسىن توقتاتتى، سونىڭ سالدارىنان كەيبىر ازاماتتار جۇمىسسىز قالدى. وسىعان وراي، ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ ماڭعىستاۋ وبلىسىنىڭ اكىمدىگى وبلىس بويىنشا حالىقتى جۇمىسپەن قامتۋعا جاردەمدەسۋدىڭ كەشەندى جوسپارىن جاساقتاپ، بەكىتتى. جوسپار شەڭبەرىندە بارلىعى 17 320 ادام قامتىلادى دەپ كۇتىلۋدە.
جۇمىسپەن قامتۋ شارالارى بويىنشا 8 067 ادام تۇراقتى جۇمىس ورىندارىمەن، 7 334 ادام ۋاقىتشا جۇمىس ورىندارىمەن قامتىلماق. سونداي-اق، «ەڭبەك» مەملەكەتتىك باعدارلاماسى شەڭبەرىندە قىسقا مەرزىمدى كاسىپتىك وقۋدى بىتىرگەن 840 ادام جۇمىسپەن قامتىلسا، 624 ادام شاعىن نەسيەمەن جانە 455 ادام جاڭا بيزنەس-يدەيالاردى جۇزەگە اسىرۋ ءۇشىن مەملەكەتتىك گرانتتارمەن قامتىلادى.
-توتەنشە جاعدايعا بايلانىستى رەسپۋبليكالىق بيۋدجەتتەن قوسىمشا 1 556 ادامدى قامتۋ ءۇشىن 585 ملن. تەڭگە قارجى ءبولىندى. ونىڭ ىشىندە:
- مەملەكەتتىك گرانت – 180 ادامعا (95،4 ملن. تەڭگە)؛
- اقىلى قوعامدىق جۇمىس – 1 000 ادامعا (340،0 ملن. تەڭگە)؛
- جاستار تاجىريبەسى – 376 ادامعا (149،5 ملن. تەڭگە).
بارلىعىن قوسقاندا وسى كەشەندى جوسپار شەڭبەرىندە 18 876 ادام قامتىلادى - ، دەدى ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى شىڭعىس دۇيسەنوۆ.
پىكىر قالدىرۋ