ماڭعىستاۋ وبلىستىق قوعامدىق كوممۋنيكاسيا ورتالىعىندا وتكەن بريفينگتە وبلىس اكىمىنىڭ ورىنباسارى نۇرداۋلەت قيلىباي وڭىردە جۇمىستارىنا كىرىسەتىن مەكەمەلەر مەن كاسىپكەرلىك نىساندارىنىڭ ءتىزىمىن جاريالادى.

قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ كۇنى كەشە توتەنشە جاعداي رەجيمىن بيىلعى 11 مامىرعا دەيىن ۇزارتۋدى جانە كەيبىر كاسىپكەرلىك قىزمەت تۇرىنە رۇقسات بەرۋ تۋرالى مالىمدەمە جاسادى.

وسىعان وراي، كارانتين تالاپتارىن جەڭىلدەتۋگە قاتىستى ماڭعىستاۋ وبلىستىق جەدەل شتابى ءوز جۇمىستارىنا كىرىسەتىن مەكەمەلەر مەن كاسىپكەرلىك نىسانداردىڭ كەلەسىدەي ءتىزىمىن جاساقتادى. تومەندەگى نىساندار 29 ساۋىردەن باستاپ جۇمىستارىنا كىرىسەدى:

ساعات 09:00 – 18:00 ارالىعىندا جۇمىس ىستەيتىن مەكەمەلەر:

- حيميالىق تازالاۋ؛

- اياق كيىم جوندەۋ جانە كىلت جاساۋ شەبەرحانالارى؛

- كىر جۋاتىن ورىندار؛

- شاشتاراز، ال سۇلۋلىق سالوندارىنا رۇقسات جوق؛

- كولىك جوندەۋ ورتالىقتارى (ءبىر ۋاقىتتا 3 كولىكتەن ارتىق بولمايدى)؛

- تۇرمىستىق تەحنيكا جانە ەلەكتر قۇرالدارىن (جابدىقتارىن) ساتاتىن نىساندار (تەك جەتكىزۋ قىزمەتى ارقىلى)؛

- قۇرىلىس جانە سانتەحنيكا ماتەريالدارىن، اۆتوبولشەكتەر مەن مايلاۋ ماتەريالدارىن ساتاتىن وبەكتىلەر (تەك جەتكىزۋ قىزمەتى ارقىلى)؛

- وپتيكا؛

- لومباردتار، ميكروقارجىلىق ۇيىمدار، ايىرباستاۋ پۋنكتتەرى؛

- شينومونتاجدار؛

- گۇل دۇكەندەرى (تەك جەتكىزۋ قىزمەتى ارقىلى)؛

- ورگ تەحنيكانى جوندەۋ قىزمەتى؛

- جارناما اگەنتتىكتەرى، تيپوگرافيالار (ءوتىنىشى بويىنشا).

الايدا، بۇل رۇقسات ەتىلگەن نىساندار بولەك تۇرعان نەمەسە كوشەگە بولەك شىعاتىن ەسىگى بار بولۋى ءتيىس جانە سانيتارلىق جۇمىستارىن قاتاڭ ساقتاۋى ءتيىس.

سونىمەن بىرگە،

- ازىق-تۇلىككە تاپسىرىس بەرۋدى قامتاماسىز ەتەتىن ساۋدا اگەنتتەرى (ءوتىنىم ءادىسى بويىنشا)؛

- زوودۇكەندەر، جانۋارلارعا (مالدارعا) ارنالعان جەم، كوشەتتەر، تۇقىمدار مەن تىڭايتقىشتاردى ساتۋ وبەكتىلەرى؛

- سپورت تاۋارلارىن ساتاتىن دۇكەندەر (تەك جەتكىزۋ قىزمەتى  ارقىلى)؛

ال،

- دايىن تاماقتى جەتكىزۋ قىزمەتى ساعات 10:00 – 22:00 ارالىعىندا جۇمىس ىستەيتىن بولادى، الايدا جەتكىزۋ كولىكتەرىن «سەرگەك» بازاسىنا ەنگىزۋ كەرەك جانە مەكەمەنىڭ راستاۋشى قۇجاتتارى بولۋى ءتيىس. بازاعا ەنگىزۋ ءۇشىن كولل ورتالىعىنا 301177 نومىرىنە بايلانىسۋىڭىزعا بولادى.

سونىمەن بىرگە، مەملەكەت باسشىسى وقشاۋلانۋ كەزىندەگى كىشكەنتاي بالالاردىڭ جاعدايىنا دا توقتالىپ وتكەن بولاتىن. سوندىقتان، اتا-انالارعا بالالارىن ءۇيدىڭ اۋلاسىندا ساعات 10:00 – 12:00 جانە 17:00 – 20:00 ارالىقتارىندا ويناتۋعا رۇقسات بەرىلەدى. بالالار دا، اتا-انالار دا مىندەتتى تۇردە ماسكا كيىپ ءجۇرۋى كەرەك. الايدا، كسك قىزمەتتەرى بالالار ويىن الاڭدارىنا تۇراقتى تۇردە دەزينفەكسيا جۇمىستارىن جۇرگىزىپ تۇرۋى ءتيىس.

جاعدايعا بايلانىستى كارانتين تالاپتارىن جەڭىلدەتۋ جۇمىستارى الداعى ۋاقىتتاردا دا جالعاساتىن بولادى.

جوعارىدا اتالعان كاسىپكەرلىك نىساندارىنا ارنايى رۇقسات قاعازدارىن الۋدىڭ قاجەتى جوق. تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ماماندارى بۇل نىساندارعا قاۋىپسىزدىك شارالارىن ساقتاۋ جونىندە نۇسقاۋلىقتار تاراتاتىن بولادى. كاسىپكەرلىك نىساندار نۇسقاۋلىق تالاپتارىن ورىنداۋعا مىندەتتى جانە بۇل باعىتتا ۇنەمى مونيتورينگ جۇمىستارى جۇرگىزىلەتىن بولادى. ورىنداماعان جاعدايدا زاڭعا سايكەس شارالار قابىلداناتىندىعىن ەسكەرتەمىن.

ال، جالپى كولىكتەردىڭ قوزعالىسى وزگەرىسسىز قالدىرىلادى، ياعني كۇندەلىكتى ساعات 06:00 – 10:00 جانە 17:00 – 21:00 ارالىعىندا ءجۇرۋى ءتيىس.

بۇل وزگەرىستەردىڭ بارلىعى جاڭاوزەن قالاسى مەن ماڭعىستاۋدان اۋدانىنا قاتىسى جوق. ياعني، بۇل جەرلەردە بۇرىنعى كارانتيندىك رەجيم ساقتالادى.