«نەكە (ەرلى-زايىپتىلىق) جانە وتباسى تۋرالى» زاڭ كودەكسىنىڭ 50-دەن استام بابىنا وزگەرىستەر ەنگىزىلدى. ولار بىلتىرعى جىلدىڭ جەلتوقسانىندا كۇشىنە ەنگەنى ءمالىم. ولاردى وڭىرلىك قكو ورتالىعىندا وتكەن جيىندا وبلىستىق ادىلەت دەپارتامەنتىنىڭ وكىلدەرى ءتۇسىندىرىپ بەردى.

وزگەرىستەردىڭ باستى ماقساتى - ازاماتتىق حال اكتىلەرىن تىركەۋ ءتارتىبىن جەڭىلدەتۋ، ارتىق قۇجاتتاردى تالاپ ەتۋدى الىپ تاستاۋ، مەملەكەتتىك قىزمەتتەر كورسەتۋ مەرزىمىن ايتارلىقتاي قىسقارتۋ، بالالاردىڭ قۇقىقتارى مەن مۇددەلەرىن قورعاۋ بولىپ تابىلادى.

«اتاپ ايتساق، بالا اسىراپ الۋدى جانە اكە بولۋدى انىقتاۋدى مەملەكەتتىك تىركەۋدى، سونداي-اق سوت شەشىمى نەگىزىندە نەكە بۇزۋ سەكىلدى اكت جازبا تۇرلەرىن تىركەۋ الىنىپ تاستالدى. مىسالى، وسى وزگەرىستەرگە دەيىن ەرلى-زايىپتىلار سوت ارقىلى نەكەسىن بۇزىپ، سودان كەيىن احات ورگاندارىنا بارىپ كۋالىك الۋى قاجەت بولسا، وزگەرىستەرگە سايكەس سوت شەشىمى زاڭدى كۇشىنە ەنگەن ساتتەن، اۆتوماتتى تۇردە نەكە قيۋ تۋرالى اكت جازباسىنا نەكەنىڭ بۇزىلعانى تۋرالى بەلگى قويىلىپ، كۋالىك الۋدىڭ قاجەتتىلىگى الىنىپ تاستالدى» - دەيدى دەپارتامەنت باسشىسى داريعا كەسىكبايەۆا.

بۇدان بىلاي ازاماتتارعا جەرگىلىكتى احات ورگاندارىنا بارۋدىڭ قاجەتى جوق. سونىمەن قاتار، بۇرىن بالانى اسىراپ العان نەمەسە اكەلىك انىقتالعان كەزدە بالاعا  ەكى  كۋالىك بەرىلەتىن  - اسىراپ الۋ نە اكە بولۋدى انىقتاۋ جانە تۋۋ تۋرالى كۋالىك.

جاڭا وزگەرىستەرگە سايكەس ارتىق قۇجاتتاردى جويۋ ماقساتىندا ازاماتتار ءۇشىن دە، تىركەۋشى ورگان ءۇشىن دە ءتارتىپتى جەڭىلدەتۋ ارقىلى بالاعا قاجەتتى تەك تۋۋ تۋرالى كۋالىك بەرىلەدى. بۇل رەتتە بالانىڭ جانە اتا-اناسى تۋرالى دەرەكتەر تۋۋ تۋرالى كۋالىكتە عانا كورسەتىلەدى.  

كەلەسى وزگەرىستەردىڭ ءبىرى - ازاماتتارعا ىڭعايلى بولۋ ءۇشىن ازاماتتىق حال اكتىلەرىن تىركەۋدىڭ بارلىق تۇرلەرىن تىركەۋ، ولارعا وزگەرىستەر، تۇزەتۋلەر مەن تولىقتىرۋلار ەنگىزۋ، اكت جازبالاردى  قالپىنا كەلتىرۋ جانە جويۋ، قايتالاما كۋالىكتەر مەن انىقتامالار الۋ بويىنشا مەملەكەتتىك قىزمەتتەر ەكساۋماقتىق قاعيدات بويىنشا كورسەتىلەدى.

«مىسالى، قۇجاتتارىن جوعالتقان جاعدايدا، ازامات قاي ايماقتا تۇراتىنا، تۋعان جەرىنە قاراماستان، كەز-كەلگەن تىركەۋشى ورگانعا بارىپ، قايتالاما تۋۋ تۋرالى كۋالىگىن الا الادى. جانە دە ازاماتتاردان اقپاراتتىق جۇيەلەردەن الۋعا بولاتىن سوت شەشىمدەرى، مەديسينالىق انىقتامالار، ەل اۋماعىندا تىركەلگەن اكتىلەر تۋرالى اقپارات مەملەكەتتىك ورگاندارعا ۇسىنۋ قاجەتتىلىگى جويىلدى. اتا-انالاردىڭ تاڭداۋى بويىنشا SMS-حابارلاما ارقىلى تۋۋدى پرواكتيۆتى جولمەن تىركەۋ مۇمكىندىگى زاڭنامالىق تۇردە رەتتەلدى» - دەيدى د.كەسىكبايەۆا.

سونىمەن قاتار بالا پەرزەنتحانادا تۋىلسا، اناسىنىڭ جەكە باسىن كۋالاندىراتىن قۇجاتىنىڭ بولماۋىنا قاراماستان، نارەستەگە مىندەتتى تۇردە تۋۋ تۋرالى كۋالىك بەرىلەدى.