اقش پرەزيدەنتى دونالد ترامپتىڭ ويىنشا، بەيجىڭ قاراشا ايىندا وتەتىن پرەزيدەنتتىك سايلاۋدا ونىڭ جەڭىلگەنىن قالايدى. بۇل تۋرالى قامشى ءتىلشىسى The Guardian باسىلىمىنا سىلتەمە جاساپ حابارلايدى.

اقش پرەزيدەنتىنىڭ ايتۋىنشا، ونى قاراشا ايىندا قايتا سايلانۋ قۇقىعىنان ايىرۋ ءۇشىن جۇڭگو بيلىگى "قولىنان كەلگەننىڭ ءبارىن ىستەيدى".

– ونىڭ ءبىر دالەلى – قىتايدىڭ كوروناۆيرۋستى قولدانۋى، – دەدى ترامپ.  

ترامپ كۇزدىڭ سوڭىندا بولاتىن پرەزيدەنتتىك سايلاۋعا بەيجىڭدى العاش رەت بايلانىستىردى.

– جۇڭگو مەنى وسى باسەكەدەن ايىرۋ ءۇشىن قولىنان كەلگەننىڭ ءبارىن جاسايدى،– دەدى ول. ترامپتىڭ ويىنشا، بەيجىڭ دەموكراتتاردىڭ كانديداتى دجو بايدەننىڭ سايلاۋدا جەڭىسكە جەتۋىن قالايدى. 

27-28 ساۋىردە وتكەن Reuters / Ipsos ساۋالناماسىنا سايكەس، امەريكالىقتاردىڭ 43%-ى ترامپتىڭ پاندەميا ساياساتىن قولداعان.

اقش پرەزيدەنتى Reuters اگەنتتىگىنە بەرگەن سۇحباتىندا دەموكرات قارسىلاسى دجو بايدەننىڭ پرەزيدەنتتىككە ۇمىتكەرلەر اراسىندا كوش باستاپ تۇرعانىن كورسەتەتىن ساۋالنامالارعا سەنبەيتىنىن ايتتى.

– مەن ساۋالنامالارعا سەنبەيمىن. مەن بۇل ەلدىڭ حالقى اقىلدى دەپ سانايمىن. ولار قابىلەتسىز ادامدى سايلايدى دەپ ويلامايمىن، – دەدى ترامپ.