ماڭعاز ماڭعىستاۋ ءوڭىرى قازاقستانداعى ۇزدىك 10 تۋريستىك ايماقتىڭ ءبىرى. جىل وتكەن سايىن كاسپيي تەڭىزىنىڭ جاعاسى تۋريستەر دەمالاتىن ورىنعا اينالىپ، كەلۋشىلەردىڭ سانى ارتقان. تەڭىزدەن بولەك قازاقستاننىڭ جەتى كەرەمەتىنىڭ ءبىرى -  بەكەت اتا جەراستى مەشىتى جانە باسقا دا  كيەلى ورىندار ءدال وسى ماڭعىستاۋ جەرىندە. 

بيىل ەل كولەمىندە ساۋلەتشى، اعارتۋشى بەكەت اتا مىرزاعۇل ۇلىنىڭ 270 جىلدىعى. جىل سايىن اتانىڭ باسىنا زيارات ەتىپ كەلەتىن ىشكى جانە سىرتقى تۋريستەردىڭ سانى ارتقان. مەكەرە قارساڭىندا بەكەت اتا مەشىتى مەن وعان اپاراتىن جول بويى جانە  شوپان اتا مەشىتتەرىنىڭ اۋماعى اباتتاندىرىلىپ، كونە جادىگەرلەر قايتا قالپىنا كەلتىرۋ جۇمىستارى جۇرگىزىلۋدە. 12 شاقىرىم قاشىقتا جەر استىنان شىعاتىن تابيعي سۋعا قۇبىر تارتىپ، مەشىتكە دەيىن اكەلىندى. 2017 جىلى «اتا جولى» اۆتوموبيل جولىن رەكونسترۋكسيالاۋ جۇمىستارى باستالعان بولاتىن. جوبا ەكى كەزەڭمەن ءجۇردى. العاشقى بولىگىندە  5 ملرد 460 ملن.تەنگەگە  51 شاقىرىم جول جوندەلسە،  ەكىنشى كەزەڭىندە 4 ملرد 554 ملن.تەنگەگە  46 شاقىرىم جولعا رەكونسترۋكسيا جاسالىپ، اسفالت توسەلدى. ەندىگى كەزەكتە وبلىس اكىمىنىڭ تاپسىرماسىمەن بەكەت اتا مەشىتىنە گاز جەلىسىن تارتۋ ماسەلەسى قولعا الىندى. دەمەۋشىلەردىڭ كومەگىمەن الداعى ۋاقىتتا بۇل جوبا دا ىسكە اسادى دەپ كۇتىلۋدە.

سەرىكباي ترۇموۆ - ماڭعىستاۋ وبلىسىنىڭ اكىمى  

ءوزىمىزدىڭ ارىپتەستەرىمىزبەن بىرگە، ەل اعالارىمەن، ءوزەنمۇنايگاز مەكەمەسىمەن بىرگە اتانىڭ باسىندا تاعى قانداي جۇمىستاردى ۇيىمداستىراتىنىمىزدى اقىلداستىق. قازىرگى كەزدە ماسەلە بولىپ تۇرعان اتانىڭ باسىنا گاز اكەلۋ. سوسىن كەلگەن سۋدى تۇششىتىپ، حالىقتىڭ يگىلىگىنە جاراتۋ. ونى دا اقىلداستىق. دەمەۋشىلەردىڭ كومەگىمەن الداعى ۋاقىتتا ۇيىمداستىرامىز دەپ جوسپارلاپ وتىرمىز. سونداي-اق، شوپان اتانىڭ باسىنا دا سۋ تارتۋ، كوگالداندىرۋدى جوسپارلاپ وتىرمىز.