دەمالىس كۇندەرى مەملەكەت باسشىسىنىڭ جارلىعىمەن بيلىكتە ءبىراز اۋىس-تۇيىستەر كورىنىس بەردى،  سوعان وراي احمەتجان ەسىموۆ الماتى قالاسىنىڭ اكىمى قىزمەتىنەن بوساپ، «استانا –ەكسپو 2017» ۇلتتىق كومپانياسى باسقارماسىنىڭ ءتوراعاسى بولىپ تاعايىندالدى.

7 جىل بويى الماتى قالاسىن باسقارعان ەسىموۆتىڭ قالا اكىمى رەتىندە اتقارعان مىندەتى مەن ءوتىمدى، ءونىمدى،  حالىق ءۇشىن جاساعان قىزىمەتتەرىن نازارلارىڭىزعا ۇسىنا كەتەيىك:

ەسىموۆ اكىم بولعان سول جىلدار الماتىدا 400 مىڭعا جۋىق ادام باسپانا الىپ، 16 مىڭ سان سوققان ۇلەسكەرلەردىڭ ماسەلەسى شەشىلدى. 2008 جىلدان بەرى قاراي 117 ءبىلىم بەرۋ، 42 دەنساۋلىق ساقتاۋ نىسانى اشىلعان.

ورتا ەسەپپەن كۇنىنە 35-37 مىڭ جولاۋشى تاسيتىن مەتروپوليتەن قۇرىلىسى اياقتالىپ، ىسكە قوسىلدى.

2008 جىلعا دەيىن تولىعىمەن جەكە مەنشىكتە بولعان قالالىق مۋنيسيپالدىق قوعامدىق كولىك قاتىناسى رەتكە كەلتىرىلدى. بۇگىندە قالادا گازبەن جۇرەتىن 600 اۆتوبۋس پەن 400 تاكسي، 232 تروللەيبۋس پەن ترامۆاي، سونىمەن قاتار، مەترو بار. قالا مەنشىگىندەگى قوعامدىق كولىكتەردىڭ بارلىعى ەكولوگيالىق تازا بولىپ تابىلادى. بۇل تۋرالى "نۇر.كز" سايتى جازعان.

2011 جىلى اقپان مەن ناۋرىز ارالىعىندا الماتى مەن استانا اراسىندا سارى قۇرلىقتىڭ 26 مەملەكەتى قاتىسقان قىسقى ازيا ويىندارى ءوتتى.

2011 جىلدان باستاپ احمەتجان ەسىموۆتىڭ باستاماسىمەن الماتىداعى «باراحولكا» بازارى سۇرىلە باستادى. زەرتتەۋلەر ناتيجەسىندە 34 بازار رۇقساتسىز جەردە سالىنعان. بۇگىندە اتالعان بازارلار ءسۇرىلىپ تاستالدى، ورنىنا جاڭا ساۋدا ورتالىقتارى بوي كوتەردى.  

الماتىدا زنەرگوجابدىقتاۋ ءىسى قالىپقا كەلتىرىلىپ ەنەرگەتيكالىق نىساندار مەن 31 جاڭا پودستانسيا اشىلدى.

كەڭەس زامانىنان بەرى تۇڭعىش رەت قالادا ەڭ ءىرى مادەني وشاق – «الاتاۋ» كينوكونسەرت زالى اشىلدى. شاڭعىمەن سەكىرۋدەن حالىقارالىق «سۇڭقار» كەشەنى ىسكە قوسىلدى. الماتى قالاسىنىڭ تۇرعىندارى تاۋعا شاڭعىمەن سىرعاناپ، ۆەلوسيپەدپەن سەرۋەن قۇرۋعا، گولف ويناۋعا قولايلى جاعدايلار تۋدى. الماتىداعى سپورت ارەنالارى جوندەۋدەن ءوتىپ، 7 جىل ىشىندە ريتس كارلتون»، «ريكسوس»، «رويال تۋليپ» مەيرامحانالارى، «ەسەنتاي مولل»، «دوستىق پلازا»، «مەگا» ساۋدا ورتالىقتارى بوي كوتەردى.

بۇگىندە الماتىدا 28 جول ايرىعى بار. 91 جەر ءۇستى جانە جەر استى وتكەلدەرى سالىندى. 140 شاقىرىم جاڭا جول سالىنىپ، 1265 شاقىرىم جول جوندەۋدەن وتكەن.

2015 جىلدىڭ ءساۋىر ايىندا ەسىموۆتىڭ باستاماسىمەن الماتىدا  رىسقۇلوۆ داڭعىلى مەن سايىن كوشەسىنىڭ  قيلىسىندا  سالىنىپ جاتقان جولايرىقتىڭ قۇرىلىس جۇمىستارى كەزىندە تەمىر قۇرساۋلارى قۇلادى. قالالىق توتەنشە جاعدايلار دەپارتامەنتى ماماندارىنىڭ ايتۋىنشا، قۇرىلىس باسىندا 52 ادام جۇمىس ىستەگەن. ولاردىڭ 21ء-ى زارداپ شەكتى. 

2015 جىلى  ءساۋىردىڭ 27ء-سى  الماتىداعى ءىرى ساۋدا ورتالىعىنىڭ ءبىرى "ادەم" ساۋدا كەشەنىن ءورت شالدى.

ەستەرىڭىزگە سالىپ وتسەك، 23 شىلدەگە قاراعان ءتۇنى الماتى قالاسىنىڭ ناۋرىزباي اۋدانىندا سەل ءجۇردى. الماتى تۇرعىندارىنىڭ ءۇيىن سۋ الىپ، لاي-باتپاق استىندا قالدى. 

سايران وزەنىنىڭ جاعالاۋى كۇردەلى جوندەۋدەن ءوتىپ، 120 مىڭ اعاش وتىرعىزىلدى.

حالىقارالىق وليمپيادا كوميتەتى 2022 جىلعى وليمپيادا ويىندارىن قىتايدىڭ بەيجىڭ قالاسىندا وتەتىنىن ءجون دەپ تاپتى. وليمپيادا ويىندارىنىڭ الماتى قالاسىندا  وتكىزۋ جونىندە  ۇسىنىس بارىسىندا الماتىنىڭ ەسكى اكىمى ەسىموۆ ءوز اعىلشىنشاسىمەن ەستە قالدى.

ەندىگى جەردە، ۇلكەن مەگاپوليسكە اينالعان الماتى قالاسىنىڭ سۋداي جاڭا  اكىمى بولىپ ەلباسىمىزدىڭ سىنىپتاسىنىڭ ۇلى باۋىرجان بايبەك تاعايىندالدى. جاس مامانمەن بىرگە الماتى قايتا جاڭارۋ مەن جاڭعىرۋعا، تىڭ، جاس يدەالاردىڭ باستاماسىمەن بولاشاقتا باياندى قالاعا اينالاتىنى داۋسىز. باۋىرجان بايبەككە بۇيىرعان الىپ قالانىڭ تىزگىنى تۋرالى الەۋمەتتىك جەلى پايدالانۋشىلار ءوز ىقىلاستارىن بىلدىرۋدە. اكىم رەتىندە ەندى تىزگىن ۇستاعان ازامات تۋرالى بولجام ايتۋ قيىن، الايدا رايىمبەك بابانىڭ تۇيەسى شوككەن شاھار-ەلىمىزدىڭ كۇرەتامىرىنا اينالىپ ۇلگەرگەن. كۇرەتامىردى تاپ باسىپ، ونداعى احۋالدى اينىتپاي ايتا الاتىن ادام كەلگەنىنە سەنگىمىز كەلەدى.

گۇلدەن ءابدىباقىت