اقتوبە وبلىستىق ينفەكسيالىق اۋرۋحانانىڭ باس دارىگەرى قىزمەتىن اتقارعان قاليحان قوزباعاروۆتى ارىپتەستەرى "اكەمىزدەي بولعان جان" دەپ ەسكە الادى. ول 60 جاسىندا پنيەۆمونياعا شالدىعىپ، كوز جۇمدى. بۇگىن پرەزيدەنت جارلىعىمەن قازاقستاننىڭ ەڭبەك ەرى اتاندى.

قاليحان قوزباعاروۆ اقتوبە وبلىسىندا دۇنيەگە كەلگەن. 1983 جىلى اقتوبە مەملەكەتتىك مەديسينا ينستيتۋتىن، ەمدەۋ فاكۋلتەتىن بىتىرگەن. ينتەرناتۋرانى اياقتاعاننان كەيىن حرومتاۋ قالاسىنىڭ اۋداندىق اۋرۋحاناسىنا دارىگەر – ينفەكسيونيست قىزمەتىنە جىبەرىلدى.

1985 جىلى نيەۆروپاتولوگ – دارىگەر بولىپ قىزمەت اتقاردى. 1997 جىلدان باستاپ حرومتاۋ اۋماقتىق – مەديسينالىق بىرلەستىگىنىڭ باس ديرەكتورى، 1999 جىلدان باستاپ حرومتاۋ اۋداندىق دەنساۋلىق ساقتاۋ ءبولىمىنىڭ مەڭگەرۋشىسى، 2003 جىلدان 2012 جىلعا دەيىن حرومتاۋ ورتالىق اۋداندىق اۋرۋحاناسىنىڭ باس دارىگەرى بولىپ ەڭبەك ەتتى. 2012 جىل جەلتوقسان ايىنان كۇنى بۇگىنگە دەيىن اقتوبە وبلىستىق ينفەكسيالىق اۋرۋحانانىڭ باس دارىگەرى قىزمەتىن اتقاردى.

"حرومتاۋ اۋداننىڭ دەنساۋلىق ساقتاۋ جۇيەسىندە جۇمىس ىستەگەن كەزىندە ق. قوزباعاروۆ ءوزىن ۇيىمداستىرۋشى جانە قۇزىرەتتى باسشى قابىلەتتى بىلىكتى مامان رەتىندە كورسەتتى. ونىڭ باسشىلىعىمەن اۋداننىڭ دەنساۋلىق ساقتاۋ سالاسى جىل قورىتىندىسى بويىنشا بىرنەشە رەت ۇزدىك دەپ تانىلىپ، وبلىستا ءبىرىنشى ورىنعا يە بولدى. 2001 جىلى "قازاقستان رەسپۋبليكاسىنىڭ تاۋەلسىزدىگىنە 10 جىل" مەدالىمەن ماراپاتتالدى. 2002 جىلى قازاقستان رەسپۋبليكاسىنىڭ دارىگەرلەرى مەن پروۆيزورلارىنىڭ ەكىنشى سەزىنىڭ دەلەگاتى بولىپ سايلاندى. 2002 جىلى "قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى" توسبەلگىسىمەن ماراپاتتالدى" دەپ جازدى وبلىستىق كلينيكالىق ينفەكسيالىق اۋرۋحاناسىنىڭ كاسىپوداق ۇيىمىنىڭ ءتورايىمى ب.قوجييەۆا.

ارىپتەستەرى قاليحان قوزباعاروۆتىڭ ءومىرىنىڭ سوڭعى كۇنىنە دەيىن اۋرۋحانادا ەم جۇرگىزگەنىن ايتىپ، ەسكە الدى.

"قاليحان قوزباعاروۆ بار كۇش-جىگەرىن جۇمىسقا ارنادى. سونىمەن بىرگە ارىپتەستەرىنە تالاپشىل بولدى. ءبىز باسشىمىزدىڭ جارقىن بەينەسىن ماڭگى ەستە ساقتايمىز. شىنىن ايتقاندا، ول قىزمەتكە كەلگەن سوڭ قاجەتتى قۇرال-جابدىق ساتىپ الۋ، مەديسينالىق پرەپاراتتارمەن قامتاماسىز ەتۋ ءىسى جانداندى. ءومىرىنىڭ سوڭعى كۇنىنە دەيىن جۇمىستا ءجۇردى. ەم قابىلدادى، جانساقتاۋ بولىمىنە تۇسكەنگە دەيىن جانىمىزدان تابىلدى. ءبىر كۇنى زەرتحانادا تاڭعا دەيىن جۇرگەن ەدىم. ول دا ۇيىنە كەتپەدى، بىرگە بولدى. سەنبى، جەكسەنبى كۇنى دە اۋرۋحانادا جۇرەتىن. اكەمىزدى، تۋعان باۋىرىمىزدى جوعالتقانداي كۇي كەشىپ ءجۇرمىز" دەدى وبلىستىق ينفەكسيالىق اۋرۋحانانىڭ ءبولىم مەڭگەرۋشىسى نۇرجامال ەسەنعالييەۆا.

دەرەككوز: قازاقپارات