نۇر-سۇلتاندا مۇعالىمدەر كۇنى قارساڭىندا ءبىلىم جانە عىلىم ءمينيسترى اسحات ايماعامبەتوۆتىڭ قاتىسۋىمەن سالتاناتتى شارا ءوتتى.

مينيستر مەرەكەلىك جيىن بارىسىندا رەسپۋبليكالىق "ۇزدىك پەداگوگ-2020" بايقاۋىنىڭ جەڭىمپازدارىن ماراپاتتادى. "ۇزدىك پەداگوگ" اتانعان 64 مۇعالىمگە توسبەلگى مەن 2 778 000 تەڭگە سىياقى تابىستالدى. 

– ەڭ باستى ماماندىق، ول ارينە، ۇستاز. ويتكەنى ۇستاز بارلىق مامانداردى تاربيەلەيدى، بارىنە ءبىلىم بەرەدى. بۇگىنگى كۇنى ەلىمىزدە ۇستازداردىڭ مارتەبەسىن كوتەرۋ بويىنشا ۇلكەن شارالار ىسكە اسىرىلۋدا. قازىرگى كەزدە ەل پرەزيدەنتى ءبىلىم سالاسىن ەرەكشە نازارعا الىپ، ءوز جولداۋىندا دا وسى ماسەلەگە ۇلكەن كوڭىل ءبولدى. مەملەكەت باسشىسىنىڭ تاپسىرماسىمەن بيىل 1 قاڭتاردان باستاپ مۇعالىمدەردىڭ جالاقىسى 25 پايىزعا ءوستى. جالپى بىر-ەكى جىلدىڭ ىشىندە ارىپتەستەرىمىزدىڭ ايلىعىن ەكى ەسەگە ءوسىرۋ تۋرالى تاپسىرما بار. سول تاپسىرمانى ءبىز ورىنداپ جاتىرمىز، – دەدى مينيستر.

ونىڭ ايتۋىنشا، ۇستازدار ءۇشىن ءتيىستى جاعدايلار جاسالۋى كەرەك. ول ءۇشىن كەشەندى جۇمىس قابىلدانىپ، كەشەندى جۇمىس جۇرگىزىلىپ جاتىر.

– پەداگوگتاردىڭ ستاتۋسى تۋرالى ارنايى زاڭ قابىلداندى. سول زاڭنىڭ شەڭبەرىندە 70-تەن استام ءارتۇرلى قاۋلىلار قابىلدانىپ، ىسكە اسىرىلىپ جاتىر. قاعازباستىلىق سىندى ۇلكەن ماسەلەلەر بولدى. بۇدان باسقا ءمۇعالىم ماماندىعىنا كەلەتىن جاقسى تۇلەكتەردىڭ ازدىعى، سونداي-اق ۇستازداردىڭ وزىنە ءتان ەمەس قىزمەتكە تارتىلۋ پروبلەماسى بولدى. اتالعان ماسەلەلەردى شەشۋ ءۇشىن پرەزيدەنتتىڭ تاپسىرماسىمەن كەشەندى جۇمىستار ىسكە اسىرىلدى، – دەدى ايماعامبەتوۆ.