قىرعىزستاننىڭ پرەزيدەنتى سوورونباي جەەنبەكوۆ ەلدەگى ساياسي احۋالعا بايلانىستى كەزەكتى رەت ۇندەۋ جاسادى، دەپ حابارلادى 24.kg سايتى.
جەەنبەكوۆ قىرعىزستانداعى جاعداي مۇلدەم ناشارلاعانىن جانە ونى قالىپقا كەلتىرۋ ءۇشىن بەلگىلى ءبىر قادامدارعا بارۋعا دايىن ەكەنىن اتاپ ءوتتى.
– جاڭا پارلامەنت سايلاۋىن تاعايىنداۋ قاجەت. بۇل تۋرالى شەشىمدى ورتالىق سايلاۋ كوميسسياسى قابىلدايدى. بۇل شارالار قازىرگى ساياسي شيەلەنىستى تومەندەتەدى، – دەدى سوورونباي جەەنبەكوۆ.
پرەزيدەنتتىڭ ايتۋىنشا، داعدارىسقا دەيىن جۇمىس ىستەگەن پرەمەر-مينيستر مەن ۇكىمەت مۇشەلەرىن وتستاۆكاعا جىبەرۋ، جاڭا تاعايىنداۋلارعا زاڭدى تۇردە مۇمكىندىك بەرەدى.
مينيسترلەر كابينەتى مەن ونىڭ مۇشەلەرىنىڭ تاعايىنداۋلارىن زاڭداستىرۋ ءۇشىن جوگوركۋ كەنەشتىڭ قاۋلىسى مەن پرەزيدەنتتىڭ ۇكىمى كەرەك.
قىرعىزستاننىڭ زاڭدى پرەزيدەنتى ەلدەگى جاعداي تۇراقتالعان سوڭ ءوز ورنىنان كەتۋگە دايىن ەكەنىن مالىمدەدى.
– اتقارۋشى بيلىك ورگاندارىنىڭ باسقارۋشىلارى زاڭدى تۇردە تاعايىندالىپ، مەملەكەت زاڭ جولىنا تۇسكەن كەزدە، مەن قىرعىزستان رەسپۋبليكاسى پرەزيدەنتى قىزمەتىنەن كەتۋگە دايىنمىن، – دەپ قورىتىندىلادى سوورونباي جەەنبەكوۆ.
ءبىراز ۋاقىت بۇرىن قىرعىزستان پرەزيدەنتىنىڭ باسپا ءسوز حاتشىسى تولگوناي ستامالييەۆا "پرەزيدەنتتىڭ وتستاۆكاسى تۋرالى ءسوز بولعان جوق" دەگەن بولاتىن.
قىرعىزستانداعى تارتىپسىزدىك 5 قازان كۇنى پارلامەنت سايلاۋىنا قارسى بولعان مىڭداعان ادام جينالعان ميتينگتەن باستالعان ەدى. 6 قازان كۇنى وسك سايلاۋ ناتيجەسىن جارامسىز دەپ تانۋعا ءماجبۇر بولدى.
پىكىر قالدىرۋ