سولتۇستىك قازاقستان وبلىسى ماعجان جۇمابايەۆ اۋدانى ورتالىعى بۋلايەۆ قالاسى بۇگىننەن باستاپ كارانتينگە جابىلدى، دەپ حابارلادى قازاقپارات سايتى.

سايت مالىمەتىنشە، كارانتيننىڭ جاريالانۋىنا كوروناۆيرۋس ينفەكسياسىن جۇقتىرعانداردىڭ ارتۋى سەبەپ بولدى. 

وبلىستىق باس سانيتاريا دارىگەرى سەرىكباي قاسماقاسوۆتىڭ جاڭا قاۋلىسىمەن بۇگىن، 9 قازاننان باستاپ م.جۇمابايەۆ اۋدانىنىڭ ورتالىعى بۋلايەۆ قالاسىنا كارانتين شەكتەۋلەرى ەنگىزىلدى.

قاۋلىعا سايكەس رەسمي جانە جەكەمەنشىك جولاۋشى تاسىمالداۋشىلارعا بۋلايەۆ قالاسىنان باسقا ەلدى مەكەندەرگە جانە وبلىس ورتالىعىنا جولاۋشى تاسىمالداۋعا تىيىم سالىندى.

قالا تۇرعىندارىنا دا بىرنەشە شەكتەۋ قويىلدى، ياعني بۇدان بىلاي:

1) ساعات 22:00 مەن 6:00 ارالىعىندا ۇيلەرىنەن شىقپاۋى كەرەك، ولار تەك جۇمىسقا جانە مەديسينا مەكەمەسىنە بارۋعا، جاقىن ماڭداعى دۇكەنگە، ءدارىحاناعا، قوقىس شىعارۋعا عانا شىعا الادى؛

2) كورشىلەرىنىڭ، تۋعان-تۋىستارىنىڭ، دوس-تانىستارىنىڭ ۇيىنە بارۋعا تىيىم سالىندى؛

3) كەشكى ساعات 19:00-دەن كەيىن بالالارعا ەرەسەكتەرسىز كوشەگە شىعۋعا شەكتەۋ قويىلدى؛

4) 65 جاستان اسقاندار ءوز-وزىن وقشاۋلاۋ رەجيمىن ۇستانۋى ءتيىس؛

5) رەسپيراتور ينفەكسياسىنىڭ بەلگىلەرى پايدا بولعان جاعدايدا بىردەن 103 ءنومىرى ارقىلى ۇيگە دارىگەر شاقىرتۋ قاجەت؛

6) جەرلەۋ راسىمىنە 30 ادامنان اسىرماي، تەك تۋعان-تۋىستارى عانا قاتىسا الادى.

بۋلايەۆ قالاسىندا مەملەكەتتىك ورگاندار، اكىمدىكتەر، قۇقىق قورعاۋ ورگاندارى، مەديسينا مەكەمەلەرى، قوعامدىق تاماقتانۋ نىساندارى، ب ا ق، جەرلەۋ راسىمدەرى قىزمەتى، ازىق-تۇلىك، قۇرىلىس ماتەريالدارى، اۆتو جانە اۋىل شارۋاشىلىعى تەحنيكاسىنىڭ قوسالقى بولشەكتەرىن ساتاتىن ساۋدا ورىندارىنان باسقا بارلىق كاسىپورىندار مەن ۇيىمدار جۇمىسىن توقتاتتى. اۋماعى 500 شارشى مەتردەن اسپايتىن دۇكەندەر قالىپتى رەجيمدە، ال اۋماعى ودان ۇلكەن ساۋدا ورىندارى ساعات 9:00-دەن 16:00-گە دەيىن عانا جۇمىس ىستەيدى.

وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسپا ءسوز قىزمەتىنىڭ مالىمەتىنشە، بۋلايەۆ قالاسىن جابۋعا كوروناۆيرۋس ينفەكسياسىن جۇقتىرعانداردىڭ ارتۋى سەبەپ بولعان. بۋلايەۆ قالاسىندا 1 قازاننان باستاپ 15 ناۋقاس تىركەلسە، اۋدان بويىنشا ولاردىڭ سانى – 24.

– ۆەدومستۆوارالىق كوميسسيانىڭ شەشىمىنە سايكەس، وبلىس اۋداندارىندا 14 كۇننىڭ ىشىندە اۋىرعاندار سانى 7 ادامنان اساتىن بولسا، ەلدى مەكەنگە كارانتين شەكتەۋلەرى ەنگىزىلەدى. ال شاعىن اۋىلداردا بۇل ەرەجە كوروناۆيرۋستى جۇقتىرعاندار سانى 3-5 ادامنان اسسا قولدانىلادى، – دەيدى سانيتاريا دارىگەرلەرى.