الەم سپورتشىلارىنىڭ قازاقستان دەسە، ءبىر تىرناقتارى بۇگۋلە قالاتىن ادەت پايدا بولسا كەرەك. جاقىندا گولوۆكيننىڭ كەزەكتى قارسىلاسى، ورتا سالماقتاعى IBF چەمپيونى داۆيد لەمە ءوز تۆيتتەر اككاۋنتىنا بوراتتىڭ فوتوسىن جۇكتەگەن. بۇل تۋرالى «قامشى» پورتالى Nur.kz-كە سىلتەمە جاساي وتىرىپ حابارلايدى. 

وسىلايشا، كانادالىق سپورتشى قازاقستاندىق گەنناديي گولوۆكينمەن جەكپە-جەك الدىندا ازىلدەسپەك بولعان.

“حالايىق، وسى ۋاقىتقا دەيىن مىنا جىگىت (بورات – رەد. ەسكەرتپەسى) كەلمەي تۇرىپ، قازاقستاندى بىلدىك دەپ وزگەلەردى الداماي-اق قويىڭدار.  GGG ودان كەيىن كەلدى (جاي قالجىڭ، رەنجىپ جۇرمەڭدەر)”، – دەپ جازعان بوكسشى.

ەسكە سالساق، لەمە مەن گولوۆكين اراسىنداعى جەكپە-جەك 17 قازاندا نيۋ-يوركتەگى Madison Square Garden ارەناسىندا وتەدى. ول HBO تەلەارناسىندا اقىلى ترانسلياسيا جۇيەسى ارقىلى (PPV) كورسەتىلەتىن بولادى. قازاقستاندا بۇل جەكپە-جەكتى “قازاقستان” ارناسى كورسەتەدى.

ايتا كەتەرلىگى، وسىدان بىرنەشە كۇن بۇرىن ستامبۋلدىق “گالاتاسارايدىڭ” فۋتبولشىسى لۋكاش پودولسكي دە بوراتتىڭ فوتوسىن تۆيتتەرگە جۇكتەپ، ازىلدەگەن بولاتىن. تۇركيالىق فۋتبولشى باستاعان كوماندا چەمپيوندار ليگاسىندا “استانا” كومانداسىمەن كەزدەسەتىن بولادى.

سونىمەن قاتار، فينليانديالىق “حيك” كومانداسى دا “استانا” جانكۇيەرلەرىن مازاق ەتەتىن بوراتتىڭ فوتوسى قويىلعان سۋرەتتەردى جاريالاعان بولاتىن.