وتانداسىمىز گۇلنۇردىڭ جۇڭگو استاناسىندا جۇمىس ىستەپ جاتقانىنا 10 جىلداي بولدى. 3 جىل بۇرىن ول وسىندا كومپانياسىن اشقان. ءقازىر تمد ەلدەرىمەن ارىپتەستىك ورناتقىسى كەلەتىن جەرگىلىكتى بيزنەسمەندەرگە اقىل-كەڭەس بەرەدى. تورەلىك سوت سۋدياسى بولىپ تاعايىندالۋ گۇلنۇر ءۇشىن توسىن جاڭالىق بولدى. ول بۇل شەشىمدى «ءبىر بەلبەۋ – ءبىر جول» ستراتەگياسىن ىسكە اسىرۋ اياسىندا سۇرانىستىڭ ارتۋىمەن بايلانىستىرادى.

گۇلنۇر نۇركەيەۆا، قحر-دىڭ حالىقارالىق تورەلىك سوتى:

– تورەلىك تۋرالى زاڭ بويىنشا تەك جۇڭگو ازاماتتارى عانا تورەلىك سوتى بولا الادى. ءبىراق تورەلىك ءىسى شەتەلمەن بايلانىستى بولعاندا رۇقسات ەتىلەدى. وسى تۇرعىدا حالىقارالىق ساۋدا پالاتاسى شەتەلدىك اربيترلاردى ۇسىنادى. ءبىر تاراپ ورتالىق ازيا نەمەسە تمد ەلدەرىنەن بولعاندا، وسى ەلدەرگە قاتىسى بار اربيتردى تاڭداۋ قولايلى بولادى.

گۇلنۇر قازاق ەلىندە مەملەكەتتىك قىزمەتتە، ادۆوكاتتار القاسىندا جانە كۆازيمەملەكەتتىك سەكتوردا جۇمىس ىستەگەن. قازاقستاننىڭ تۇڭعىش سالىق كودەكسىن جاساۋعا قاتىسقان. كەيىن ول بەيجىڭ ۋنيۆەرسيتەتىندە جۇڭگو قۇقىعىن يگەرگەن. ءبىراق جوعارى وقۋ ورنىن بىتىرگەن سوڭ جۇمىس تابا الماي ءبىراز ءجۇرىپ قالعانىن جاسىرمايدى. زاڭ بويىنشا جۇڭگو قۇقىعىمەن تەك وسى ەلدىڭ ازاماتتارى اينالىسۋى ءتيىس. گۇلنۇر جاس وتانداستارىنا وسىعان نازار اۋدارۋ قاجەتتىگىن ەسكەرتكىسى كەلەدى.

گۇلنۇر نۇركەيەۆا، قحر-دىڭ حالىقارالىق تورەلىك سوتى:

- ەڭ ماڭىزدىسى، قىتايلىق سەرىكتەستى ابدەن تەكسەرۋ قاجەت. كەلىسىمنىڭ ناقتى ىسكە اساتىنىن زەرتتەپ، الدىن الا ءبىلىپ العان ءجون. بۇل نارىققا كىرمەس بۇرىن قۇقىقتىق قورىتىندىنى دايارلاپ الۋ كەرەك. بۇل كەيىن تەرىس كەلىسىمگە ۇرىنىپ، شىعىنعا باتپاس ءۇشىن وتە ماڭىزدى.

گۇلنۇر دوكتورلىق ديسسەرتاسياسىن ءساتتى قورعاعان سوڭ قازاقستاندىق زاڭگەرلەرگە حالىقارالىق دەڭگەيگە شىعۋعا قولدان كەلگەنشە كومەكتەسەتىنىن ايتادى.

اۆتورى: ەرنات مەلس ۇلى