400 سوزبەن ءتۇسىندىرۋ. ۇلىبريتانياداعى COVID-19-دىڭ تەز تارالاتىن جاڭا ءتۇرى

/image/2020/12/21/crop-17_5_423x627_england.jpg

COVID-19-دىڭ تەز تارالاتىن جاڭا مۋتاسياسى ۇلىبريتانيادا تارالعاندىقتان ەۋروپا ەلدەرى بىررىكەن كورولدىكتىڭ جولاۋشىلارىنا تىيىم سالا باستادى. كوروناۆيرۋستىڭ جاڭا ءتۇرى 70 پايىزعا جۇقپالى جانە لوندوندا قاتتى تارالۋدا.

ۆيرۋستار ۇنەمى وزگەرىپ وتىرادى. ماۋسىمدىق تۇماۋ جىل سايىن مۋتاسياعا ۇشىرايدى، سوعان ۇقساس پاندەميا باستالعاننان بەرى COVID-19 مۋتاسياعا ۇشىراپ، جاڭا تۇرلەرى پايدا بولۋدا.

سوڭعى كۇندەرى بىرىككەن كورولدىكتە انىقتالعان جاڭا تۇرگە بايلانىستى الاڭداۋشىلىق كۇشەيە ءتۇستى.

دەسە دە عالىمدار ۆاكسينا ۆيرۋسپەن كۇرەستە ءالى دە ءتيىمدى ەكەنىن ايتادى. جاڭا شتاممنىڭ ءولىم مولشەرى تومەنىرەك. الايدا ادامدار ودان سايىن ۋايىمداۋدا، ويتكەنى بۇل مۋتاسيا 70 پايىزعا جۇقپالى.

VUI-202012/01 دەپ اتالعان كوروناۆيرۋستىڭ جاڭا ءتۇرى (2020 جىلعى جەلتوقسانداعى العاشقى زەرتتەۋ نۇسقاسى) قىركۇيەكتىڭ ورتاسىندا ۇلىبريتانيانىڭ وڭتۇستىك-شىعىسىندا، ەل استاناسى لوندوندا نەمەسە كەنت گرافتىعىندا پايدا بولعان دەپ بولجانۋدا.

انگلياداعى قوعامدىق دەنساۋلىق ساقتاۋ سالاسىنىڭ قىزمەتكەرى سيۋزان حوپكينس 18 جەلتوقسان كۇنى جاڭا شتامنىڭ مودەلدەۋىن جاريالاپ، ۇلىبريتانيا ۇكىمەتىنە ەسكەرتۋ جاساعان جانە وتە سالماقتى ماسەلە ەكەنىن مالىمدەگەن. ۇلىبريتانيا ءوزىنىڭ قورىتىندىلارىن دۇنيەجۇزىلىك دەنساۋلىق ساقتاۋ ۇيىمىنا سول كۇنى تاپسىردى.

سودان بەرى جاڭا شتامم ەلدىڭ وڭتۇستىك-شىعىسىندا تەز تارالىپ، ۆيرۋستىڭ باسىم تۇرىنە اينالدى.

سوڭعى اپتادا لوندوندا اۋرۋ جاعدايلارىنىڭ 62 پايىزى جاڭا ۆيرۋسقا بايلانىستى بولدى. ال ءۇش اپتا بۇرىن بۇل 28 پايىز عانا بولعان.

ۆيرۋستىڭ وسىنداي جىلدام دامۋى پايدا بولعان سوڭ، ۇلىبريتانيا ۇكىمەتى الداعى روجدەستۆو كەزىندە قاتاڭ بۇعاتتاۋ شارالارىن قولدانۋعا كوشتى.

بۇعان دەيىن ۇلىبريتانيا پرەمەر-مينيسترى بوريس دجونسون ادامدارعا مەرەكەلىك جيىنداردا كەزدەسۋگە رۇقسات بەرۋدى جوسپارلاعان.

ۇلىبريتانيانىڭ باس عىلىمي كەڭەسشىسى پاتريك ۆاللەنس جاڭا نۇسقا باسقا ەلدەردە دە بولۋى مۇمكىندىگىن، ءبىراق ۇلىبريتانيادا باستالعان بولۋى ىقتيمال ەكەنىن جاريالادى.

نيدەرلاندى مەن بەلگيا تەز ارەكەت ەتىپ، جاڭا شتاممنىڭ تارالۋىن توقتاتۋ ءۇشىن ۇلىبريتانيادان كەلگەن ساياحاتشىلارعا تىيىم سالدى.

نيدەرلاندى بيلىگى جاڭا شتاممعا بايلانىستى كەم دەگەندە ءبىر جاعداي تاپقانىن جانە 1 قاڭتارعا دەيىن ۇلىبريتانيا جولاۋشىلارىن تاسىمالداۋعا تىيىم سالىنعانىن مالىمدەدى. "بەلگيا ۇلىبريتانيادان رەيستەر مەن پويىزداردىڭ كەلۋىن كەم دەگەندە 24 ساعاتقا توقتاتادى" دەپ حابارلادى بەلگيا پرەمەر-مينيسترى الەكساندر دە كرۋ.

ۇلىبريتانيانىڭ باس مەديسينالىق قىزمەتكەرى كريس ءۋيتتيدىڭ ايتۋىنشا، قازىرگى كەزدەگى سىناقتار جاڭا ۆيرۋستى انىقتاي الادى.

عالىمداردىڭ ايتۋىنشا، جاڭا شتامم 23 وزگەرىستى قامتيدى جانە ونىڭ دەنى ۆيرۋس جاساعان اقۋىزدىڭ وزگەرۋىنە بايلانىستى.

ۇلىبريتانيانىڭ دەنساۋلىق ساقتاۋ ءمينيسترى مەتت حەنكوك جاڭا لوكداۋن شارالارى ءبىراز ۋاقىتقا دەيىن ساقتالۋى مۇمكىن ەكەنىن بولجادى.

"جاڭا نۇسقانىڭ قانشالىقتى تەز تارالاتىنىن ەسكەرسەك، ۆاكسينا شىعارىلمايىنشا، ونى باقىلاۋدا ۇستاۋ وتە قيىن بولادى" دەدى حانكوك.

شوتلانديانىڭ ءبىرىنشى ءمينيسترى نيكولا ستەردجون تۆيتتەردە مۋتانتتى شتامم جاعدايلارى شوتلانديادا "ۇلىبريتانيانىڭ قالعان بولىگىنە قاراعاندا تومەن" دەپ مالىمدەدى، ءبىراق "تەز تارالاتىن شتاممدى توقتاتۋ ءۇشىن الدىن الۋ شارالارى قاجەت بولۋى مۇمكىن" دەپ ەسكەرتتى.

ۇلىبريتانيادا وسى ۋاقىتقا دەيىن COVID-19-دان 67 مىڭنان استام ادام قايتىس بولدى، بۇل جاعداي ەلدى يتاليامەن بىرگە ەۋروپاداعى ەڭ اۋىر زارداپ شەككەندەردىڭ بىرىنە اينالدىردى.

جاڭا شتامم پايدا بولعان سوڭ، الەمنىڭ 20 ەلى ۇلىبريتانيامەن اۋە قاتىناسىن توقتاتقانىن جاريالادى.

400 سوزبەن ءتۇسىندىرۋ. ۇلىبريتانياداعى COVID-19-دىڭ تەز تارالاتىن جاڭا ءتۇرى

قاتىستى تەگتەر :

پىكىر قالدىرۋ

قاتىستى ماقالالار