Tesla جانە SpaceX كومپانياسىنىڭ باس اتقارۋشى ديرەكتورى يلون ماسك سوڭعى سۇحباتتارىنىڭ بىرىندە قىزىقتى ويلارىن جەتكىزدى. ول دۇنيەجۇزىلىك ءۇشىنشى سوعىستان بۇرىن مارستا قالا سالىپ ءبىتۋدى جوسپارلاپ وتىرعانىن، ءوز كومانداسىن جاساقتاۋداعى تاسىلدەرىن جانە بوگدە عالامشارلىقتار تۋرالى ايتتى.
يلون ماسكتىڭ بىرىككەن اراب امىرلىكتەرى بولاشاق جانە كابينەت ىستەرى ءمينيسترى، دۇنيەجۇزىلىك ۇكىمەت ءسامميتىنىڭ ءتوراعاسى موحامماد ال گەرگاۆيمەن سۇحباتى بىلاي ءوربىدى:
مۇحاممەد ءال گەرگاۆي: ءسىز كوماندانى قالاي جاساقتايسىز؟ نەنى نەگىز ەتەسىز؟
يلون ماسك: مەنىڭ (جۇمىسقا الارداعى) ينتەرۆيۋدە قوياتىن نەگىزگى سۇراقتارىم قاشاندا بىردەي.
مۇحاممەد ءال گەرگاۆي: نە سۇرايسىز؟
يلون ماسك: مەن "ماعان ءوز ومىرىندە وتكەرگەن وقيعالار تۋرالى ايتىپ بەر" دەيمىن. ونىڭ ءومىر جولىندا قانداي شەشىمدەر قابىلداعانىن جانە نەگە ول شەشىمدەردى قابىلداعانىن سۇرايمىن. "ماعان سەن جولىققان ەڭ قيىن پروبلەمانى ايت جانە ونى قالاي شەشتىڭ؟" دەپ سۇرايمىن. بۇل سۇراق، مەنىڭشە، وتە ماڭىزدى. ويتكەنى پروبلەمانى شىنىمەن شەشكەن ادامدار ءىس جۇزىندە ونى قالاي شەشۋ كەرەك ەكەنىن بىلەدى. ولار كىشكەنە دەتالگە دەيىن بىلەدى. ال شەشكەن بولىپ كورىنگىسى كەلگەن ادامدار ءبىر قادام جاساماۋى مۇمكىن. ءبىراق سوسىن ولار تۇتىلادى.
مۇحاممەد ءال گەرگاۆي: سىزدىڭشە، جەر شارىنان باسقا جاقتا ينتەلەگەنتتى تىرشىلىك بار ما؟
يلون ماسك: مۇمكىن. فيزيكا مەن فيلوسوفياداعى ۇلكەن سۇراقتاردىڭ ءبىرى: بوگدە عالامشارلىقتار قايدا؟ مۇمكىن ولار ءبىزدىڭ ارامىزدا (وتىر). ءبىراز ادامدار مەنى بوگدە عالامشارلىق دەيدى. ءبىراق ول شىندىق ەمەس.
مۇحاممەد ءال گەرگاۆي: مۇمكىن ءبىز بوگدە عالامشارلىق شىعارمىز. كەيبىرەۋلەر "ادامزات جەر شارىنىكى ەمەس" دەيدى. "ادامزات باسقا ءبىر جەردەن كەلدى" دەيدى. "ادام اتا مەن حاۋانا باسقا جاقتان كەلگەن" دەپ ايتىلادى. سىزدىڭشە، ءبىز كەلەسى ەلۋ جىلدا بوگدە عالامشارلىقتارمەن حابارلاسا الامىز با؟
يلون ماسك: بۇل ساۋالعا جاۋاپ بەرۋ وتە قيىن. ەگەر الەمدە سۋپەرينتەلەگەنتتى تىرشىلىك بولسا، ولار الدەقاشان ءبىزدى باقىلاپ وتىر. ءبىز تەك ونى سەزە الاتىنداي دەڭگەيدە اقىلدى ەمەسپىز... جارىق جىلدامدىعىنان اسپاي، ءتىپتى، جارىقتىڭ 10-20 پايىزىنداي جىلدامدىقپەن دەپ ەسەپتەگەندە، بۇكىل گالاكتيكانى باعىندىرۋعا 10 ميلليون جىل كەتەدى، مۇمكىن ماكسيمۋم 20 ميلليون جىل كەتەدى. بۇل ۋاقىت سالىستىرمالى تۇردە تۇك ەمەس.
يلون ماسك مارس قوعامىنىڭ ۆيرتۋالدى كونۆەنسياسىندا "ءۇشىنشى دۇنيەجۇزىلىك سوعىستان بۇرىن" قىزىل عالامشاردا قالا سالىپ ۇلگەرۋ كەرەك ەكەنىن ايتتى.
– مەنىڭشە، ءوزىن-وزى قامتاماسىز ەتە الاتىن مارس قالاسىن سالۋ وتە ماڭىزدى. بۇل ىستەر از ادامدارعا نەمەسە بازا قۇرۋ ءۇشىن عانا جاسالماۋى كەرەك. قايتا تاۋەلسىز قالا قۇرۋ كەرەك. مىسالى، جەر شارىنان عارىش كەمەلەرى مارسقا كەلمەي قالسا، قىزىل عالامشارداعى قالا ءومىر سۇرە الا ما؟ ءار ءتۇرلى سەبەپ بولۋى مۇمكىن. ەگەر عارىش كەمەلەرى مارسقا بارماي قالعان جاعدايدا، قالاي بولادى؟ قالا قۇرىپ كەتە مە؟ ولاي بولسا، ميسسيا ءقاۋىپسىز ەمەس. سوسىن مىناداي ساۋال تۋىندايدى. "ءبىز ءوزىن-وزى قامتاماسىز ەتەتىن مارس قالاسىن دۇنيەجۇزىلىك ءۇشىنشى سوعىستان بۇرىن سالىپ بىتەمىز بە، جوق، كەيىن جاسايمىز با؟" مەنىڭ ويىمشا دۇنيەجۇزىلىك ءۇشىنشى سوعىستان كەيىن ونى ىستەۋ ىقتيمالدىعى تومەن. سول ءۇشىن ءبىز بۇرىن قالا سالۋىمىز كەرەك. بۇل تەك ءقاۋىپتى جاعىن قاراستىرۋ. مىسالى، ۇلكەن سوعىس، ءىرى جانارتاۋلار، كومەتانىڭ جەرگە سوعىلۋى سياقتى ىقتيمالدىقتاردى قاراستىرۋ كەرەك، – دەدى يلون ماسك.
پىكىر قالدىرۋ