قازاق تەڭگەسىنىڭ ءبىر كۇندە نەلىكتەن تىراپاي اسقانىن، مۇنىڭ ەكونوميكالىق-قارجىلىق سەبەپ-سالدارلارىن تاتپىشتەپ جاتپايمىن: بۇل ماسەلەلەردىڭ ساي-سۇيەگىن بيلىكتەگى دە، ۇيدەگى دە از كەمىرگەن جوق...
مەنىڭ كورگەنىم – تامىزدىڭ اپتابى جايىندا قالدى، تەڭگەسى تەڭكيگەن قازاقتىڭ كوزى شاراسىنان شىعا جازدادى – 20 تامىز كۇنى دوللار باعامى 259 تەڭگەگە دەيىن شارىقتاپ كەتتى...
قۇداي بەتىن ارمەن قىلسىن، سوعىس باستالعانداي قاربالاس-قاپىلىس باستالىپ، ءتىپتى، ءقايسىبىر «سەزىمتال» جاندار قارا اسپان ءتوندىرىپ، ءزاۋلىم عيماراتتاردىڭ شاتىرىنا «شاپشىپتى»...
ارتىنشا، دوللاردىڭ اياعى شالىندى، ۇرىككەن – ءۇمىت كوردى، شۋدىڭ شاڭى باسىلدى...
ەل ەكسپورتىنىڭ باسىم بولىگى مۇنايعا تيەسىلى جۇرتتىڭ ۇلتتىق اقشاسىنىڭ تەڭگەرمەشىلدىگى مىڭ قۇبىلىپ وتىرادى. ءقاۋىپ كەمۋى ءۇشىن ەكسپورتتىڭ مۇنايعا تاۋەكەلىن ازايتۋ كەرەك. ىشكى سۇرانىستى وتاندىق ونىممەن قامتاماسىز ەتۋ ءۇشىن اۋىلشارۋاشىلىعىن قارقىندى قولعا الۋ كەرەك. مۇنايعا عانا سەنىپ قول قۋسىرىپ وتىرماي، باسقا كاسىپتەردى ون ەسە قارقىنمەن جۇرگىزۋگە ءتيىسپىز. باسەكەگە قابىلەتتى بولساق، مۇرتىمىزدى بالتا شاپپايدى.
ديەۆالۆاسيانىڭ جاعىمدى جاعى – ەل بۇرىنعىداي اتىس-شابىس، شوۋ-بيزنەس، وسەك-اياڭ جاڭالىقتارىن ىسىرىپ قويىپ، دوللاردىڭ باعامىن قاراپ، مۇناي باعاسىن باجايلاپ، قارجى جاڭالىقتارىنا مويىن بۇردى. ساياسي-ەكونوميكالىق بەلسەندى ەل – بولاشاعى جارقىن ەل بولماق.
...جالپى، توقتاپ قاراپ، «وقتاپ» ويلانسام: ءبىزدىڭ ۇكىمەتباسىنىڭ نەگىزگى ماماندىعى، باستى كاسىبى – تىلشىلىك ەكەن عوي، ياعني، ءتىل مامانى... ەندەشە، ءدۇيىم ەلدە بىردە-بىر ەكونوميست نەمەسە قارجىگەر قۇرىپ قالعانداي، ءتىلشىنى ۇكىمەت باسىنا قايتا-قايتا نەگە «زورلاقپەن» سۇيرەي بەردىك؟!.
ءتىلى كەرمەك بىرەۋ: «باستىسى – قارجىگەرلىك ەمەس، كاسسير بولا ءبىلۋ عوي» دەگەن ءۋاج ايتتى. كىم-كىمنىڭ «كاسسيرى» ەكەندىگىندە شارۋام جوق، ءبىراق، تۇتاس ەلدىڭ باس كاسسيرىن جەكەشەلەندىرىپ الۋعا بولمايدى دەپ ويلايمىن. ءتىلشى بايعۇستىڭ تۇسكەن تابىستى تۇگەندەۋگە تالپىنىسى تارتقانىمەن، تۇتاس جۇرتتىڭ جالپى شارۋاسىن تارازىلاۋعا تەگەۋرىنى جەتە مە؟!.
...قازاق ەلى وماقاسىنان قۇلاپ، وپىرىلا سۇلاپ جاتقاندا قازاق ۇكىمەتىن ۇنەمدى دە ۇيلەسىمدى باسقارعان اكەجان قاجىگەلدين اعامىزدىڭ ناعىز داعدارىس مامانى ەكەندىگىنە ەشكىمنىڭ ءشۇباسى بولماس. الىستا جاتسا دا، الاشىنا جانى اشىعان اكەجان ماعجان ۇلى ۇلتتىق بانكتىڭ باسشىلىعىنا وراز جاندوسوۆتى ۇسىنىپ: «مۇنىڭ ءوزى ەلىمىزگە حالىقارالىق قارجى ينستيتۋتتارىنىڭ سەنىمىن قايتارۋعا، قازاقتىڭ ۇلتتىق بانكىنە كوزقاراستارىن تۇزەۋگە، شەتەل ينۆەستورلارىنىڭ جۇمىستارىنا ءۇمىت ۇستەمەلەۋگە ىقپال ەتەر ەدى» - دەيدى.
بۇل – ءسوزدىڭ تورەسى. ەندىگى جەردە قايرات كەلىمبەتوۆءتىڭ سوزىنە قاراپايىم حالىقتىڭ دا، شەتەلدىك ساياساتكەرلەر مەن ينۆەستورلاردىڭ دا سەنبەيتىنى ايقىن.
سەنىم دەگەنىڭىز – قۇدىرەتتى كۇش قوي. وي-سانانىڭ سەرگەكتىگى مەن رۋح-جىگەردىڭ سىلكىنىسىن سەنىم تۋدىرادى. قازاققا وزىنە جانە تەڭگەگە دەگەن سەنىم كەرەك.
...جاڭا اپتانىڭ ەكىنشى كۇنى دوللار باعامى 237 تەڭگەگە دەيىن تومەندەدى. اللاعا شۇكىر، بىزگە اۋىز بەرگەن قۇداي، ءناپاقادان دا قۇر قالدىرماس...
قاجىمۇقان عابدوللا
