وتكەن جولعى تەڭگەنىڭ 40 پايىزعا قۇنسىزدانۋىنان كەيىن حالىقتىڭ ءوز بيلىگىنە دەگەن سەنىمى جوعالىپ، بيلىك پەن حالىقتىڭ اراسى ودان سايىن الشاقتاي تۇسكەنى بەلگىلى. وسى جولى قاراشا حالىقتىڭ بار ءۇمىتى وزدەرى سايلاعان پارلامەنتتە ەدى. اتتەڭ! گەرونتوكراتيالىق جۇيەگە ىنتى-شىنتاسىمەن بەرىلگەن دەموگوگ دەپۋتاتتار بۇل جولى دا «ءلام-ميم» دەپ جاق اشپادى. تەڭگەنى تارگەتتەگەن كۇنى-اق، قاراشا حالىقتى بالاشا الداپ سوققان ۇكىمەت پەن ەش نارسەگە قاۋقارسىز ۇلتتىق بانكتىڭ ءتوراعالارىن تاعىنان تايدىرۋعا ءتيىستى بولعان پارلامەنت تۋرالى «abai.kz» سايتى جاقىندا «پارمەنسىز پارلامەنتتىڭ كەرەگى نە؟» اتتى ماقالا جارىق كوردى. ەسكەرتە كەتەيىك، بۇل تاقىرىپتا «قامشى» پورتالى دا از جازباعان بولاتىن.
اتالمىش ماقالادا اۆتور «ا، ايتپاقشى، ۇمىتىپ بارادى ەكەنبىز. بۇگىندە كەيبىر مينيسترلەر پارلامەنتكە پىسقىرىپ تا قاراماي، جالپى جينالىستارعا ورىنباسارىن جىبەرە سالاتىنىن بولدى. نەگىزى پارلامەنتكە بارعان ۇكىمەت ءمۇشەلەرى، مينيسترلەر، وبلىس، قالا باسشىلارىنىڭ تىزەلەرى قالتىراپ تۇرۋى قاجەت قوي»،- دەيدى. الىپ-قوسارى جوق. ءبىزدىڭ «اۆتار – ۇكىمەت» باس شۇلعىعىش پارلامەنتتى پىسقىرسىن با؟!
تاۋەلسىزدىك جىلدارىنداعى ىشكى ساياسي احۋالداردى الىپ قاراساڭىز – ءبىزدىڭ «اقساقال بيلىك» پالامەنتتەن گورى ستۋدەنتتەردەن قورقاتىن سەكىلدى دەگەن ويعا قالۋىڭىز ابدەن مۇمكىن. بۇعان سەبەپ تە جەتەرلىك.
وسى تۇستا ءبىر سۇراق تۋىندايدى. ۇكىمەت نەگە ديەۆالۆاسيانى ستۋدەنتتەر مەن پارلامەنت كانيكۋلدا جۇرگەندە جاسادى؟
دەسپوتيا داۋىرىندەگى قازاقستان بيلىگى جىل وتكەن سايىن ميتينگىلەر مەن شەرۋلەردەن، ءتىپتى بىرەر كىسى جاي عانا كوشەدە توپتاسىپ تۇرسا دا زارەسى ۇشىپ، اياق باسقان جۇرتتى اڭدىپ، رەتى كەلسە تۇتقىنداپ، اكىمشىلىك جازاعا تارتۋدى جيىلەتتى. ال، قازاقستان پرەزيدەنتىنە قارسى ءسوز ايتۋ – قىلمىستىق ءىس قوزعاپ، سوتتالۋمەن بىتەدى.سولاي عوي؟ ادامداردىڭ كونستيتۋسيالىق قۇقى، بيلىك قول قويعان حالىقارالىق ادام قۇقىقتارى جونىندەگى كونۆەنسيالار مەن فاكتىلەر قازاقستان بيلىگى ءۇشىن – قاعاز. باسقا ەشتەڭە دە ەمەس. بيلىكتە قانداي جولمەن بولسىن ءوزىن-وزى قورعاۋ ينستيكتى عانا قالعان. مۇنىڭ ءبارى بيلىكتىڭ السىزدىگىنىڭ، شاراسىزدىعىنىڭ كورىنىسى.
مىسالى، جەلتوقسان ايى تۋسا بولدى، قازاقستاننىڭ تۇكپىر-تۇكپىرىندەگى جوو-نىڭ ستۋدەنتتەرىن اۋىلدارىنا قۋىپ، قالادا قالعاندارىن جاتاقحانالاردان شىعارماي، الاڭعا شىقپاۋ تۋرالى قولحات جازدىرىپ، پوليسيا قىزمەتكەرلەرىن ۇيىپ-توگىپ تاستاۋ بيلىكتەگىلەر ءۇشىن ەرسى ەمەس. وعان ەتىمىز دە ۇيرەنىپ كەتكەن. بۇنى ءار جىلدىڭ جەلتوقسانىندا كورىپ ءجۇرمىز. نەگە بيلىك جاستاردان زارەدەي قورقادى؟ تاعى ءبىر مىسال، سوڭعى ديەۆالۆاسيا (تەڭگەنىڭ 40 پايىزعا قۇلدىراۋى) ستۋدەنتتەردىڭ جازعى دەمالىسى كەزىندە جاسالىپ وتىر. وسىعان قاراپ، ءتۇرلى ويعا كەتەتىنىڭ ەرىكسىز...
تاۋەلسىزدىكتىڭ قۇنىن تارك ەتىپ جىبەرگەن «اقساقال بيلىك» پەن ۇركەك ۇكىمەت ستۋدەنت جاستاردىڭ مەرەكە، نەمەسە قانداي دا ءبىر شارا كەزىندە قالادا قالعانىنان سەسكەنۋدىڭ ورىنا پارلامەنتتەگى قالشىلداعان قاريالاردىڭ ورنىن جالىنداعان جاستارمەن تولىقتىرۋ ماسەلەسىن نەگە قاراستىرمايدى ەكەن،ءا؟! ۇكىمەت جاستاردان سونشالىق قورىقسا – ولاردىڭ كۇشىنە سەنەدى دەگەندى بىلدىرەدى. سەنسە، نەگە جوعارعى بيلىك پارلامەنتتى بەلسەندى ستۋدەنتتەردەن جاساقتامايدى؟ بۇل دا يدەيا ەمەس پە؟ وسى رەتتە ويلاۋشى ەدىك، قوعام بەلسەندى بولسا، بيلىك تە حالىقپەن ساناسا باستايدى، كەيبىر ماسەلەلەردى ءوزارا ديالوگقا كەلۋ ارقىلى شەشىپ تاستايدى دەپ. ءبىراق، قوعام مارعاۋلىق تانىتپاسا دا، قۇزىرلى بيلىك توبەمىزگە شاۋگىم قايناتىپ جۇرگەنى جاسىرىن ەمەس. ونىڭ ۇستىنە قازىرگى پارلامەنتتەگىلەردىڭ دەنى – «اۋتسايدەرلەر» ەكەنىنە تالاس جوق. ەندەشە اۋتسايدەرلەردى شەگەرىپ، نەگىزگى جاساقتى ويىنعا شىعاراتىن ۋاقىت جەتتى ەمەس پە؟
نۇرگەلدى ءابدىعاني ۇلى
«قامشى» پورتالى
