ۇكىمەت  جانار-جاعارماي باعاسىن مەملەكەت تارپىنان رەتتەۋدەن باس تارتتى . بۇل تۋرالى «قامشى» پورتالى Kursiv.kz-كە سىلتەمە جاساي وتىرىپ حابارلايدى. ق ر پرەمەر-مينيسترىنىڭ ءبىرىنشى ورىنباسارى باقىتجان ساعىنتايەۆ استانداداعى وتكەن باسپا ءسوز كونفەرەنسياسىندا وسىنداي مالىمدەمە جاساعان. ءوز سوزىندە ول «ىشكى نارىقتاعى اي-92، اي-93 ماركالى جانارمايدىڭ تاپشىلىعىن رەتكە كەلتىرۋ ءۇشىن مەملەتكەت باعانى قاداعالامايتىن بولادى»،-دەپ تۇسىنىكتەمە بەرىپ وتكەن. ونىڭ ايتۋىنشا ۆاليۋتا باعامىنىڭ تۇراقسىزدىعى جانارمايدىڭ قىمباتتاۋىنا ايتارلىقتاي اسەر ەتكەن.

«تەڭگەنىڭ ەركىن ۆاليۋتالىق اينالىمعا كوشۋىنە بايلانىستى تەڭگە مەن ءرۋبلدىڭ باعامى اراسىندا دا  ايىرماشىلىقتار پايدا بولدى. ەگەر ءبىز رەسەيدەن جانارماي ساتىپ الار بولساق، ول بىزگە 120 تەڭگەدەن،  ءبىزدىڭ بولشەك ساۋدا باعاسى بويىنشا  108 تەڭگەدەن اينالادى. ارينە باعادان ەشكىمنىڭ ۇتىلعىسى كەلمەيدى.بۇلاي جالعاسا بەرسە، قىركۇيەك ايىندا ءبىز جانارماي تاپشىلىعىنا تاپ بولامىز. سوندىقتان، ءبىز ءار ءتۇرلى نۇسقارلارعا ساراپتاۋ جۇرگىزىپ كوردىك. ءبىزدىڭ 200 مىڭ توننا قورىمىز بار بولعان كۇننىڭ وزىندە، ونى رەسەيدەن كەلەتىن جانارمايمەن تولىقتىرىپ وتىرماسا، ناعىز تاپشىلىق باستالادى. قازىرگى قابىلداعان شەشىم ەلىمىزدى جانارماي تاپشىلىعى تىعىرىعىنا تىرەلۋدەن ساقتاپ قالادى. سوندىقتان ءبىزدىڭ ۆاليۋتامىز الەمدىك نارىقتا ءوز باعامىن قالىپقا كەلتىرگەنشە، مۇناي ونىمدەرىنىڭ دە باعاسى اۋىتقىمالى بولادى»،-  دەدى ۆيسە-پرەمەر.

اينۇر تولەۋ

«قامشى» سىلتەيدى