پرەزيدەنت قاسىم-جومارت توقايەۆ قارجى ءمينيسترى ەرۇلان جاماۋبايەۆتى قابىلدادى، دەپ حابارلادى اقوردا سايتى.
سايت مالىمەتىنشە، جاماۋبايەۆ مينيسترلىكتىڭ 2020 جىلى اتقارعان جۇمىستارىنىڭ ناتيجەلەرى، پرەزيدەنت جولداۋىندا قارجى سالاسىنا قاتىستى ايتىلعان تاپسىرمالارىنىڭ ورىندالۋ بارىسى، ۆەدومستۆونىڭ الداعى نەگىزگى مىندەتتەرى جايىندا بايانداعان.
مينيستر بيۋدجەتتىڭ تەڭ ءبولىنۋىن قامتاماسىز ەتۋ، سالىق-كەدەن اكىمشىلىگىن سيفرلاندىرۋ، كولەڭكەلى ەكونوميكانىڭ كولەمىن ازايتۋ، مەملەكەتتىك اكتيۆتەردى باسقارۋدىڭ تيىمدىلىگىن ارتتىرۋ، ساتىپ الۋ مەن مەملەكەتتىك اۋديت جۇيەلەرىن جەتىلدىرۋ تۋرالى ايتتى.
مەملەكەت باسشىسى توقايەۆ ءۇش جىلدىق رەسپۋبليكالىق بيۋدجەتتى وڭتايلاندىرۋعا جانە ساپالى ازىرلەۋگە قاتىستى ءبىرقاتار تاپسىرما بەردى. سالىق-كەدەن اكىمشىلىگىن سيفرلاندىرۋ جۇمىسىن تولىق ويلاستىرىپ، بەلگىلەنگەن مەرزىمدە ورىنداۋدىڭ ماڭىزدىلىعىن اتاپ ءوتتى.
پرەزيدەنت مەملەكەتتىك ساتىپ الۋ تۋرالى زاڭنامانى جەتىلدىرۋ قاجەتتىگىنە توقتالدى. ونىڭ ايتۋىنشا، ۇسىنىلىپ وتىرعان بارلىق جاڭا زاڭنامالىق باستامالار ابدەن پىسىقتالۋى ءتيىس.
قاسىم-جومارت توقايەۆ مەملەكەتتىك اۋديتورلىق قىزمەت ءتيىمدى بولۋى قاجەت جانە رەسمي ورگانداردىڭ نەگىزسىز بيۋدجەتتىك شىعىندارىن انىقتاپ، ونىڭ الدىن الۋ شارالارىنا باسا ءمان بەرۋى كەرەك دەپ سانايدى.
پىكىر قالدىرۋ