بۇل تۋرالى ماڭعىستاۋ وبلىسى كاسىپكەرلەر پالاتاسىنىڭ ديرەكتورى جاڭبىرباي دوسپايەۆ ق ر پرەزيدەنتى جانىنداعى ورتالىق كوممۋنيكاسيالار قىزمەتى ماڭعىستاۋ فيليالىندا وتكەن بريفينگتە حابارلادى. بۇل تۋرالى «قامشى» پورتالى حابارلايدى.

“وسى جىلدىڭ 8 ايى ىشىندە جالپى قۇنى 309،8 ملرد. تەڭگە بولاتىن جەرگىلىكتى سيپاتتا دامىتۋ بويىنشا ارىپتەستىك تۋرالى 108 مەماراندۋمعا قول قويىلدى. اتالمىش مەماراندۋمدار اياسىندا جالپى قۇنى 287،2 ملرد. تەڭگە بولاتىن 315 كەلىسىمشارت جاسالىندى. بۇل مەماراندۋمدار قۇنىنىڭ 92،7 % قۇرايدى”، - دەپ باياندايدى جاڭبىرباي دوسپايەۆ.

ونىڭ بايانداۋىنشا، ايماقتىق كاسىپكەرلەر پالاتاسىنىڭ باستاماسى بويىنشا كاسىبي دايىندىعى بار كادرلاردى دايىنداۋ سالاسىندا ارىپتەستىكتىڭ ءۇش جاقتى كەلىسىمشارتىنا قول قويىلدى.

“بۇگىنگى تاڭدا ماڭعىستاۋ وبلىسىنىڭ 14 كوللەدجى مەن 26 كاسىپورنى اراسىندا 15 ماماندىق بويىنشا كاسىبي دايىندىعى بار كادرلاردى دايىنداۋ سالاسىندا ارىپتەستىكتىڭ ءۇش جاقتى كەلىسىمشارتىنا قول قويىلدى. “كاسىپورىن-كوللەدج-ستۋدەنتتىڭ” قاتىسۋىن قاراستىراتىن كەلىسىمشارتقا 402 وقۋشى قول قويدى. مۇناي ءوندىرىسى سالاسى ماماندىقتارى بويىنشا “اقتاۋ مۇناي ەلەكتروندىق كومپانياسى” ج ش س مەن 3 كوللەدج اراسىندا ارىپتەستىك جونىندە مەماراندۋمدار، ورتا ارنايى ءبىلىم بەرۋ مەكەمەلەرىن قامقورلىققا الۋ جونىندەگى 2 كەلىسىمشارت جاسالىندى.  “مارين بولاشاق” ج ش س جانە “بەرەكەت-ف” ج ش س ءىرى كاسىپورىندارى جانىندا كادرلاردىڭ بىلىكتىلىگىن ارتتىرۋ بويىنشا وقۋ ورتالىقتارى قۇرىلدى. بۇدان باسقا، ق ر ۇكىمەتىنىڭ 2014 جىلعى 15 قازانىنداعى قاۋلىسىمەن بەكىتىلگەن ەكى جاقتى ءبىلىم بەرۋدىڭ جول كارتاسىنا 6 سالا بويىنشا كادرلار دايارلاۋدى جۇزەگە اسىراتىن وبلىستىڭ 10 كوللەدجى ەندى”، - دەپ اتاپ كورسەتتى جاڭبىرباي دوسپايەۆ.

سونىمەن قاتار، ول “بيزنەس-مەكتەپ” جوباسى اياسىنداعى “بيزنەس-كەڭەسشى” جوباسى بويىنشا بيزنەس-جاتتىقتىرۋشىلارىمەن تىڭداۋشىلاردىڭ 22 توبى ءبىلىم العانىن حابارلادى. وسىلايشا، 624 ادام بەلگىلەنگەن ۇلگىدەگى سەرتيفيكات الدى، ونىڭ 380ء-ى اۋىل تۇرعىندارى. ءبىلىم العاندار سانىنىڭ 534 ادامى ءوز ءىسىن اشۋدى جوسپارلاۋدا.